Read tshwa Genesisi 18 Bible Online

Genesisi 18 - tshwa bible

Genesisi 18

¹Jehova i lo woneka ka yena le mikuhlwini ya le Mamre; khwatsi hilezi a nga wa tshamile laha nyangweni ya tenda gakwe laha munwini.

²I lo tlakusa a mahlo yakwe i lo cuwuka; languta, madota manharu ma wa yimile kusuhani kakwe, ni laha a nga va wona i lo suka hi laha nyangweni ya tenda a tsutsuma ku va khinga, i lo korama, [33]

³aku ngalo: Hosi yanga, loku nzi kumile thomo mahlweni ka wena u nga hunzi a nanza ga wena.

⁴Nzi ta neha a mati ma tsongwani, mu hlamba mikonzo ya nwina, mu humula lahasi ka sinya.

⁵Nzi ta neha xikhenwana xa xibaba, mu tiyisa a ntamu wa nwina; zonake mu ta hunza, kota lezi mu chikeleko ka nanza ga nwina. Vona va te ngalo: Hi zona, maha kota lezi u wulileko.

⁶Abrahama i lo hatlisa kuya ka Sara lomu ndlwini, a yaku ngalo: Hatlisa u hakasela ziringaniso zinharu za mapa, u maha zibaba.

⁷Abrahama i lo tsutsuma aya ntlhambini a ya gula a role go Olovana go saseka, i lo nyika nanza; a hatlisa a gi sasisa.

⁸I lo teka mawomba ni masi, ni role legi a nga wa gi sasisile, i lo zi veka mahlweni kabye; i lo yima mahlweni kabye laha hasi ka sinya, va loga.

⁹Vona va te ngalo kakwe: I kwihi Sara sati wa wena ke? Yena aku ngalo: I lomu ndlwini.

¹⁰Yena i te ngalo kakwe: Hizinene nzi ta wuya ka wena ha nwakani; languta, Sara a sati wa wena i tava ni nisanyana. Sara i lo zizwa na hi laha nyangweni ya yindlu yi nga hi nzhako kakwe.

¹¹Makunu Abrahama na Sara va wa hi vakale, va wa khosahele, ku wa khawule ka Sara a mukhuwo wa vavasati.

¹²Sara i lo hleka lomu mbilwini yakwe, aku: Lezi makunu nzi khosaheleko nza ha tava ni kunengela xana? Ni hosi ya mina yi khosahele kambe. [34]

¹³Jehova i te ngalo ka Abrahama: O hlekela yini Sara, lezo a nge ngalo, Nweno nza ha ta kuma nwanana na nzi khosahele xana?

¹⁴Kasi xi kona xilo xi tsanzako Jehova ke? Hi xikhati xi yimisilweko nzi ta Wuya kambe ka wena ha nwakani, Sara i tava ni nwanana. [35]

¹⁵Zonake Sara i lo kaneta aku: A nzi hlekangi; hakuva i wa chava. Kanilezi yena aku ngalo: Futsi, u hlekile.

¹⁶Ni madota ma lo suka ma komama Sodoma. Abrahama i lo famba navo a va heleketa.

¹⁷Jehova i te ngalo: Nzi ta fihlela Abrahama lezi nzi ta nga zi maha ke?

¹⁸Lezo Abrahama a ta ngava tiko ga hombe ga ntamu hakunene, a matiko wontihe ya misava ma ta katekiswa hi yena. [36]

¹⁹Hakuva nzi mu hlawulile lezaku i ta laya a vanana vakwe, ni ngango wakwe a nzhako kakwe, kasi va hlayisa a ndlela ya Jehova, va maha kululama ni zinene; kala Jehova a mu nyika lezi a mu tsumbisileko zona.

²⁰Jehova i te ngalo: Kota lezi a huwa ga le Sodoma na Gomora gi nga ga hombe, ni lezaku a zionho zabye za tshisa;

²¹nzi ta relela nzi ya wona lezaku hakunene va mahile zontlhe kota lezi a kurila ku chikeleko ka mina; ni loku zi nga hi lezo, nzi ta ya zi tiva.

²²Ni madota ma lo fulara ma komama Sodoma; Abrahama i wa ha yimile mahlweni ka Jehova.

²³Abrahama i lo tshinela kusuhani i te ngalo: U ta lovisa a valulamileko ni vangalulamangiko ke?

²⁴Xana loku va hi kona xikari ka muti a 50 wa valulamileko, hakunene u ta wu lovisa, u nga tsetseleli wutshamu hi kota ya valulamileko lavo va 50 xikari kabye ke?

²⁵Ngha lezo zi nga hi ka wena a ku maha lezo, a ku lovisa valulamileko ni vangalulamangiko. A mulamuli wa tiko a nga ta tsema timhaka hi nongameto ke?

²⁶Jehova i te ngalo: Loku nzi kuma le Sodoma a 50 wa valulamileko xikari ka muti, nzi ta tsetselela a wutshamu, lego hi kota ya vona lavo.

²⁷Abrahama i lo hlamula, aku ngalo: Languta, makunu nzi tiyile ku wulawula ni Hosi ya mina, mina loyi nzi nga tshuri ni khuma.

²⁸Kutani ku ta vumaleka a ntlhanu xikari ka lavo va lulamileko va 56; wena u ta lovisa a muti wontihe hi kuvumaleka ka vantlhanu ke? Yena aku ngalo: Nzi nga ta wu lovisa, loku nzi kuma kona a 45.

²⁹I lo engeta a wulawula naye kambe, aku: Ahati loku ku kumiwa lomo va 40? Aku ngalo: Nzi nga ta maha nchumu hi kota ya lavo va 40.

³⁰Yena i te ngalo: Ngha Hosi ya mina yi nga zangari, loku nzi engeta ku wulawula: Ahati loku ku kumiwa lomo 30? Yena i te ngalo: Nzi nga ta maha nchumu loku nzi kuma 30.

³¹I te ngalo: Languta, nzi tiyile ku wulawula ni Hosi: Kutani loku ku kumiwa 20? Yena i te ngalo: Nzi nga ta wu lovisa hi kota ya va 20.

³²Yena i te ngalo: Ngha a Hosi ya mina yi nga zangari, nzi ta wulawula khatiginwe basi: Ahati loku ku kumiwa a va khume? Nzi nga ta wu lovisa hi kota ya lavo va khume.

³³Jehova i lo suka a famba laha a nga wa mbhetile ku wulawula na Abrahama; yenawu Abrahama i lo tlhelela kaya kakwe.