Read tshwa Genesisi 21 Bible Online

Genesisi 21 - tshwa bible

Genesisi 21

¹Jehova i lo alakanya Sara kota lezi a nga wa wulile ka yena, na Jehova i lo maha ka Sara kota lezi a nga wa mu tsumbisile. [39]

²Sara i lo xura nyimba, i lo mu pswalela Abrahama a nuna wakwe a nisanyana na hi wa kale, kotisa a xikhati lexo Nungungulu a nga wa xi wulile ka yena.

³Abrahama i lo chula a vito ga nisanyana wakwe loyi a belekelweko, loyi Sara a nga wa mu belekela, aku ngalo hi Isaka.

⁴Abrahama i lo enghenisa a wukwera a nʼwana wakwe na ha hi ni ntlhanu wa masiku ni manharu, kota lezi Nungungulu a nga wa mu layile.

⁵Abrahama i wa hi ni 100 ga malembe a xikhati lexo a nga belekwa Isaka a nwanana wakwe.

⁶Sara i te ngalo: Nungungulu i nzi hlekisile, ni vontlhe lava va ta nga zizwa va ta tsaka na mina.

⁷Yena aku ngalo: Himani a nga nga wula ka Abrahama lezaku Sara i ta anwisa a vanana ke? Makunu nzi mu belekele a nwanana na a hi wa kale.

⁸A nwanana i lo kula, i lo lumulwa; Abrahama i lo maha mubuzo wa hombe a siku lego a nga lumulwa Isaka.

⁹Sara i lo wona a nisanyana wa Hagari a muGipite loyi a nga wa pswalele Abrahama, na a kari a hleka.

¹⁰I te ngalo ka Abrahama: Hlongola a nanza legi ga xisati ni nʼwana wa gona; hakuva a nʼwana wa khumbi a nga na kuga tshomba zinwe ni nʼwana wa mina Isaka. [40]

¹¹A gezu lego gi lo mu tsanwisa nguvu Abrahama hi kota ya nʼwana wakwe.

¹²Nungungulu i te ngalo ka Abrahama: Ngha lexi xi nga ku tsanwisi hi kota ya mufana, na hi kota ya khumbi ya wena; ingisa zontlhe lezi Sara a ku byelileko; hakuva hi ka yena Isaka ku ta nga huma a pswalo wa wena. [41]

¹³Na yena a nʼwana wa khumbi nzi ta mu maha a tiko; hakuva i pswalo wa wena.

¹⁴Abrahama i lo vuka ni mixo a teka a kuga ni nghotso ya mati, a nyika Hagari, a yi pakatsa makatleni yakwe, i lo mu nyika ni nʼwana a mu fambisa; i lo famba a nzulanzula xiwuleni xa Berexeba.

¹⁵Laha a mati ma nga mbhela lomu ka nghotso, i lo siya nʼwana lahasi ka sinya.

¹⁶I lo tsawukana naye a pfhukana wa ku kota ku hoxa ka tlhari; hakuva i te ngalo: A nzi na ku wona a nʼwana wa mina ni kufa. I loya tshama hi le mahlweni, i lo tlakusa a gezu a rila.

¹⁷Nungungulu i lozwa a gezu ga mufana; ni ngelosi ya Nungungulu yi vitana Hagari, yi hi le tilweni, yiku kakwe: Hagari, u yini ke? U nga chavi; hakuva Nungungulu i zwile a gezu ga mufana laho a nga kona.

¹⁸Suka, u vuxa mufana, u mu khoma hi woko, hakuva nzi ta mu maha a tiko ga hombe.

¹⁹Nungungulu i lo vulula mahlo yakwe, a wona a hlowo ya mati, i lo ya tata a nghotso hi mati, i lo nwisa a mufana.

²⁰Nungungulu i wa hi zinwe ni mufana, i lo kula, a tshama xiwuleni na a hi mukhomi wa wura.

²¹I lo aka xiwuleni xa le Parani, ni nyine wakwe i lo mu tekela sati tikweni ga le Gipite.

²²Zonake hi lexo xikhati Abimeleki na Fikole a nduna ya yimpi yakwe, va lo wulawula ka Abrahama, vaku: Nungungulu i na wena ka zontlhe lezo u zi mahako.

²³Hikwalaho hlambanya ka mina kwalaha hi Nungungulu lezaku, u nga ta nzi kanganyisa, mina ni pswalo wa mina; kanilezi kota wuxinji legi nzi nga ku mahela, u ta nzi mahela gona wenawu, ni tiko legi u akileko ka gona.

²⁴Abrahama aku ngalo: Nzi ta hlambanya.

²⁵Abrahama i lo sola Abimeleki hi kota ya hlowo leyi a malanza yakwe ma nga wa yi tekile hi xikanya.

²⁶Abimeleki aku ngalo: A nzi mu tivi loyi a nga maha lezo; wena a ku nzi byelangi, hambu ni kuzwa a nzi zwangi kala nyamutlha lezi.

²⁷Abrahama i lo teka a tiyivu ni tihomu a nyika Abimeleki; vona vambiri va lo maha xivumelwano.

²⁸Abrahama i lo veka tlhelweni a ntlhanu ni timbiri tiyivana.

²⁹Abimeleki aku ngalo ka Abrahama: Leti tiyivana ta ntlhanu ni timbiri u vekileko tlhelweni ta yini ke?

³⁰Yena i te ngalo: Leti tiyivana ta ntlhanu ni timbiri u ta teka canjeni ga mina, kasi ta maha wukustumunyu gaku hi mina nzi nga kela leyi hlowo.

³¹Hikwalaho i lo chula lego wutshamu ku ngalo hi Berexeba; hakuva va lo hlambanya laho vona vambiri.

³²Zinghaho va lo maha xivumelwano le Berexeba; zonake i lo suka Abimeleki, na Fikole a nduna ya yimpi yakwe, va tlhelela tikweni ga maFilistia.

³³Abrahama i lo byala a tisinya le Berexeba, i lo khongela laho a vito ga Jehova. Nungungulu wa pinzukelwa.

³⁴Abrahama i lo tshama lomo tikweni ga maFilistia masiku yo tala.