Read tshwa Genesisi 19 Bible Online

Genesisi 19 - tshwa bible

Genesisi 19

¹A tingelosi ti lota Sodoma laha gambyeni; Loti i wa tshamile laha nyangweni ya le Sodoma. Laha na a ti wona i lo suka a ti khinga; a korama lahasi.

²I te ngalo: Langutani, tihosi tanga, ma nga hambukani mu enghena ndlwini ya nanza ga nwina, mu tshama kona wusiku legi, mu hlaza milenge ya nwina; mu ta vuka ni mixo mu khoma ndlela ya nwina mu famba. Tona ti te ngalo: Ahihi, hi ta tshama laha handle.

³Yena i lo ti khongotela nguvu, zonake ti lo hambukela ka yena, ti enghena lomu ndlwini yakwe. I lo ti mahela zakuga, a bhika xibaba xi nga hiko na comelo, tiga.

⁴Kanilezi na va nga se etlela, a vavanuna va muti, a vanhu va le Sodoma, va lota ranzela a yindlu, vatsongwani ni vahombe, na vata hi matlhelo wontihe:

⁵va lo vitana Loti vaku kakwe: Va kwihi a vavanuna lava va enghenileko ka wena wusiku legi ke? va humese kasi ha va tiva ba. [37]

⁶Loti i lo huma aya ka vona le nyangweni, i lo vala livati lenzhako kakwe.

⁷Aku ngalo: Vamakabye, mu nga onhi kota lezi.

⁸Langutani, nzi na ni vanhwana vambiri lava va nga tivangiko wanuna; ngha mina nzi humesa vona, mu maha kuranza ka nwina ha vona; kanilezi ka lava vanhu mu nga mahi nchumu ka vona; kota va tileko nzhutini wa langwa la yindlu ya mina.

⁹Va te ngalo: Suka! Va engeta vaku: Loyi munhu i tile ku ta luvela laha, i lava ku hi lamula, makunu hi ta xanisa wena nguvu ku hunza vona. Va lo tsimbeketa Loti, na va tshinela ku tshova livati.

¹⁰Kanilezi a madota ma lo nawuluta a mandla yabye, va lo enghenisa Loti lomu ndlwini, va vala livati.

¹¹Va lo vaba hi wukhumu a vanhu lava va nga hi laha nyangweni ya yindlu, a vatsongwani ni vahombe; kasi va karala hi ku lava nyangwa.

¹²A madota ma ku ngalo ka Loti: Mbamani u nga navo laha kusuhani ke? vamwane va wena, ni vana va wena, ni vanhwana va wena, ni vontlhe lavo va nga va wena va humese ka legi wutshamu.

¹³Hakuva hi ta lovisa legi wutshamu, hi kota ya huwa ya hombe yi mahiwako hi kota ya vona mahlweni ka Jehova; Jehova i hi rumile akuva hi lovisa legi wutshamu.

¹⁴Loti i lo huma a ya wulawula ni vamwane vakwe, aku ka vona: Sukani mu huma ka legi wutshamu; hakuva Jehova i ta lovisa lowu muti. Kanilezi a so khwatsi mutseketseli mahlweni ka vamwane vakwe.

¹⁵Laha gi nga cile a tingelosi ti lo mu hatlisisa Loti tiku: Suka, u teka sati wa wena, ni vanhwana va wena va vambiri lava va nga laha u nga taku u lobyiswa zionhweni za muti.

¹⁶Kanilezi na a ha rivateka, a madota ma lo mu khoma hi canja, ni canja ga sati, ni canja ga vanhwana vakwe va vambiri, hakuva Jehova i wa hi ni tipswalo ka yena, i lo mu humesa a mu yisa lahandle ka muti.

¹⁷Laha na va va humesile lahandle ka muti, munwani i te ngalo: Tsutsuma u ponisa wutomi ga wena, u nga cuwuki nzhako, u nga yimi lomu livaleni leli; chavela xitsungeni, u nga taku u loviswa.

¹⁸Loti i te ngalo: Ngha zi nge nghaho, Hosi yanga.

¹⁹Languta, a nanza ga wena gi kumile a thomo mahlweni ka wena, u kulisile a tipswalo ta wena hi ku hlayisa a wutomi ga mina; a nzi na ku chavela xitsungeni, ku nga taku a khombo gi nzi kamanyeta nzifa.

²⁰Languta, a muti lowuya wu kusuhani ka kuva nzi chavela ka wona, wona wu tsongwani, ngha nzi chavela ka wona, nzi hanya; a hi wu tsongwani ke?

²¹Yena i te ngalo: Languta, nza ku vumela ka mhaka leyo, nzi nga ta lovisa a muti lowu u wu wulako.

²²Hatlisa u chavela ka wona, hakuva nzi nga ta maha nchumu na u nga se chikela kona. Hikwalaho a vito ga muti gi lo vitanwa ku Zoare.

²³Gi te gi tsuwuka gambo ka tiko lego na Loti a enghena Zoare,

²⁴zonake Jehova i lo nisa a solufa ni nzilo hehla ka Sodoma ni Gomora, zita hi ka Jehova le tilweni. [38]

²⁵I lo hetisa leyo miti ni nkova wontihe, ni vontlhe va akileko ka leyo miti, hi lezi zi kulako misaveni.

²⁶Kanilezi a sati wakwe loyi a nga mu lanza, i lo cuwuka nzhako, a su maha ruka ga munyu.

²⁷Abrahama i lo vinzuka ni mixo, aya ka wutshamu lego a nga wa yimile na Jehova;

²⁸i lo cuwuka a Sodoma ni Gomora, ni tiko gontlhe ga le nkoveni, i lo wona a musi wa tiko na wuya hehla kotisa a musi wa phingo.

²⁹Lezo laha Nungungulu a nga lovisa a miti ya lomu mikoveni, i lo alakanya Abrahama, a vumela Loti ku pona kuhahlulweni loko, laha a nga lovisa a miti leyi Loti a nga wa akile ka yona.

³⁰Loti i lo suka Zoare, a ya tshama xitsungeni ni vanhwana vakwe va vambiri, hakuva i lo chava ku tshama le Zoare. Yena i lo ya aka le mhakweni, yena ni vanhwana vakwe va vambiri.

³¹A nʼwana wa matewula i te ngalo ka nzisana yakwe: Dadani ngwa kale, ni lomu tikweni a ku kona a wanuna a ta nga enghena ka hina kota mukhuwo wa tiko gontlhe;

³²ngona hi ta mu nwisa a vinya dadani, kasi hi fela ku etlela zinwe naye, kasi hiva ni tinyimba ha dadani.

³³A wusiku lego va lo nwisa a raru wabye a vinya; loyi wa nhonzwa i lo enghena, a etlela ni raru wakwe; na yena a nga tivangi nchumu laha a nga etlela ni laha a nga vuka.

³⁴Zonake hi manziko wa kona loyi wa nhonzwa i te ngalo ka loyi wa nzisana: Languta, nzi etlele na dadani matolo; a hi engete kambe hi mu nwisa vinya wusiku legi, u enghenawu u etlela naye, kasi hiva ni tinyimba ha dadani.

³⁵Va lo mu nwisa vinya raru wabye wusiku lego; i lo sukawu loyi wa nzisana a ya etlela naye; i wa nga tivangi nchumu laha a nga etlela ni laha a nga vuka.

³⁶Zinghaho a vanhwana va Loti va vambiri va lo xuriswa tinyimba hi raru wabye.

³⁷Zonake loyi wa nhonzwa i lo beleka nisanyana, a chula vito gakwe ku hi Moabi; loye hi yena a raru wa maMoabi kala nyamutlha.

³⁸Yenawu loyi wa nzisana i lo beleka nisanyana, a chula vito gakwe ku hi Benammi; loye hi raru wa vana va Amoni kala nyamutlha.