Read tshwa Genesisi 25 Bible Online

Genesisi 25 - tshwa bible

Genesisi 25

¹Abrahama i lo engeta a teka sati, a vito gakwe hi Ketura.

²Yena i lo mu belekela Zimrani, na Jokixani, na Medani, na Midiani, na Ixibake, na Xua.

³Jokixani i lo beleka Xeba, na Dedani. Ni vana va Dedani ku wa hi Axurime, na Letuxime, na Leumime.

⁴A vana va Midiani hi Efa, na Efera, na Hanoke, na Abida, na Elda. Lava vontlhe i vana va Ketura.

⁵Abrahama i lo nyika Isaka zontlhe lezi a nga wa hi nazo.

⁶Kanilezi ka vanana va vasati vakwe va tsongwani lava a nga wa hi navo, Abrahama i lo va nyika zinyikiwo, i lo va hambukisa ka Isaka, a nʼwana wakwe na a ha hanya, va loya tlhelo ga Mutsuwuka-gambo, tikweni ga Mutsuwuka-gambo.

⁷A masiku ya malembe ya kuhanya ka Abrahama i 175.

⁸Abrahama i lo nyikela a moya wakwe, i lofa na a hi wa kale, na a khosahele, na a hi ni malembe ya kutala, i lo amukelwa ka va ka kabye.

⁹Zonake a vana vakwe, Isaka na Ixmaeli, va lo mu lahla a mhakweni ya le Makapela, a tikweni ga ka Efroni, a nʼwana wa Zohara a muHeti, yi nga mahlweni ka Mamre;

¹⁰gi nga gona a simu legi a nga xava Abrahama ka vana va Heti, hi kwalomo ku nga lahliwa Abrahama na Sara a sati wakwe.

¹¹Zonake anzhako ka kufa ka Abrahama, Nungungulu i lo katekisa Isaka a nʼwana wakwe; Isaka i lo tshama hi le hlobyeni ya Beer-lahairoi.

¹²Makunu a zizukulwana za Ixmaeli, a nʼwana wa Abrahama, loyi a nga heleketwa hi Hagari muGipite, a nanza ga Sara, hi lezi:

¹³laya hi mavito ya vana va Ixmaeli, hi mavito yabye, hi zizukulwana zabye: A matewula ya Ixmaeli hi Nebaiote; na Kedare, na Adbeeli, na Mibsame,

¹⁴na Mixma, na Duma, na Masa,

¹⁵na Hadade, na Tema, na Jeture, na Nafixi, na Kedema.

¹⁶Lava hi vana va Ixmaeli, ni laya hi mavito yabye, hi miti yabye na hi wugovelo gabye; khume ni timbiri tihosana kota matiko yabye.

¹⁷A malembe ya wutomi ga Ixmaeli, ma wa hi 137, i lo nyikela a moya wakwe afa, i lo amukelwa ka va ka kabye.

¹⁸Vona va lo aka kusukela le Havila va kala va chikela le Xure, ngomama ni Gipite, loku uya le Assiria: i lofa nghoheni ka tixaka takwe tontlhe.

¹⁹Lezi hi zizukulwana za Isaka nʼwana wa Abrahama: Abrahama i lo beleka Isaka;

²⁰Isaka i wa hi ni 40 wa malembe a xikhati lexo a nga teka Rebeka a nʼwana Betueli a muAramea wa le Padan-Aramu, makabye wa Labani a muAramea, a kuva sati wakwe.

²¹Isaka i lo kombelela sati wakwe ka Jehova, hakuva i wa hi ngonwa. Jehova i lo muzwa; na Rebeka sati wakwe i lo xura nyimba.

²²Ni vanana va lo gudlhana lomu nzeni kakwe; yena aku ngalo: Loku zi mahisa lezi, nzi xurele yini nyimba ke? I lo ya wutisa ka Jehova.

²³Jehova i te ngalo kakwe: Ku kona matiko mambiri lomu nzeni ka wena; ku ta hambana lomu nyimbeni ya wena ku maha tixaka timbiri; linwani lixaka li ta hlula linwani; a nhonzwa i ta khozela nzisana. [46]

²⁴Ma lo tatiseka a masiku ya kuhefemula, languta, ma wa hi mahahla lomu nyimbeni yakwe.

²⁵Ku lo huma wo sangula na a pswhukile, na a ku khwatsi i nguwo ya woya a miri wontihe; va lo mu chula vito gakwe ku ngalo hi Esau.

²⁶Hi lenzhako kakwe ku lo huma makabye wakwe, na canja gakwe a khomile xirenze xa Esau; a vito gakwe gi lo chulwa ku ngalo hi Jakobe. Na Isaka i wa hi ni 60 wa malembe kubelekweni kabye. Esau a xavisa a wutewula gakwe.

²⁷Ni vafana va lo kula: Esau i wa hi munhu a nga wa tiva ku hlota, a hi munhu wa khwati; Jakobe i wa hi munhu wa kurula, a tshama matendeni.

²⁸Makunu Isaka i lo ranza Esau, hakuva i wa mu hlotela nyama; kanilezi Rebeka i wa ranza Jakobe.

²⁹Makunu Jakobe i lo bhika zakuga. Na Esau i lo wuya hi le khwatini na a karele.

³⁰Esau i te ngalo ka Jakobe: Wa nga nziha nziga a kuga loko ko pswhuka, hakuva nzi karele. Hikwalaho va nga mu chula ku ngalo hi Edomi.

³¹Jakobe aku ngalo: Nzi xavisele kuranga a wutewula ga wena.

³²Esau i te ngalo: Languta, nzi lava kufa hi ndlala; gi ta nzi vuna yini a wutewula xana?

³³Jakobe i te ngalo: Ranga u hlambanya. I lo hlambanya ka yena, a xavisa a Wutewula gakwe ka Jakobe. [47]

³⁴Zonake Jakobe i lo nyika Esau a kuga, a kuga ka tinyawa; i loga, anwa, a suka a ti fambela; lezo Esau i lo kanyisa a tshomba ya wutewula.