Read tshwa Genesisi 24 Bible Online

Genesisi 24 - tshwa bible

Genesisi 24

¹Abrahama i wa hi wakale, na hi ni malembe yo tala: Jehova i lo katekisa Abrahama ka zilo zontlhelele.

²Abrahama i te ngalo ka nanza gakwe ga hombe ga yindlu yakwe, loyi a nga wa fumela zontlhe lezi a nga wa hi nazo: Enghenisa a canja ga wena lahasi ka hangaswa ga mina.

³Nzi ta ku hlambanyisa hi Jehova, Nungungulu wa tilo ni Nungungulu wa misava, lezaku u nga tekeli a nʼwana wa mina a sati xikari ka vanhwana va maKanani, laya nzi tshamileko xikari kabye;

⁴kanilezi u taya tikweni ga hina, ni le maxakeni ya mina, u ya tekela a nʼwana wa mina Isaka a sati.

⁵A nanza gi te ngalo ka yena: Kutani a nhwana a nga ta vumela ku nzi lanzela nzi wuya naye ka legi tiko; xana nzi ta tlhelisa a nʼwana wa wena ka tiko legi u sukileko hi ka gona ke?

⁶Abrahama aku ngalo: Chela kota, u nga mu yisi seyo a nʼwana wa mina.

⁷Jehova, Nungungulu wa tilo, loyi a nga nzi teka le ndlwini ka dadani, ni le tikweni ga maheleko, loyi a nga wulawula a hlambanya ka mina, aku: A pswalo wa wena nzi ta wu nyika legi tiko; i ta ruma ngelosi yakwe mahlweni ka wena, u ta ya mu tekela nʼwana wa mina a sati leyo.

⁸Loku a nhwana a nga vumeli a ku ku lanza, zonake wena u nga ta kuva na nanzu hi lexi xifungo xa wena; kanilezi u nga yisi a nʼwana wa mina seyo.

⁹Zonake a nanza gi lo enghenisa a canja gakwe lahasi ka hangaswa ga Abrahama a hosi yakwe, gi lo hlambanya ka yena hi laya mahungu.

¹⁰Ni nanza gi lo teka khume ga makameli, xikari ka makameli ya nwinyi wakwe, gi lo famba ni zilo za tsengo za nwinyi wakwe; gi lo suka gi famba le Mesopotamia, le mutini wa Nahori.

¹¹I lo khizamisa a makameli yakwe hi lahandle ka muti, hi le hlobyeni ya mati, hi xikhati xa gambo, xikhati lexo vavasati va yako ku yakha mati.

¹²Yena i te ngalo: Jehova, Nungungulu wa nwinyi wa mina Abrahama, nzi vune nyamutlha, u mu mahela wuxinji a nwinyi wa mina Abrahama.

¹³Languta, nzi laha hlobyeni ya mati; a vanhwana va vanhu va muti vata ku takha mati.

¹⁴Ngha ku mahisa lezi, a nhwana loye nzi ta nga ku ngalo ka yena: Rula fuko ya wena nza nganwa mati; ngha aku ngalo: Nwana, nzi ta nwisa ni makameli ya wena kambe; ngha yaloye ave a hlawulelweko a nanza ga wena Isaka; hi ka lezo nzi ta zi tiva lezaku u mu mahele wuxinji a nwinyi wa mina.

¹⁵Zonake na a nga se nga mbheta ku wulawula, languta, ku lo chikela Rebeka loyi a belekwako hi Betueli, a nʼwana Milka, a sati wa Nahori, a nakulobye wa Abrahama, na a rwele a fuko yakwe.

¹⁶A nhwana i wa sasekile kucuwukekeni, a mubulwa a nga tiviko wanuna; i lo relela kuta hlobyeni, i lo khelela a fuko yakwe, a tlhela a kanziha.

¹⁷A nanza gi lo tsutsuma gi mu khinga, giku: Hi nga nziha nzinwa kutsongwani a mati lawo ma nga lomo ka fuko ya wena.

¹⁸Yena aku ngalo: Nwana hosi yanga; i lo hatlisa a rula a fuko yakwe canjeni gakwe, i lo mu nyika anwa.

¹⁹Laha na a mbhetile ku mu nyika anwa, i te ngalo: Nzi ta khela ni makameli ya wena kambe, ma kala ma kolwa.

²⁰I lo hatlisa a chulula a fuko yakwe lomu xigowolweni, i lo tsutsuma aya hlobyeni ku yakha manwani kambe, i lo khela a makameli yakwe wontihe.

²¹A wanuna i lo mu cuwukisisa na a miyele, kasi ku wona loku Jehova a katekisile a pfhumba gakwe.

²²Zonake loku a makameli ma mbhetile kunwa, a wanuna i lo teka a phera ya nzalama, a kutika ka yona ku wa hi khihlanya ga xekeli, ni zingwavila zimbiri za khume ga maxekeli kutika, i lo ma enghenisa canjeni gakwe.

²³Yena aku ngalo: U nʼwana mani ke? Hi nga nzi byela. Gi kona wutshamu lomu ndlwini ka raru wa wena ga kuva hi etlela ke?

²⁴A nhwana aku ngalo: Mina nzi nwaBetueli, a nʼwana Milka, kata Nahori.

²⁵Yena i lo engeta kambe aku ngalo: Hi na ni byanyi ni foliji go tala, ni wutshamu go etlela.

²⁶A wanuna i 16 khizama, a khozela mahlweni ka Jehova,

²⁷aku ngalo: A ku khesiwe Jehova, Nungungulu wa nwinyi wa mina Abrahama, loyi a nga tsikangiko a ku mahela nwinyi wa mina a wuxinji ni kutsumbeka. Jehova i nzi rangele lomu ndleleni a nzi yisa ndlwini ya maxaka ya nwinyi wa mina.

²⁸A nhwana i lo tsutsuma a ya bika leti timhaka lomu ndlwini ka nyine wakwe.

²⁹Rebeka i wa hi ni makabye wakwe, a vito gakwe hi Labani. Labani i lo tsutsuma aya ka wanuna le hlobyeni.

³⁰Zonake, laha na a wonile a phera ni zingwavila mandleni ya makabye wakwe ni kuzwa timhaka ta Rebeka makabye wakwe, taku: A wanuna i wulile lezo ka mina, Labani i loya ka wanuna; languta, i wa yimile laha ma-kamelini hi le hlobyeni.

³¹I te ngalo: Enghena, u katekisilweko hi Jehova; wa ha yimela yini lahandle ke? Nzi longisile a yindlu ni wutshamu ga makameli.

³²A wanuna i lo enghena lomu ndlwini: va lo tlhatlha makameli yakwe, va nyika makameli a byanyi ni foliji, ni mati ya ku hlamba milenge yakwe, ni milenge ya vanhu lavo a nga wa hi navo.

³³Laho ku lo vekiwa zakuga mahlweni kakwe kasi aga, kanilezi yena aku ngalo: Nzi nga taga na nzi nga se wula timhaka ta mina. Labani aku ngalo: Wula.

³⁴Yena aku ngalo: Mina nzi nanza ga Abrahama:

³⁵Jehova i katekisile nguvu a nwinyi wa mina, yena ngwa hombe; i mu nyikile tiyivu ni tihomu, ni siliva, ni nzalama, ni malanza, ni malanza ya xisati, ni makameli, ni timbongola.

³⁶Na Sara, a sati wa nwinyi wa mina, na hi wakale i mu pswalele nʼwana a nwinyi wa mina; i nyikile ka yena zontlhe lezi a nga nazo.

³⁷A nwinyi wa mina i lo nzi hlambanyisa, aku: U nga tekeli a nʼwana wa mina a sati xikari ka vanhwana va maKanani, laya nzi tshamileko lomu tikweni gabye.

³⁸Kanilezi u taya le ndlwini ka dadani, ni le maxakeni ya! mina u ya tekela a nʼwana wa mina a sati.

³⁹Mina nzi te ngalo ka hosi ya mina: Kutani wasati a nga ta vumela ku nzi lanzela.

⁴⁰Yena i te ngalo ka mina: Jehova loyi nzi fambako mahlweni kakwe i ta rumela ngelosi yakwe zinwe na wena, yona yi ta katekisa a pfhumba ga wena; u ta ya tekela a nʼwana wa mina a sati le tixakeni ta mina, lomu ndlwini ya dadani.

⁴¹Zonake u nga ta kuva ni nanzu hi kuhlambanya ka mina, loku u yile maxakeni ya mina; hambu loku ya nga ku nyiki, u nga ta kuva ni nanzu hi kuhlambanya ka mina.

⁴²Nzi lo chikela le hlobyeni inyamutlha, nzi te ngalo: Jehova Nungungulu wa hosi ya mina Abrahama, loku u nzi katekisa ka pfhumba legi nzi fambako ka gona,

⁴³languta, nzi yimile laha hlobyeni ya mati; ngha kuku loku kuta a nhwana ku takha mati, nzi taku ka yena: Hi nga nziha nzinwa kutsongwani a mati lawo ma nga lomo ka fuko ya wena;

⁴⁴loku aku ka mina: Nwana wena, nzi ta khela ni makameli ya wena kambe; ngha loye nhwana a hi yena a hlawulelweko a nʼwana wa nwinyi wa mina hi Jehova.

⁴⁵Zonake laha na nzi nga se mbheta ku wulawula mbilwini ya mina, languta, Rebeka i lo chikela na a rwele a fuko yakwe makatleni yakwe; i lo relela hlobyeni ku takha mati. Nzi te ngalo kakwe: Hi nga nziha nzinwa.

⁴⁶I lo hatlisa a rula fuko yakwe makatleni yakwe, aku: Nwana; nzi ta nwisa ni makameli ya wena kambe; nzi lonwa, i lo nwisa ni makameli kambe.

⁴⁷Nzi lo mu wutisa ku ngalo: U nʼwana mani ke? Aku: Nzi nʼwaBetueli, a nʼwana Nahori, loyi a nga pswalelwa hi Milka; nzi lo vekela a phera nhovini yakwe, ni zingwavila mandleni yakwe.

⁴⁸Nzi lo khizama, nzi korama mahlweni ka Jehova, nzi lo mu bonga Jehova Nungungulu wa nwinyi wa mina Abrahama, loyi a nzi kombileko a ndlela yo lulama kasi nzi ta teka a nhwana wa makabye wa hosi ya mina, kasi a yava sati wa nʼwana wakwe.

⁴⁹Makunu nzi byeleni loku mu ranza a ku mu mahela wuxinji ni zinene a hosi ya mina; ni loku zi nga hi lezo nzi byeleni kambe; kasi nza fela ku hunzuluka nziya tlhelweni ga xinene kutani ka ga xibhabha.

⁵⁰Zonake Labani na Betueli va hlamula vaku ngalo! A mhaka leyi yi tako hi ka Jehova; hi nga ta wula ka wena kubiha hambu kusasa.

⁵¹Languta, i le mahlweni ka wena, mu teke u famba naye, a ya maha sati wa nʼwana wa hosi ya wena, kota lezo Jehova a wulileko.

⁵²Makunu laha a nanza ga Abrahama gi ngazwa leti timhaka, i lo korama lahasi mahlweni ka Jehova.

⁵³Ni nanza gi lo humesa a zibya za siliva ni nzalama, ni tinguwo, i lo zi nyika ka Rebeka; i lo nyika kambe ka Labani makabye wakwe ni nyine wakwe a zinyikiwo za tsengo wa hombe.

⁵⁴Va loga vanwa, yena ni vanhu lava a nga wa hi navo, va lo tshama laho lego wusiku. Vontlhe va lo vuka ni mixo, aku ngalo: Nzi fambiseni nziya ka nwinyi wa mina.

⁵⁵A makabye wakwe ni nyine wakwe vaku ngalo: Ngha a nhwana a tshama na hina kutani khume ga masiku; anzhako ka lezo i ta famba.

⁵⁶Yena aku ngalo kabye: Mu nga nzi rivatisi, hilezi Jehova i katekisile a pfhumba ga mina; nzi fambiseni kasi nziya ka hosi ya mina.

⁵⁷Vona vaku ngalo kakwe: Hi ta vitana nhwana, hizwa hi nonwini wakwe.

⁵⁸Va lo mu vitana Rebeka, vaku kakwe: U ta famba ni loyi munhu ke? Aku ngalo: Nzi ta famba.

⁵⁹Zonake va lo mu fambisa Rebeka makabye, ni muanwisi wakwe, ni nanza ga Abrahama, ni vavanuna vakwe.

⁶⁰Va lo mu katekisa Rebeka, vaku ka yena: Wena makweru, ngha ma hi mazana ya mazana ya tsanza-vahlayi a pswalo wa wena, ni pswalo wa wena a wu wutle tinyangwa ta valala vabye.

⁶¹I lo suka Rebeka ni vanhanyana vakwe, va lo khilela makameli va lanza loyi wanuna; ni nanza gi lo teka Rebeka gi famba.

⁶²Isaka i wa kari ata hi ndlela ya le Beer-lahairoi: hakuva i wa tshama tikweni ga le Dzongeni.

⁶³Isaka i lo huma laha gambyeni na aya le handle, kasi ku ya alakanyela; i lo tlakusa a mahlo yakwe, a wona makameli na ma kari mata.

⁶⁴Rebeka i lo tlakusa a mahlo yakwe, laha a nga wona Isaka, i lo chika hi le kamelini,

⁶⁵aku ngalo ka nanza: Himani loyi munhu a fambako lomu masinwini a hi khinga ke? A nanza giku ngalo: I hosi ya mina. Yena i lo teka a nguwo a ti fenengeta.

⁶⁶Ni nanza gi lo hlawutela ka Isaka zontlhe lezi a zi mahileko.

⁶⁷Isaka i lo enghenisa Rebeka lomu tendeni ga Sara a nyine wakwe, i lo mu teka a maha sati wakwe, a mu ranza. Na Isaka i lo chavelelwa zalezo a nga felwe hi nyine wakwe.