Read tshwa Genesisi 14 Bible Online

Genesisi 14 - tshwa bible

Genesisi 14

¹A masikwini ya Amrafeli a hosi ya le Xinari, na Arioka a hosi ya le Elasare, na Kedorlaomeri a hosi ya le Elami, na Tidali a hosi ya le Goime,

²va lolwa na Bera a hosi ya le Sodoma, na Birxa a hosi ya le Gomora, na Xinabi a hosi ya le Adma, na Xemebere a hosi ya le Zeboime, na yona a hosi ya le Bela, va nge hi Zoare.

³Lava vontlhe va lo tlhangana le mikoveni ya le Sidime (kwaleyo Bimbini ga Munyu).

⁴Khume ni mambiri malembe na va khozela Kedorlaomeri, hi lembe ga wu 13 va lo hluwuka.

⁵Hi lembe ga wu 14 i lota Kedorlaomeri ni tihosi leti a nga wa hi nato, a ta hlasela Refaime le Axterote-Karanaine, na Zuzima le Hamu, ni vaEmime le Xave-Kiriataime,

⁶ni maHirote le xitsungeni xabye Seire, ku kala ku chikela Elparani, ku nga le xiwuleni.

⁷Va lo tlhela va wuya Enmixpate, va nge hi Kedexe, va lo ta hlasela a tiko gontlhe ga maAmaleki, ni maAmori laya ma nga wa akile le Hazezon-Tamari.

⁸Ku lo huma a hosi ya le Sodoma, ni hosi ya le Gomora, ni hosi ya le Adma, ni hosi ya le Zoboime, ni hosi ya le Bela, ku nga Zoare; va lo hloma valwa navo le livaleni la Sidime;

⁹va lolwa na Kedorlaomeri a hosi ya le Elame, na Tidale a hosi ya le Goime, na Amrafeli a hosi ya le Xinari, na Arioka a hosi ya le Elasare; mune wa tihosi tilwa ni ntlhanu.

¹⁰Makunu a tivala ta le Sidime ti wa hi ni minkele ni marope. A tihosi ta le Sodoma ni Gomora ti lo tsutsuma ti wela lomo; a vanwani va lo tsutsumela xitsungeni.

¹¹Va lo teka yontlhe a tshomba ya Sodoma ni Gomora, ni kuga kabye kontlhe, va famba.

¹²Va lo teka na Loti a nʼwana wa makabye wa Abrama, loyi a nga wa akile le Sodoma, ni tshomba yakwe, va famba.

¹³A munwe loyi a nga wa ponile i lo ta bikela Abrama, a muHeberu; hakuva i wa tshama mikuhlwini ya Mamre, a muAmori, makabye wa Exkole na Aneri; lavo va wa zwanana na Abrama.

¹⁴Laha Abrama a nga wa zwile ku ngalo a xaka gakwe gi khomilwe, i lo hlomisa a tinhenha takwe leti ti belekelweko ndlwini yakwe, va wa hi 318 wa vavanuna, i lo va lanza kala a chikela le Dani.

¹⁵I lo avanyisa a vanhu vakwe, i lolwa navo ni wusiku, i lo va hlula, i lo va hlongolisa kala va chikela le Hoba, gi nga xibhabheni xa Damasku.

¹⁶I lo teka a tshomba yontlhe, i lo tlhelisa na Loti xaka gakwe, ni vavasati ni vanhu.

¹⁷Hi nzhako ka kuwuya kakwe hi le koya hlasela Kedorlaomeri ni tihosi leti a nga wa hi nato, ku lo huma a hosi ya le Sodoma a ku mu khinga le livaleni la le Xeva, li nga Livala la hosi.

¹⁸Melkizedeki a hosi ya le Salema, i lo neha a kuga ni vinya, i wa hi mupristi wa Nungungulu wa le Hehlahehla. [27]

¹⁹I lo mu katekisa, aku: A katekiswe Abrama hi Nungungulu a nga Hehla-hehla, a nwinyi wa tilo ni misava.

²⁰A khesiwe Nungungulu a nga Hehla-hehla, a nga nyikela valala va wena mandleni ya wena. Na Abrama i lo mu nyika za wukhume ka zontlhe.

²¹A hosi ya le Sodoma yi te ngalo ka Abrama: Nzi nyike a vanhu, wena u teka a tshomba yontlhe.

²²Na Abrama i te ngalo ka hosi ya le Sodoma: Nzi tlakusile a canja ga mina ka Jehova, Nungungulu a nga Hehla-hehla, a nwinyi wa tilo ni misava,

²³lezaku nzi nga ta teka hambu ni lihinza, ge hambu ni lingoti la xilato, nzi nga ta teka nchumu ka zontlhe lezi zi nga za wena, ku nga taku u wula uku: Nzi mu fumisile Abrama.

²⁴Saseka zalezi zi gilweko hi majaha, ni za ku nyika a vanhu lava va nga famba zinwe na mina; Aneri, na Exkole, na Mamre; lavo a va teke a xiavelo xabye.