Read tshwa Genesisi 30 Bible Online

Genesisi 30 - tshwa bible

Genesisi 30

¹Laha Rakeli a nga wona lezaku a nga mu belekelangi vanana Jakobe, i lo lusa ka makabye wakwe; aku ngalo ka Jakobe: Nzi nyikewo a vanana, nzi nga kala nzifa.

²Zonake a zanga ya Jakobe yi lo vindlukela Rakeli; i te ngalo: Nzi mina Nungungulu ke, loyi a beletelako mihanzu ya marumbu ya wena ke?

³Yena i te ngalo: Hi loyi a nanza ga mina ga xisati, Bilha, enghena kakwe; i ta belekela madzolweni ya mina, kasi minawu nzi ta kuma vanana ha yena.

⁴I lo mu nyika Bilha a nanza gakwe ga xisati, a kuva sati wakwe: Jakobe i lo enghena kakwe.

⁵Bilha i lo xura nyimba, i lo pswalela Jakobe a nisanyana.

⁶Rakeli i te ngalo: Nungungulu i lamule a nanzu wa mina, ni lezaku i zwile a gezu ga mina, i nzi nyikile a nisanyana. Hilezo i lo chula a vito gakwe ku hi Dani.

⁷Bilha a nanza ga xisati ga Rakeli i lo engeta a xura nyimba, a pswalela Jakobe a nisanyana wa wumbiri.

⁸Rakeli i te ngalo: Hi kupfinyana ka hombe nzi pfinyene ni makweru, nzi mu hlulile. I lo chula vito gakwe ku hi Naftali.

⁹Laha Lea a nga wa wonile lezaku i gumesile ku beleka, i lo teka Zilpa a nanza gakwe ga xisati, a nyika Jakobe a kuva sati wakwe.

¹⁰Zilpa a nanza ga xisati ga Lea, i lo pswalela Jakobe a nisanyana.

¹¹Lea i te ngalo: Thomo ganga! I lo chula vito gakwe ku hi Gadi.

¹²Zilpa a nanza ga xisati ga Lea, i lo pswalela Jakobe a nisanyana wa wumbiri.

¹³Lea i te ngalo: Nzi katekile, hakuva a vanhwana va taku ngalo nzi katekile. I lo chula vito gakwe ku hi Axeri.

¹⁴Hi xikhati xa ku tshovela mavele Rubeni i lo ya kuma mandragora le masinwini, a wuya nawo a ta nyika a nyine wakwe Lea. Rakeli i te ngalo ka Lea: A wa nga nziha a mandragora lawo ma nga wuya ni nʼwana wa wena!

¹⁵Yena i te ngalo kakwe: Kasi xilo xi tsongwani lezi u nzi tekeleko nuna wa mina ke? U lava ku nzi tekela ni mandragora ya nʼwana wa mina ke? Rakeli i te ngalo kakwe: Jakobe i ta etlela na wena legi wusiku hi kota ya mandragora lawo ma nga wuya ni nʼwana wa wena.

¹⁶Jakobe i lo wuya laha gambyeni hi le masinwini, Lea i lo mu khinga, aku ngalo kakwe: U ta enghena lomu ka mina, hakuva nzi ku xavile futsi hi mandragora ya nʼwana wa mina. I lo etlela naye lego wusiku.

¹⁷Nungungulu i lo ingisa ka Lea, i lo xura nyimba, i lo pswalela Jakobe a nisanyana wa wuntlhanu.

¹⁸Lea i te ngalo: Nungungulu i nzi nyikile a nchachazelo wa mina, hakuva nzi lo nyika a nuna wa mina a nanza ga mina ga xisati. I lo chula vito gakwe ku hi Isakari.

¹⁹Lea i lo engeta a xura nyimba, i lo pswalela Jakobe a nisanyana wa wuntlhanu ni munwe.

²⁰Lea i te ngalo: Nungungulu i nzi nyikile a xinyikiwo xi nene; makunu a nuna wa mina i ta tshama na mina, hakuva nzi mu pswalele varisanyana va ntlhanu ni munwe. I lo chula vito gakwe ku hi Zebuloni.

²¹Anzhako ka lezo i lo beleka nhanyana, i lo chula vito gakwe ku hi Dina.

²²Nungungulu i lo alakanya Rakeli, Nungungulu i lo muzwa, i lo vulula marumbu yakwe.

²³I lo xura nyimba, i lo beleka a nisanyana; yena i te ngalo: Nungungulu i susile a nzhukano ya mina.

²⁴Yena i lo chula vito gakwe ku hi Josefa, na aku: Jehova a nzi engete munwani nisanyana.

²⁵Zonake laha Rakeli na belekile Josefa, Jakobe i te ngalo ka Labani: Nzi tlhatlhe nziya wutshanwini ga mina, ni le tikweni ga hina.

²⁶Nzi nyike vasati va mina ni vanana va mina, lava nzi nga va tirela ka wena, kasi nza famba, hakuva wena wa yi tiva mitiro ya mina, leyi nzi ku tireleko yona.

²⁷Labani i te ngalo kakwe: Loku mina nzi kumile thomo mahlweni ka wena, wa nga tshama; hakuva nza wona lezaku Jehova wa nzi katekisa hi kota ya wena.

²⁸Yena i te ngalo: Nzi byele a hakhelo ya wena, nzi ta ku nyika yona.

²⁹Yena i lo hlamula, aku: Wena wa zi tivawo lezi nzi nga tirisa zona ka wena ni lezaku a tihomu ta wena ti wa hi ta kuyini mandleni ya mina.

³⁰Hakuva ti wa hi titsongwani leti u nga wa hi nato na nzi nga se kuta mina, makunu lezi ti anzile nguvu ti tele; Jehova i ku katekisile hi kuta ka mina; makunu hi rini nzi ta nga tirela a wa mina ngango ke?

³¹Yena i te ngalo: Nzi ta ku nyika yini ke? Jakobe i te ngalo: U nga ta nzi nyika nchumu: ntsena loku wa nga nzi mahela lezi zilo, nzi ta engeta nzi risa ni ku hlayisa mitlhambi ya wena kambe.

³²Inyamutlha nzi ta enghena tlhambini wa wena wontihe, nzi susa tontlhe ta matlhakatlhaka, ni ta makhwanga, ni tontlhelele ta ntima xikari ka tiyivu, ni ta makhwanga ni ta matlhakatlhaka xikari ka timbuti; leti to mahisa lezo ti tava nzhiho wa mina.

³³Zinghaho a kululama ka mina ku ta nzi kustumunyela, hi xikhati xa ha tako a mahlweni ka wena, loku u ta chikela ka leti ti nga ta hakhelo ya mina: u kuma leti ti nga hiko na matlhakatlhaka, ni leti ti nga hiko na makhwanga xikari ka timbuti, ni leti ti nga hiko ta ntima xikari ka tiyivu, letoke loku ti ta kumiwa ka mina nzi tava nzi yivile.

³⁴Labani i te ngalo: Hi zona, a zi mahise lezi u wulileko.

³⁵Hi lego siku i lo humesa a timhongo leti ta mavalavala, ni ta makhwanga ni wontihe mapswele ya timbuti leti ta matlhakatlhaka ni ta makhwanga, ni tontlhelele leti ta ku basa, ni ta ntima tontlhelele xikari ka tiyivu, i lo ti nyikela canjeni ga vana vakwe.

³⁶I lo ya ti veka a pfhuka wa ku famba masiku manharu xikari kakwe na Jakobe. Jakobe i lo sala a risa mitlhambi leyi yi seleko ya Labani.

³⁷Jakobe i lo tsema a tinhi leti to tsakama ta ndlulameti, ni ya xiwulane ni ya almondi, i lo vandlela mahala yo basa ka tona, ku lo woneka kubasa laha ka tinhi.

³⁸I lo vekela a tinhi leti a nga wa ti vandlele mahlweni ka mitlhambi, le xigowolweni xa mati, laho ti yako tinwa kona, kasi ti ta xura tinyimba na ti kari tita ku ta nwa mati.

³⁹A mitlhambi yi lo xura tinyimba mahlweni ka tinhi, ni mitlhambi yi lo pswala leti ta mahala ni ta matlhakatlhaka, ni ta makhwanga.

⁴⁰Jakobe i lo phaka tiyivu, i lo tlakusa a nghohe xikari ka mitlhambi a cuwuka leti ta mahala, ni leti ta ntima lomu tlhambini ka Labani; i lo veka mitlhambi yakwe hi tlhelo, a nga yi vekangi mitlhambini ya Labani.

⁴¹Ku waku loku a tiyivu leti ta ntamu ti lanzwa, Jakobe a zima a tinhi mahlweni ka tiyivu, lomu tinyangweni, kasi ti fela ku xura tinyimba mahlweni ka tinhi:

⁴²Kanilezi loku tiyivu ti nga hi na ntamu, i wa nga yimisi a tinhi; hi kota ya lezo a ta Labani ti wa nga hi ntamu, a ta Jakobe ti wa hi ni ntamu.

⁴³Loyi munhu i lo anza nguvu, hi kuva ni mitlhambi yo tala, ni malanza ya xinuna ni ya xisati, ni makameli ni timbongola.