Read tshiluba Buakabuluibua 3 Bible Online

Buakabuluibua 3 - tshiluba bible

Buakabuluibua 3

¹Fundila muanjelo wa ekelesia wa ku Sâdi ne, Yeye udi ne Nyuma ya Nzambi muanda mutekete ne mitoto muanda mutekete udi wamba malu â ne, Ndi mumanye midimu yebe ne bu mûdi ne dina dia udi ne muoyo, ne udi mufue.

²Wikale mutabale, ujadike bintu bidi bishala, biakamba kufua, bualu bua tshiakasangana midimu yebe mikale miakane tshishiki ku mesu kua Nzambi wanyi.

³Nunku, uvuluke bu muwakuangata ne muwakulua; ulame bûdi nʼabu, ukudimune mutshima webe. Nunku, biwikala kui utabala, nendue bu muibi, ne kuena umanya diba dindi ndua kûdi.

⁴Kadi udi ne mena manya-manya mu Sâdi a bakadi kabai banyanga bilulu biabo; nebende nʼanyi mu bilulu bitoke; bualu bua badi bakanangane bua kuenza nunku.

⁵Udi uhita bukole nealuatshishibue nunku ne bilulu bitoke, ne meme tshiena njimisha dina diandi mu mukanda wa muoyo nasha kakese, ne nenjukule dina diandi ku mpala kua Tatu wanyi, ne ku mpala kua banjelo bandi.

⁶Udi ne matshu unvue budi Nyuma wambila ekelesia.

⁷Fundila muanjelo wa ekelesia wa ku Filadelefia ne, Udi wa tshijila, udi wa bulelela, udi ne luvungula lua Davidi, udi unzulula ne kakuena udi winshila, udi winshila ne kakuena udi unzulula, udi wamba malu â ne,

⁸Ndi mumanye midimu yebe (tangila, nakuteka tshibi tshiunzulula ku mpala kuebe, tshidi mukuabo kai mua kutshinshila) ne, Wewe udi ne bukole bukese, ne wakalama dî dianyi, ne kuakahidia dina dianyi.

⁹Mona, ndi nkuha ba mu nsunagoga wa Satana, ba munkatshi mua badi badiamba ne, Tudi Bena Yuda, ne kabena nunku, kadi badi bashima; mona, nembavuishe bua kuluabo ne bua kukukuilabo ku makasa ebe, ne bua kumanyabo ne nakukusua.

¹⁰Bualu bua wakalama dî dia kutantamana kuanyi, nenkulame kabidi ku diba dia kuteta, diodio didi diamba kulua kudi ba ha buloba bonso, bua kuteta badi bikala ha buloba.

¹¹Ndualua lubilu, ukuate bikole tshiudi nʼatshi, bua muntu kanyengi tshifulu tshiebe tshia butumbi.

¹²Udi uhita bukole, nemuvuishe dikunshi mu ntempelo wa Nzambi wanyi, ne kena uluhukamu kabidi; ne neufunde dina dia Nzambi wanyi hamʼbidi handi, ne dina dia tshimenga tshia Nzambi wanyi, Yelushalema muhia-muhia mene, tshidi tshihueka hanshi, tshifuma mu diulu kudi Nzambi wanyi, ne dina dianyi meme dihia-dihia.

¹³Udi ne matshu unvue budi Nyuma wambila ekelesia.

¹⁴Fundila muanjelo wa ekelesia wa ku Laodikiya ne, Udi Amen, mumanyishi wa kueyemena ne mulelela, tshibangidilu tshia bufuki bua Nzambi ne,

¹⁵Ndi mumanye midimu yebe, ne kuena nasha ku mashika nasha ku kahia. Nakadi kusua ne wikale nasha ku mashika anyi ku kahia.

¹⁶Nunku, bualu bua udi tshiuyuya, kui nasha ku mashika nasha ku kahia, nenkutuile mukana muanyi.

¹⁷Bualu bua udi wamba ne, Ndi mubanshi; ne, Nakuheta biuma; ne, Tshiena nkengela tshintu; ne kuena mumanye ne udi muena dikenga ne mukengedi wa luse, ne muhele ne mufofo ne butaka.

¹⁸Ndi nkulesha lungenyi lua kusumba ngolo kundi udi mulengeshibue mu kahia bua wewe ulue mubanshi, ne bivualu bitoke bua kudiluatshisha nʼabi bua bundu bua butaka buebe kabumueneki, ne buanga bua kulaba ku mesu ebe bua wewe umanye mua kutangila.

¹⁹Bungi bua bandi munange, ndi mbabela, ndi mbakengesha; nunku, wikale ne lukunukunu ne ukudimune mutshima webe.

²⁰Tangila, ndi mudimanyike ku tshibi, ndi nkokelaku. Biunvua muntu dî dianyi, ne udi ungunzuluila tshibi, nembuele kudiye, nendie nʼandi bidia, ne yeye neadie nʼanyi.

²¹Udi uhita bukole nemuhe bua kushikameye nʼanyi mu nkuasa wa butumbi, bu munakatamba bukole ne munakashikama ne Tatu wanyi mu nkuasa wandi wa butumbi.

²²Udi ne matshu unvue budi Nyuma wambila ekelesia.