Read tshwa Genesisi 29 Bible Online

Genesisi 29 - tshwa bible

Genesisi 29

¹Jakobe i lo suka laho a komama a tikweni ga va le Mutsuwuka-gambo.

²I lo wona a hlowo ya lomo tikweni, ku wa mbambamele kona a mitlhambi minharu ya tiyivu; hakuva hi ka hlowo leyo va nga wa nwisa kona mitlhambi; a ribye legi gi nga wa fenengeta a nomu wa hlowo gi wa hi ga hombe.

³Hi kota ya lezo yi wo tsombana laho yontlhe mitlhambi, zonake va wumbuluta a ribye va gi susa nonwini wa hlowo, zonake va nwisa tiyivu, va wuya va gi tlhelisa wutshanwini ga gona laha nonwini wa hlowo.

⁴Jakobe i te ngalo kabye: Vamakabye, muta hi kwihi? Vona vaku kakwe: Hi va ka Harani.

⁵Aku ka vona: Ma mu tiva Labani, a nʼwana Nahori ke? Vaku ka yena: Ha mu tiva.

⁶Yena aku ngalo kabye: Wa hanya khwatsi ke? Vona vaku kakwe: Wa hanya khwatsi; hi gaya Rakeli a nhanyana wakwe a tako ni tiyivu.

⁷Yena aku ngalo kabye; Langutani ka ha hi hlikanhi, a hi xona xikhati xa kuva mitlhambi yi tsombana; nwisani tiyivu mu famba mu ya ti risa.

⁸Vona vaku ka yena: A hi na ku maha lezo na yi nga se ku tsombana yontlhe mitlhambi, va kala va wumbuluta a ribye va gi susa nonwini wa hlowo; zonake hi kona hi to nwisa tiyivu.

⁹Na ha wulawula navo, ku lo chikela Rakeli ni tiyivu ta raru wakwe, hakuva hi yena a nga wa ti risa:

¹⁰Zonake Jakobe na wonile Rakeli, a nhanyana wa Labani, a makabye wa nyine wakwe, zinwe ni tiyivu ta Labani, makabye wa nyine wakwe, Jakobe i lo tshinela, a wumbuluta a ribye a gi susa nonwini wa hlowo, i lo nwisa tiyivu ta Labani, makabye wa nyine wakwe.

¹¹Jakobe i lo pswopswa Rakeli, i lo tlakusa a gezu gakwe a rila.

¹²Jakobe i lo byela Rakeli lezaku makabye wa raru wakwe wo belekwa hi Rebeka; yena i lo tsutsuma a ya byela raru wakwe.

¹³Zonake Labani laha na a zwile timhaka ta Jakobe a nʼwana wa makabye wakwe, i lo tsutsuma a mu khinga, i lo mu wukarela, a mu pswopswa, a mu enghenisa lomu ndlwini yakwe, zonake Jakobe i lo hlawutela Labani zontlhe zi nga mu humelele.

¹⁴Labani aku ngalo ka yena: Hakunene u rambu ga mina, ni nyama ya mina. I lo tshama naye a hweti yinwe.

¹⁵Labani i te ngalo ka Jakobe: Kota lezi u nga nakulori u ta nzi tirela mahala ke? Nzi byele, u lava ku hakha yini ke?

¹⁶Labani i wa hi ni vanhanyana vambiri; a vito ga nhonzwa i wa hi Lea, a vito ga nzisana i wa hi Rakeli.

¹⁷A mahlo ya Lea ma wa nga hanyi khwatsi; kanilezi Rakeli i wa sasekile, na a cuwukeka khwatsi.

¹⁸Jakobe i lo ranza Rakeli; aku ngalo: Nzi ta mu tirela ka wena a nhanyana wa wena loyi wa nzisana, Rakeli, ntlhanu wa malembe ni mambiri.

¹⁹Labani aku ngalo ka yena: Zi sasekile ku mu nyikela ka wena ku hunza ku mu nyikela ka munwani; tshama na mina.

²⁰Jakobe i lo tirela Rakeli ntlhanu wa malembe ni mambiri; ma wo khwatsi masiku ma tsongwani ka yena hi kota ya ku mu ranza kakwe.

²¹Jakobe i te ngalo ka Labani: Ma mbhelile masiku ya mina: nzi nyike sati wa mina, kasi nzi fela ku ya enghena ka yena.

²²Labani i lo ramba vanhu vontlhe va lego wutshamu, i lo maha mubuzo.

²³Zonake laha gambyeni i lo teka Lea a nhanyana wakwe, i lo mu yisa ka yena; yena i lo enghena ka yena.

²⁴Labani i lo nyikela Zilpa a nanza ga yena ga xisati ka Lea, kasi a maha a nanza ga xisati ga Lea, a nhanyana wakwe.

²⁵Zonake laha mixweni Jakobe i lo wona lezaku hi Lea. Yena aku ngalo ka Labani: Zini lezi u nzi maheleko? Kasi a nzi tirelangi Rakeli ka wena ke? U nzi khohlisela yini ke?

²⁶Labani aku ngalo: A zi mahiswi lezo lomu ka hina a ku nyikela a nzisana, na hi nga se nga nyikela a nhonzwa.

²⁷Mbhetisa a viki gakwe zonake hi ta ku nyika loyi kambe, u ta engeta u nzi tirela kambe manwani malembe ya ntlhanu ni mambiri.

²⁸Jakobe i lo maha lezo, i lo mbhetisa a viki gakwe; zonake i lo mu nyika Rakeli a nhanyana wakwe, a kuva sati wakwe kambe.

²⁹Labani i lo nyikela Bilha ka Rakeli a nhanyana wakwe, loyi a nga wa hi nanza gakwe ga xisati, giva nanza gakwe.

³⁰I lo enghena kambe ka Rakeli, i lo mu ranza nguvu Rakeli ku hunza Lea, i lo engeta a tira kakwe manwani malembe ya ntlhanu ni mambiri.

³¹Jehova i lo wona lezaku Lea wa vengiwa, i lo vulula marumbu yakwe, kanilezi Rakeli i wa hi ngonwa.

³²Lea i lo xura nyimba, i lo beleka nisanyana, i lo chula vito gakwe ku hi Rubeni; hakuva i te ngalo: Jehova i wonile kuxaniseka ka mina, lezi a nuna wa mina i ta nzi ranza.

³³I lo engeta a xura nyimba, i lo beleka nisanyana; i te ngalo: Jehova i zwile lezaku nza vengiwa, hikwalaho i nzi nyikile ni loyi. I lo chula vito gakwe ku hi Simeoni.

³⁴I lo engeta a xura nyimba, i lo beleka nisanyana; i te ngalo: Makunu lexi xikhati a nuna wa mina i ta namarela ka mina, hakuva nzi mu helekete varisanyana vanharu; hikwalaho a vito gakwe va te ngalo hi Levi.

³⁵I lo engeta kambe a xura nyimba, i lo beleka nisanyana. Yena i te ngalo: Lexi xikhati nzi ta bonga Jehova; hilezo i lo chula a vito gakwe ku hi Juda. Yena i lo kaketa ku beleka.