Read tshiluba Buakabuluibua 9 Bible Online

Buakabuluibua 9 - tshiluba bible

Buakabuluibua 9

¹Muanjelo muitanu wakela mpungi, ne nakamona mutoto mufuma mu diulu muhone ha buloba; ne bakamuha luvungula lua buina bua tshina tshidi katshi ne nshikidilu.

²Ne yeye wakunzulula buina bua tshina tshidi katshi ne nshikidilu; ne muinshi wa ku buina wakahatuka bu muinshi wa tshikutu tshinene; ne diba ne luhehele biakafikishibua ku muinshi wa ku buina.

³Ne mikumbi yakabatuka mu muinshi ha buloba; bakuiha bukole bu mudi tuminyiminyi tua ha buloba ne bukole.

⁴Bakayela mukenshi bua kainyangi mashinde a ha buloba, nasha tshintu tshidi tshiashi, nasha mutshi, kadi bua kunyangai anu bantu badi kabai ne tshimanyishilu tshia Nzambi ha mpala habo.

⁵Ne bukole buakuihebua kembua kubashiha, kadi bua bobo bakengeshibue ngondo itanu, ne dikenga diabo dikole diakadi bu dikenga didi kaminyiminyi kakengesha nʼadi muntu hamusumaku.

⁶Ne mu matuku au bantu nebakebe lufu, ne kabena balusangana nasha kakese; nebasue kufua, ne lufu ludi lubaityema.

⁷Bifuanyikishi bia mikumbi biakadi bu tubalu tulongolola bua nvita; ne ha mitu hai hakadi bu mudi bifulu bia butumbi bifuana ngolo, ne mpala yai yakadi bu mpala ya bantu.

⁸Yakadi ne nsuki bu nsuki ya bakashi, ne menu ai akadi bu menu a nyama wa ntambue.

⁹Ne yakadi ne bibuikilu bia ha tshiadi bu bibuikilu bia tshiamu; ne tshiona tshia mahuahua ai tshiakadi bu tshiona tshia makalu a nvita, tshia tubalu tua bungi hanyematu lubilu bua kuya mu nvita.

¹⁰Yakadi ne mikila bu ya tuminyiminyi, ne tulonda; ne mu mikila yai mudi bukole buai bua kukengesha nʼabu bantu ngondo itanu.

¹¹Idi ne mukelenge ha mutu hai, udi muanjelo wa tshina tshidi katshi ne nshikidilu; dina diandi mu muaku wa Bena Ebelu didi Abadona, ne mu muaku wa Bena Gelika didi Apoluona.

¹²Mulau wa kumudilu wakuhita; tangila, milau ibidi itshidi ilua ku nyima kua malu â.

¹³Ne muanjelo muisambombo wakela mpungi, ne nakunvua dî dia ku nsengu ya tshioshelu tshia ngolo tshidi ku mpala kua Nzambi,

¹⁴mukuabo wamba kudi muanjelo muisambombo, wakadi ne mpungi ne, Sulula banjelo banai badi basuika ku musulu mimene Pelata.

¹⁵Ne banjelo banai bakasuludibua bakadi balongolodibua bua luhola ne dituku ne ngondo ne tshidimu, bua kushiha tshituha tshisatu tshia bantu.

¹⁶Ne bungi bua misumba ya bena nvita ba ha tubalu buakadi mbombo ibidi misangu lubombo; nakunvua bungi buabo.

¹⁷Nunku, nakamona tubalu mu tshikena kumona, ne bakadi bashikama ha nyima hatu, bikala ne bibuikilu bia ha tshiadi bikunzubile, ne bia lubidibidi lua soufre; ne mitu ya tubalu idi bu mitu ya nyama ya ntambue, ne mukana muatu mudi muhatuka kahia ne muinshi ne soufre.

¹⁸Tshituha tshisatu tshia bantu tshiakashihibua ku bihuhu ebi, ku kahia ne ku muinshi ne ku soufre biakadi bihatuka mukana muatu.

¹⁹Bua bukole bua tubalu budi mukana muatu, ne mu mikila yatu; bua mikila yatu idi ifuana nyoka, ne idi ne mitu; ne tudi tukengesha nʼai bantu.

²⁰Ne bantu bonso bakuabo bakashala kabai bashihibue mu bihuhu ebi, kabakakudimuna mitshima yabo bua midimu ya bianza biabo, bua kabakukuidi bademon, ne mpingu ya ngolo ne ya argent ne ya tshiamu tshia mitaku ne ya dibue ne ya mitshi, idi kayi mimanye mua kutangila, anyi kunvua, anyi kuenda;

²¹ne kabakakudimuna mitshima yabo bua mashihangana abo, nasha bua muhongo wabo, nasha bua masandi abo, nasha bua buibi buabo.