Read tshiluba 1 Samuele 11 Bible Online

1 Samuele 11 - tshiluba bible

1 Samuele 11

¹Nahasha, Muena Amona, wakalua, wakasa tshitudilu bua kuluangana ne musoko wa Yabesha-gilada: bantu bonso ba mu Yabesha bakatumina Nahasha dî ne, Uhunge nʼetu tshihungidi, neakukuatshile mudimu.

²Nahasha, Muena Amona, wakabambila ne, Netuhunge nʼenu dî ku bualu ebu ne buonso buenu nutule mesu enu a ku bianza bia balume: bualu ebu nebuikale bu kusamina kua Bena Isalele bonso.

³Bakulu ba mu Yabesha bakamuambila ne, Utuheshe matuku muanda mutekete bua tuetu kutuma bamessager ku nseke yonso ya Isalele; nunku bikala kakuyi muntu wa kutusungila, netulue kudi.

⁴Hashishe ba-messager bakalua kudi Shaula ku Gibea, bakamba mei au onso mu matshu a bantu: bantu bonso bakabisha mei abo, bakadila.

⁵Shaula wakafuma ku budimi, wenda ulonda ngombe, wakakonka ne, Bantu badi badidila tshinyi? Bakamuambila mei onso akabambila Bena Yabesha.

⁶Hakunvua Shaula mei â, Nyuma wa Nzambi wakamutulukila bikole, ne tshiji tshiandi tshiakatema bikole.

⁷Wakangata ngombe ibidi yakadi ku mutshi wa tshikokedi, wakayisaya munyinyi, wakayituma mu bianza bia miloho ei ku matshika onso a Isalele, Wamba ne, Yonso udi kayi ulonda Shaula ne Samuele, nebenzele ngombe yandi nunku. Ditshina dia Yehowa diakakuata bantu bonso, bakaluhuka diatshimue.

⁸Yeye wakababala mu Bezeke: Bena Isalele bakadi binunu nkama isatu, ne Bena Yuda bakadi binunu makumi asatu.

⁹Bakambila miloho yakalua kudibo ne, Nuambile Bena Yabesha-gilada nunku ne, Makelela hafika diba munda munya, nuenu nenusungidibue. Miloho yakalua, yakambila Bena Yabesha dî edi, ne bobo bakasanka.

¹⁰Bena Yabesha bakambila Nahasha ne, Makelela netulue kûdi, neubenzele muonso ûdi umona ne mbimpe.

¹¹Hakatshiabu, Shaula wakatahulula bantu mu bisumbu bisatu; bakafika ku tshitudilu dinda dionso, bakashiha Bena Amona tô ne ku munda munya; bakadi bashala ne muoyo bakamuangalaka, nansha bantu babidi bakashala kaba kamue.

¹²Bena Isalele bakakonka Samuele ne, Nganyi wakamba ne, Shaula neatukokeshe? Lua ne bantu aba, tubashihe.

¹³Shaula wakamba ne, Kabena bashiha muntu lelu, bualu bua Yehowa wakamenesha luhandu luandi mu Isalele.

¹⁴Samuele wakambila bantu ne, Luai, tuye ku Gilegala, netujadikileku bukelenge.

¹⁵Bantu bonso bakaya ku Gilegala: bakasungula Shaula mukelenge ku mpala kua Yehowa mu Gilegala; bakafilaku milambu idi ivuisha bantu ditalala ku mpala kua Yehowa; Shaula ne Bena Isalele bonso bakatamba kusankaku.