Read tshiluba 1 Samuele 18 Bible Online

1 Samuele 18 - tshiluba bible

1 Samuele 18

¹Hakamana Davidi kuyikilangana ne Shaula, mutshima wa Yonatana wakakuatakana ne mutshima wa Davidi; Yonatana wakamunanga bu mutshima wandi mene.

²Shaula wakamuangata dituku adi, kakitabusha bua yeye ahingane ku nsubu wa tatu wandi kabidi.

³Hashishe Yonatana ne Davidi bakahungakasha tshihungidi, bualu bua yeye wakamunanga bu mutshima wandi mene.

⁴Yonatana wakavula tshilulu tshiandi tshiakadiye muluate, wakatshiha Davidi; wakamuha muele wandi wa nvita ne buta buandi ne mukaba wandi kabidi.

⁵Davidi wakaya mu miaba yonso yakamutuma Shaula, wakadilama bu muena lungenyi; Shaula wakamuteka ku mutu kua bena nvita bandi: bualu ebu buakadi buimpe ku mesu kua bantu bonso ne ku mesu kua bahika ba Shaula kabidi.

⁶Mu matuku au kakahingana Davidi kuakashiheye Muena Peleshete, bakashi bakaluhuka mu misoko yonso ya Bena Isalele bua kusambakenabo ne mukelenge Shaula, bakadi bimba misambu, bakadi baja maja, bakadi ne makasa ne bintu bikuabo bia kuimba nʼabi misambu, bakadi ne disanka dinene.

⁷Bakashi bakimba, bambilangane ne, Shaula wakashiha binunu bia bantu, Davidi wakashiha binunu makumi bia bantu.

⁸Shaula wakadi ne tshiji tshikole; bualu ebu biuakanyingalasha mutshima wandi. Yeye wakamba ne, Bakutumbisha Davidi bua binunu makumi bia bantu, kadi bakuntumbisha meme anu bua binunu bia bantu. Tshinyi tshikuabo tshidiye mua kuangata, anu bukelenge nansha?

⁹Shaula wakabanga kuteka mesu andi kudi Davidi ku dituku adi.

¹⁰Hakatshiabu nyuma mubi mulume kudi Nzambi wakatulukila Shaula bikole, yeye wakalubakana mu nsubu muandi; Davidi watamba tshisanji ne tshianza tshiandi bu muakadiye wenza ku dituku ku dituku. Shaula wakadi ne difuma mu tshianza tshiandi.

¹¹Shaula wakela difuma diandi; bualu bua wakamba ne, Neushihe Davidi, difuma dimusompoke dikuate ku tshimanu tshia nsubu. Kadi Davidi wakahanduka ku mesu kuandi misangu ibidi.

¹²Shaula wakadi utshina Davidi bualu bua Yehowa wakadi nʼandi, ne wakadi mumuke kudi Shaula.

¹³Nunku Shaula wakamûmusha kudiye, wakamuteka kapitene ka tshinunu tshia bantu; yeye wakaya ne wakalua ku mpala kua bantu.

¹⁴Davidi wakadilama bu muena lungenyi mu nshila yandi yonso; Yehowa wakadi nʼandi.

¹⁵Hakatangila Shaula ne yeye wakadilama bikole bu muena lungenyi, buowa buakamukuata bualu buandi.

¹⁶Kadi Bena Isalele bonso ne Bena Yuda bakananga Davidi, bualu bua yeye wakaya ne wakalua ku mpala kuabo.

¹⁷Shaula wakambila Davidi ne, Mona, muanʼanyi muanʼa bute wa bakashi, Melaba, nenkuheye bua ikale mukashi webe; kadi wewe wikale ne dikima dia kuluila Yehowa nvita yandi. Bualu bua Shaula wakamba ne, Tshiena musue kumulenga tshianza, kadi Bena Peleshete bamulenge bianza.

¹⁸Davidi wakambila Shaula ne, Meme ndi nganyi, ne muoyo wanyi udi tshinyi, ne ba mu nsubu wa tatu wanyi badi banganyi mu Isalele bua meme kuikala muku wa mukelenge?

¹⁹Kadi hakalua dituku diakasungulabo bua kufila Melaba, muana wa bakashi wa Shaula, kudi Davidi bu mukashi wandi, bakamuha kudi Adaliele, Muena Meholata, bu mukashi wandi.

²⁰Kadi Mikala, muana wa bakashi wa Shaula, wakananga Davidi; bakambila Shaula, ne bualu ebu buakamusankisha.

²¹Shaula wakamba ne, Nemmufile kudiye bua yeye ikale bu buteyi kudiye ne bianza bia Bena Peleshete nebikale hamʼbidi handi. Nunku Shaula wakambila Davidi ne, Wewe newikale muku wanyi lelu musangu muibidi.

²²Shaula wakambila bahika bandi ne, Nuenu nuyikile ne Davidi mu musokoko, numuambile ne, Mona, mukelenge udi utamba kusanka bualu buebe ne bahika bandi bonso badi bakunanga; nunku witabushe bua kuikala muku wa mukelenge.

²³Bahika ba Shaula bakamba mei au mu matshu a Davidi. Davidi wakakonka ne, Bualu ebu bua kuikala muku wa mukelenge budi bumueneka kunudi bu bualu bukese, anyi? Bualu bua meme ndi muntu muhele, ne tshiena ne butumbi.

²⁴Bahika ba Shaula bakamumanyisha ne, Davidi wakadi wamba nunku.

²⁵Shaula wakamba ne, Nuambile Davidi ne, Mukelenge kena ukeba biuma bia dibaka anu tukoba tua Bena Peleshete lukama: bua kusombuela bena lukuna ba mukelenge. Shaula wakadi wela meji munda muandi bua kushihesheye Davidi ku bianza bia Bena Peleshete.

²⁶Hakadi bahika bambila Davidi mei â, mutshima wandi wakatamba kusanka bua kuikala muku wa mukelenge. Matuku kâkanza kuleha,

²⁷Davidi wakajuka ne bantu bandi, bakashiha Bena Peleshete nkama ibidi; Davidi wakalua ne tukoba, wakafila buonso buatu kudi mukelenge bua kuikaleye muku wa mukelenge. Shaula wakamuha Mikala, muanʼandi wa bakashi, bu mukashi wandi.

²⁸Shaula wakatangila, wakajingulula ne Yehowa wakadi ne Davidi; Mikala, muana mukashi wa Shaula, wakamunanga.

²⁹Shaula wakatamba kutshina Davidi; Shaula wakadi muena lukuna wa Davidi matuku onso.

³⁰Hashishe baminyampala ba Bena Peleshete bakatambakana; ne hakadibo benza nunku, Davidi wakahita bahika bonso ba Shaula kudilama bu muena lungenyi; nunku dina diandi diakatamba kutumbishibua.