Read tshwa Genesisi 16 Bible Online

Genesisi 16 - tshwa bible

Genesisi 16

¹Makunu Sarai a sati wa Abrama i wa nga mu pswalelangi na nʼwana. Na yena i wa hi ni nanza gakwe ga xisati ga muGipite, a vito gakwe hi Hagari.

²Na Sarai aku ngalo ka Abrama: Languta, makunu Jehova i nzi beletele ku beleka; enghena ka gona a nanza legi ga mina ga xisati; kutani nzi ta kuma nʼwana hi ka yena. Abrama i lo ingisa a gezu ga Sarai.

³Sarai, a sati wa Abrama, i lo teka Hagari a muGipite a nanza gakwe ga xisati, i lo gi nyikela ka Abrama a nuna wakwe, akuva sati wakwe, laha Abrama na a akile lomo Kanani a khume ga malembe.

⁴I lo enghena ka Hagari, i lo xura nyimba; ni laha a nga wona lezaku i xurile nyimba, i lo kanyisa a muzinza wakwe.

⁵Sarai aku ngalo ka Abrama: A kuxaniseka ka mina a kuve ka wena; nzi ku nyikile a nanza ga mina ga xisati xifuveni xa wena; lezi a wonako ku ngalo i xure nyimba nzo soleka mina mahlweni kakwe; ngha Jehova a lamula xikari ka mina na wena.

⁶Abrama aku ngalo ka Sarai: Languta, a nanza ga wena ga xisati gi le mandleni ya wena; maha ka gona lezi u zi ranzako. Zonake Sarai i lo mu khoma hi timbiti, ni nanza gi lo tsutsuma mahlweni kakwe.

⁷A ngelosi ya Jehova yi lo mu kuma le hlobyeni ya mati lomu xiwuleni, hi laha hlobyeni ya ndlela ya kuya le Xure.

⁸Yi te ngalo ka Hagari, a nanza ga xisati ga Sarai: Uta hi kwihi? Uya kwihi? Yena aku ngalo: Nzo chava mahlweni ka muzinza wa mina Sarai.

⁹A ngelosi ya Jehova yi te ngalo ka yena: Tlhelela ka muzinza wa wena, u ya ti koramisa mahlweni kakwe.

¹⁰A ngelosi ya Jehova yi te ngalo kakwe: Nzi ta anzisa nguvu a pswalo wa wena, cima wu nga ta hlayiwa hi wunyingi.

¹¹A ngelosi ya Jehova yi te ngalo ka yena: Languta, u xure nyimba, u ta beleka nisanyana, u ta chula vito gakwe ku hi Ixmaeli; hakuva Jehova i zwile a kuxaniseka ka wena.

¹²Yena i ta kuva mangwa, a canja gakwe gi ta vukela vontlhe; ni canja ga vontlhe gi ta vukela yena; na yena i ta aka xikari ka vamakabye vakwe.

¹³Zonake i lo chula a vito ga Jehova loyi a wulawulileko naye aku Nungungulu loyi a Wonako; hakuva i te ngalo: Hakunene nzi wonile loyi a nzi wonako ke?

¹⁴Hilezo a hlowo leyo yi lo vitanwa ku ngalo hi Beer-lahairoi; yi kona xikari ka Xadeki na Beredi.

¹⁵Hagari i lo pswalela Abrama a nisanyana; Abrama i lo chula vito ga nisanyana wakwe, loyi Hagari a nga mu belekela, ku ngalo hi Ixmaeli.

¹⁶Abrama i wa hi ni 86 wa malembe, a xikhati lexo Hagari a nga mu pswalela Ixmaeli.