Read tshiluba 1 Samuele 27 Bible Online

1 Samuele 27 - tshiluba bible

1 Samuele 27

¹Davidi wakamba mu mutshima wandi ne, Meme nenfue dituku dikuabo ku tshianza tshia Shaula; kakuena bualu budi butamba buimpe kundi bu mudi kunyemena mu buloba bua Bena Peleshete; Shaula neahange kunkeba mu matshika a buloba bua Isalele, nunku nempanduke mu tshianza tshiandi.

²Davidi wakajuka ne bantu bakadi nʼandi, nkama isambombo, bakaya kudi Akisha, muana wa Maoka, mukelenge wa mu Gata.

³Davidi wakashikama ne Akisha mu Gata, yeye ne bantu bandi, muntu ne muntu ne ba mu nsubu wandi, ne Davidi ne bakashi bandi babidi, Abinoama, Muena Yizelele, ne Abigayila, muena Kâmele, wakadi mukashi wa Nabala.

⁴Bakambila Shaula ne, Davidi wakanyemena mu Gata; yeye kakamukebulula kabidi.

⁵Davidi wakambila Akisha ne, Binasangana luse ku mesu kuebe, witabushe bampe muaba mu musoko mukuabo mu buloba buebe, bua meme kushikamamu; muhika webe udi ushikama nʼebe hohamue mu tshimenga tshia mukelenge bualu kai?

⁶Nunku Akisha wakamuha musoko wa Sikelaga dituku adi; nunku musoko wa Sikelaga udi ulamata kudi bukelenge ba Yuda tô ne ku dituku edi.

⁷Matuku onso akashikama Davidi mu buloba bua Bena Peleshete akadi tshidimu tshijima ne ngondo mai.

⁸Davidi ne bantu bandi bakaya, bakahaula bintu bia Bena Geshû ne Bena Gêze ne Bena Amaleka: aba bakadi bena buloba ba diambedi, bakadi bashikama mu nshila udi uya ku Shû tô ne ku buloba bua Ejipitu.

⁹Davidi wakabutula misoko ei, kakashiya nansha mulume nansha mukashi ne muoyo; wakaya ne mikoko ne ngombe ne nyama ya mpunda ne tumelo ne bilulu biabo, wakahingana kudi Akisha.

¹⁰Akisha wakamba ne, Wakuhaula bena nganyi lelu eu? Davidi wakamukudimuna ne, Tuakuya ku luseke lua ku Sude lua Yuda ne lua Bena Yelamele ne lua Bena Keni.

¹¹Davidi kakashiya nansha mulume nansha mukashi ne muoyo bua kulueye nʼabo ku Gata; kakasua bobo baye ne lumu ne, Davidi Wakenza nunku ne yeye nênze nunku to matuku onso adiye mushikame mu buloba bua Bena Peleshete.

¹²Akisha wakitabusha mei onso akamuambila Davidi; yeye wakamba ne, Davidi wakavuisha Bena Isalele, bantu bandi, bua bobo bamulengulule, nunku yeye neikale muhika wanyi tshiendelele.