Read tshiluba Balumbuluishi 5 Bible Online

Balumbuluishi 5 - tshiluba bible

Balumbuluishi 5

¹Hashishe Debola ne Balaka, muana mulume wa Abinoama, bakimba musambu dituku adi ne:

²Bualu bua balombodi bakalombola Bena Isalele, ne bualu bua bantu bakadifila bua disua diabo, nuvudishile Yehowa disanka!

³Unvuai, nuenu bakelenge, telejai matshu, nuenu bana ba bakelenge; meme mene, meme nengimbile Yehowa musambu; nengimbile Yehowa, Nzambi wa Isalele, musambu wa kumutumbisha nʼau.

⁴Yehowa, hawakumuka ku Sei, hawakafuma ku budimi bua Edome, buloba buakazakala, ne diulu diakamba kuhona, e, matutu akamatshisha nvula.

⁵Mikuna minene yakazakala ku mesu kua Yehowa; mukuna au munene wa Sinai mene ku mesu kua Yehowa, Nzambi wa Isalele.

⁶Mu matuku a Shamagâ, muana mulume wa Anata, ne mu matuku a Yaele, nshila minene kayakadi mibuwa, ne bena luendu bakenda mu nshila mikonyangale.

⁷Bakelenge bakahuwa mu Isalele, bakahuwa mene tô ne hanakabika, meme Debola mene; nakabika bu muledi wa bana mu Isalele.

⁸Bobo bakasungula nzambi mihia-mihia, ne hashishe nvita yakadi ku bibi bia musoko; bakamona ngabu anyi difuma munkatshi mua binunu makumi anai bia Bena Isalele, anyi?

⁹Mutshima wanyi udi kudi bakokeshi ba mu Isalele bakadifila munkatshi mua bantu bua disua diabo; nuvudishile Yehowa disanka.

¹⁰Nuenu, badi babanda ha nyima ha tubalu tutoke, ambai bualu; nuenu bantu badi bashikama ha biala bia bubanji, ne nuenu badi benda mu nshila, ambai bualu ebu.

¹¹Ku muaba wakadi mutoyi wa bena nvita bakadi ne mata mu miaba yakasunabo mai, nebambilanganeku bua malu mimpe akenza Yehowa; bua bienzedi biandi bimpe bia bukokeshi buandi mu Isalele. Hashishe bantu ba Yehowa bakaya ku bibi bia misoko.

¹²Tabala, tabala, Debola: Tabala, tabala, imba musambu; bika, Balaka, lombola bakuatshibua, wewe, muana wa Abinoama.

¹³Hashishe tshituha tshia bakelenge bakashala ne bantu bakahueka; ne Yehowa wakalua kundi bua kuluanganeye ne bantu bakole;

¹⁴bakadi ne muji wabo mu Amaleka bakumuka mu Efelayima, ku nyima kuebe, Benyamina, wakahueka munkatshi mua bantu bebe; bakokeshi bakafuma ku Maki, ne bafundi bakafuma mu Zebulona.

¹⁵Bana balume ba bakelenge banene ba mu Yisakâ bakadi ne Debola; bu muakadi Yisakâ, nunku bu muakadi Balaka; bakamulonda mu makasa andi mu bibanda lubilu. Ku tusulu tua mai tua Lubena bakahangidisha meji manene mu mitshima yabo.

¹⁶Wakashikama munkatshi mua mpangu ya mikoko bua kunvua miadi yai bualu kai? Ku tusulu tua mai tua Bena Lubena, bakahangidisha meji manene mu mitshima yabo.

¹⁷Bena Gilada bakashikama dishiya dia Yadene; Bena Dana bakashala anu mu matu manene bualu kai? Bena Ashê bakatshidi bashikama ku muelelu wa mai manene, bakashikama ku tusulu tuabo.

¹⁸Bena Zebuluna bakadi bu bantu bakamba kufila mioyo yabo tô ne ku lufu, ne Bena Nafatale bakamba kufuila ha mutu ha mpata mile.

¹⁹Bakelenge bakaluhuka, bakaluangana; hashishe bakelenge ba mu Kanâna bakaluangana mu Tanaka hehi ne mai a Megido; bobo kabakaheta bintu bu difutu.

²⁰Mitoto ya mu diulu yakaluangana, mitoto ya mu nshila yai yakaluangana ne Sisela.

²¹Musulu wa Kishona, musulu au wa kale kale, musulu wa Kishona mene mene wakabahita bukole. Mutshima wanyi, enda ne bukole.

²²Hashishe tubalu tuakatua mikono yatu hanshi, ditua diatu, ditua diatu ne bukole.

²³Muanjelo wa Yehowa wakamba ne, Ela Meloze mulau, ela bena musoko au milau mikole bualu bua bobo kabakalua bua kukuatshisha Yehowa: bua kukuatshisha Yehowa ku mpala kua bantu bakole.

²⁴Yaele, mukashi wa Hebê, Muena Kena, asankishibue ku mutu kua bakashi bonso; yeye neikale ne disanka ku mutu kua bakashi badi bashikame mu ntenta.

²⁵Yeye wakamulomba mai, kadi yeye wakamuha mabele; wakalua kudiye ne manteke mu dilonga dia mukelenge.

²⁶Yeye wakolola tshianza tshiandi ku mutshi wa mutondo wa ntenta, wakolola tshianza tshiandi tshia bukole ku marteau a bena mudimu; yeye wakakumina Sisela ne marteau, wakamukumina ku mutu kuandi; e, wakatubula ne wakamukuma ha mpuhu yandi.

²⁷Yeye wakatua mpala wandi hanshi ku makasa andi, wakahona, mulale hanshi; wakakuma mpala hanshi ku makasa andi, wakalala hanshi; hakakumeye mpala wandi hanshi, yeye wakahonahu mufue.

²⁸Mamu wa Sisela wakadi mutangile ha disoso dia nsubu, udidila ha masoso akadi ha madidishi ne, Dikalu diandi didi dijanguluka musangu mule nunku bualu kai? Nkata ya makalu andi adi ajanguluka bualu kai?

²⁹Bakashi benji ba mudimu wandi ba lungenyi bakamukudimuna dî; yeye mene wakadikudimuina dî,

³⁰wakamba ne, Kabena basangana bintu biakunyengabo kudi bena lukuna, anyi? Kabena babiabanyangana: mushikankunde umue anyi ibidi kudi mulume yonso, bilulu bia mekala mimpe bia kuha Sisela, bilulu bia mekala mimpe bizola, tshilulu tshimpe tshimue anyi bibidi bizola, bia kuela mu nshingu mua mutshimunyi, anyi?

³¹Yehowa, bantu bonso badi nʼebe lukuna bafue nunku; kadi bantu badi bakusue bikale bu diba habandadi ne bukole buadi buonso. Buloha buakadi talalâ bidimu makumi anai.