Read tshiluba 1 Samuele 26 Bible Online

1 Samuele 26 - tshiluba bible

1 Samuele 26

¹Bena Zifa bakalua kudi Shaula mu Gibea, bakamuambila ne, Davidi kena usokoma mu mukuna wa Hakila udi ku mpala kua tshihela, anyi?

²Hashishe Shaula wakabika, wakahueka ku tshihela tshia Zifa, wakadi ne bantu binunu bisatu bakasunguleye munkatshi mua Bena Isalele, bua kukebeye Davidi mu tshihela tshia Zifa.

³Shaula wakasa tshitudilu tshiandi mu nshila wa ku mukuna wa Hakila udi ku mpala kua tshihela. Kadi Davidi wakashikama mu tshihela; yeye wakatangila Shaula ulua, umulonda mu tshihela.

⁴Davidi wakatuma batentekedi, wakajingulula ne bulelela, Shaula wakalua.

⁵Davidi wakajuka, wakalua ku muaba wakadi Shaula mutule; Davidi wakatangila muaba wakadi Shaula mulale ne Abinê, muana wa Ne, kapitene ka masalayi andi, Shaula wakadi mulale munkatshi mua makalu ne bantu bandi bakadi bamunyunguluka.

⁶Hashishe Davidi wakebesha Ahimeleke, Muena Hiti, ne Abishai, muana wa Seluya, muanʼabo ne Yoaba, ne, Udi musue kuhueka nʼanyi kudi Shaula mu tshitudilu tshiandi nganyi? Abishai wakamuambila ne, Meme nenye nʼebe.

⁷Nunku Davidi ne Abishai bakafika kudi bantu ba Shaula butuku; monai, Shaula wakadi mulale tulu munkatshi mua makalu ne difuma diandi dishimika hanshi ku mutu wandi; Abinê ne bantu bonso bakadi balala, bamunyunguluka.

⁸Hashishe Abishai wakambila Davidi ne, Nzambi wakafila muena lukuna webe mu tshianza tshiebe lelu; ndi nkusengelela ne, Witabushe bua meme kumudia ne difuma diandi, dimusompoke kabidi anu tshikondo tshimue, tshiena mmutua tshikondo tshibidi.

⁹Davidi wakambila Abishai ne, Kumushihi nansha; udi mua kulenga muntu wakela Yehowa manyi ha mutu ne kubinga nganyi?

¹⁰Davidi wakamba ne, Bu mudi Yehowa ne muoyo, Yehowa nkayandi neamushihe; dituku diandi dia lufu nedilue anyi yeye neaye mu nvita, neafue.

¹¹Yehowa ankande bua tshilengi muntu wakela Yehowa manyi ha mutu tshianza; kadi ndi nkusengelela ne, Wangate difuma didi ku mutu wandi ne mulondo wandi wa mai, tuye.

¹²Nunku Davidi wakangata mulondo wa mai ne difuma diakadi ku mutu wa Shaula, bakaya. Nansha muntu waka batangila anyi wakamanya bualu ebu; nansha muntu wakabika ku tulu, bualu bua buonso buabo bakadi balale tulu bualu bua tulu tua kashendenda difume kudi Yehowa biaka bakuata.

¹³Hashishe Davidi wakaya ku luseke lukuabo, wakimana ba mutu ha mukuna mule, muaba munene wakadi mushale hankatshi habo.

¹⁴Davidi wakela dî kudi bantu ne kudi Abinê, muana wa Nê, wakabakonka ne, Wewe Abinê, kuena witaba, anyi? Hashishe Abinê wakamukudimuna dî ne, Udi wela mukelenge dî nganyi?

¹⁵Davidi wakambila Abinê ne, Kuena muntu wa bukitu, anyi? Muntu kai udi bu wewe munkatshi mua Bena Isalele? Bualu kai wewe kuena ulama mukelenge webe? Bualu bua muntu wakalua kunudi aku bua kushiheye mukelenge webe.

¹⁶Bualu ebu buwakenza kabuena buakane. Bu mudi Yehowa ne muoyo bûdi nʼabu mbua kufua, bualu bua wewe kuakulama mukelenge webe udi muela manyi ha mutu kudi Yehowa. Tangila kudi difuma dia mukelenge ne mulondo wa mai biakadi ku mutu wandi.

¹⁷Shaula wakamanya dî dia Davidi, wakakonka ne, Edi ndî diebe, muanʼanyi Davidi, anyi? Davidi wakamukudimuna ne, Edi ndî dianyi, mukelenge wanyi.

¹⁸Davidi wakakonka ne, Mukelenge wanyi udi ulonda muntu wandi bua tshinyi? Nakuenza tshinyi? Bualu bubi kai budi mu tshianza tshianyi?

¹⁹Katataka ndî nkusengelela ne, Mukelenge wanyi unvue mei a muntu wandi. Bikala Yehowa nguakakusonsolola bualu buanyi, yeye itabushe mulambu; kadi bikala bantu mbakenza nunku, bobo bedibue mulau kudi Yehowa, bualu bua bobo bakungihata lelu bua meme tshikadi mu buhianyi bua Yehowa, badi bangambila ne, Ya, ukuatshile nzambi mikuabo mudimu.

²⁰Nunku kitabushi bua mashi anyi kumatau hanshi ha buloba anu ku mesu kua Yehowa; bualu bua mukelenge wa Isalele wakalua bua kukeba mukenya bu mudi muntu ukeba nkuadi mu mikuna.

²¹Hashishe Shaula wakamba ne, Nakuenza bibi; hingana, muanʼanyi Davidi, bualu bua tshiena nkuenzela bibi tshikondo tshikuabo, bualu bua muoyo wanyi wakadi bu tshintu tshia mushinga mukole ku mesu kuebe lelu; mona, nakuenza bu muntu muhote, nakutamba kuhambuka.

²²Davidi wakamba ne, Mukelenge, tangila difuma; umue wa bantu bebe alue bua kudiangata.

²³Yehowa neafute muntu yonso bu mudi buimpe buandi ne lulamatu luandi lua ku bushuwa; bualu bua Yehowa wakakufila mu tshianza tshianyi lelu ne meme tshiakitabusha bua kulenga muntu wakela Yehowa manyi ha mutu tshianza.

²⁴Nunku mona, bu muakadi muoyo webe bu tshintu tshia mushinga mukole ku mesu kuanyi lelu, muoyo wanyi wikale bu tshintu tshia mushinga mukole ku mesu kua Yehowa, yeye ansungile mu makenga onso.

²⁵Hashishe Shaula wakambila Davidi ne, Wewe, muanʼanyi Davidi, usankishibue! wewe newenze malu manene, neutambe bulelela. Nunku Davidi wakaya mu nshila wandi, ne Shaula wakahingana ku muaba wandi.