Read tshwa Genesisi 13 Bible Online

Genesisi 13 - tshwa bible

Genesisi 13

¹Na Abrama i lo huma Gipite a tlhelela Dzongeni zinwe ni sati wakwe, ni zontlhe lezi a nga hi nazo, zinwe na Loti.

²Na Abrama i wa fumile nguvu hi tihomu, ni siliva, ni nzalama.

³I lo famba hi ku gova, a tsemakanya le Dzongeni, kala a chikela le Beteli, wutshanwini lego ku nga wa hi ni tenda gakwe kusanguleni, xikari ka Beteli ni Ai;

⁴a wutshanwini ga alati legi a nga wa gi mahile kusanguleni, laho i lo khongela a vitweni ga Jehova.

⁵Yenawu Loti loyi a nga wa famba na Abrama, i wa hi ni tiyivu ni tihomu ni matenda.

⁶Ni tiko gi wa nga va eneli a kuva va tshama wutshamu ginwe; hakuva va wa fuyile nguvu, va wa nga zi koti ku tshama wutshamu ginwe.

⁷Ku wa hi kona maguwa xikari ka varisi va tihomu ta Abrama, ni varisi va tihomu ta Loti; a maKanani ni maPerezi va wa akile lomu tikweni xikhatini lexo.

⁸Abrama aku ngalo ka Loti: Ngha ku nga hi kona maguwa xikari ka mina na wena, ni xikari ka varisi va mina ni varisi va wena, hakuva hi vamakabye.

⁹A tiko gontlhe a gi kona mahlweni ka wena ke? Tsawukana na mina; loku uya canjeni ga xibhabha, mina nzi taya ka canja ga xinene; ni loku uya ka ga xinene, mina nzi taya ka ga xibhabha.

¹⁰Loti i lo tlakusa a mahlo yakwe, i lo wona a mikova yontlhe ya Jordani, hakuva yi wa hi ni mati yontlhe (Jehova i wa nga se lovisa Sodoma ni Gomora), na yona yi wa ku khwatsi i simu ga Jehova kotisa a tiko ga le Gipite, kala ku chikela Zoare.

¹¹Na Loti i lo hlawula mikova yontlhe ya Jordani. Loti i lo suka aya Mutsuwuka-gambo; va hambana.

¹²Abrama i lo tshama tikweni ga le Kanani; Loti i lo tshama mitini ya le mikoveni, i lo yimisa a tenda gakwe hi le Sodoma.

¹³Kanilezi a vanhu va le Sodoma va wa bihile, va wa onha nguvu mahlweni ka Jehova.

¹⁴Na Jehova aku ngalo ka Abrama, anzhako ka kuva Loti a hambene naye: Hi nga tlakusa a mahlo ya wena u yima hikwalaho u nga kona, u cuwuka Nwalungu ni Dzongeni, ni le Mutsuwuka-gambo ni Muhlwa-gambo;

¹⁵hakuva a tiko gontlhe legi u gi wonako, nzi ta gi nyika ka wena ni pswalo wa wena kala kupinzuka.

¹⁶Nzi ta maha a pswalo wa wena kota a tshuri wa misava; loku munhu a zi kota ku hlaya a tshuri wa misava, a nga hlaya ni pswalo wa wena.

¹⁷Suka u famba u tsemakanya tiko, a kunavalata ka gona ni kuanama ka gona, hakuva hi gona nzi to ku nyika.

¹⁸Na Abrama i lo suka, i lota aka mikuhlwini ya le Mamre le Hebroni; laho i lo aka a alati ga Jehova.