Read tshwa Genesisi 31 Bible Online

Genesisi 31 - tshwa bible

Genesisi 31

¹Jakobe i lozwa a timhaka ta vanana va Labani na vaku: Jakobe i tekile zontlhe za raru wa hina; i tekile a tshomba ya dadani a ti fumisa hi yona.

²Jakobe i lo wona a macuwukela ya Labani na ma hambene ni ya masiku.

³Jehova i te ngalo ka Jakobe: Tlhelela tikweni ga vakoko va wena ni le maxakeni ya wena; mina nzi tava zinwe na wena.

⁴Jakobe i lo ruma ku ya vitana Rakeli na Lea, a kuva vata le wuriselweni ga mitlhambi yakwe.

⁵I te ngalo kabye: Nza zi wona lezaku a nghohe ya raru wa nwina a ya ha kotisi za tolo ni tolweni; kanilezi Nungungulu wa dadani wa mina i na mina.

⁶Nwinawu ma zi tiva lezaku nzi mu tirele a raru wa nwina hi ntamu wontihe wa mina.

⁷Kanilezi a raru wa nwina i nzi khohlisile khume ga zikhati a hunzulusa a hakhelo ya mina; kanilezi Nungungulu a nga vumelangi a kuva a nzi mahela kubiha.

⁸Laha a ngaku ngalo leti ta matlhakatlhaka ti tava a hakhelo ya wena, a ntlhambi wontihe wu lo pswala ta matlhakatlhaka; ni laha a ngaku leti ta makhwanga ti tava a hakhelo ya wena, ntlhambi wontihe wu lo pswala ta makhwanga.

⁹Zinghaho, Nungungulu i tekile a tiyivu ta raru wa nwina a nzi nyika.

¹⁰Hakuva a xikhatini lexi a tiyivu ti nga xura a tinyimba, nzi lo tlakusa mahlo ya mina, nzi lo wona lomu norweni, a tihamba tontlhe leti ti nga lanza tiyivu ti wa hi ta makhwanga ni ta matlhakatlhaka ni to valala.

¹¹A ngelosi ya Nungungulu yi te ngalo ka mina hi kulora: Jakobe! Nziku: Nzi laha.

¹²Yi te ngalo: Hi nga tlakusa mahlo ya wena, u wona tontlhe tihamba leti ti lanzako a ntlhambi ti na ni makhwanga ni matlhakatlhaka ni kuvalala; hakuva nzi wonile zontlhe lezo Labani a zi mahako ka wena.

¹³Hi mina Nungungulu wa le Beteli, laha wena u nga tota a mhinga, laho u nga funga xifungo ka mina. Sukake ka legi tiko, u famba tikweni ga nwina.

¹⁴Rakeli na Lea va lo hlamula vaku ngalo kakwe: Ha hi ni xiavelo muni ndlwini ya raru wa hina ke?

¹⁵A hi hlayiwi ka yena kota vamatiko ke? Hakuva yena i hi xavisile, aga mali ya hina.

¹⁶Hakuva a tshomba yontlhe leyi Nungungulu a wutleleko a raru wa hina nja hina ni vanana va hina. Maha lezo Nungungulu a ku byelileko.

¹⁷Zonake Jakobe i lo suka a khilelisa vasati vakwe ni vanana vakwe hehla ka makameli;

¹⁸i lo gula tontlhe tiyivu takwe, ni yontlhe nhunzu yakwe leyi a nga wa hi nayo, a zifuyo lezi a nga wa zi kumile, lezi a nga wa fuyile le Padanaramu, i lo suka a famba ka Isaka a raru wakwe, le tikweni ga le Kanani.

¹⁹Labani i wa yile ku ya kaya tiyivu; Rakeli i lo yiva materafime ya raru wakwe. [51]

²⁰Jakobe i lo kanganyisa Labani muAramu hi ku kala ku mu tivisa lezaku wa rura.

²¹Zinghaho yena i lo andlamuka ni zontlhe lezi a nga wa hi nazo; yena i lo suka, a tlhatuka a congo, i lo komama hi tlhelo ga xitsunga xa Gileadi.

²²Zonake hi siku ga wunharu Labani i lo byelwa lezaku Jakobe i andlamukile.

²³I lo famba ni vamakabye vakwe va mu lanza a pfhuka wa ntlhanu wa masiku ni mambiri; i lo ya mu kuma le xitsungeni xa Gileadi.

²⁴Nungungulu i lota ka Labani a muArame hi kulora ni wusiku, i te ngalo kakwe: Ti wonele lezaku u nga wulawuli ka Jakobe a kusasa hambu kubiha.

²⁵Labani i lo ya mu kuma Jakobe. Jakobe i wa gwimbile a tenda gakwe le xitsungeni; Labani ni vamakabye va wa gwimbile le xitsungeni xa Gileadi.

²⁶Zonake Labani i te ngalo ka Jakobe: U mahele yini a ku nzi kanganyisa, u nyemukisa a vanhanyana va mina kota tikhumbi ti khomilweko hi matlhari?

²⁷U nyemukela yini hi le xihundleni ke? U nzi nyemuka, u nga nzi byeli, kasi nza fela ku ku heleketa hi kutsaka, ni tisimu, ni zitende, ni magubhu?

²⁸A ku nzi nyikangi ni xikhati xa kuva nzi pswopswa a vana va mina va xinuna ni va xisati; u lo zi maha hi wupumbu.

²⁹Zi le ntanweni wa mina ku ku lamata; kanilezi Nungungulu wa raru wa wena i wulawulile ka mina atolo ni wusiku, aku: Ti wonele, u nga wulawuli ka Jakobe kusasa hambu kubiha.

³⁰Loku hakunene u famba, kota u xuvileko kuya ndlwini ka raru wa wena, makunu u yivele yini vanungungulu va mina ke?

³¹Jakobe i lo hlamula, aku ngalo ka Labani: Nzi wo chava lezaku u nga nzi wutlela a vana va wena.

³²Kasike loku ku hi loye a ta nga kumiwa ni vanungungulu va wena a nga faneli ku hanya; langutisisa kuwoneni ka maxaka ya hina a zilo za wena lezi zi nga na mina, u zi teka. Makunu Jakobe i wa nga zi tivi lezaku Rakeli i wa va yivile.

³³Labani i lo enghena tendeni ga Jakobe, ni lomu tendeni ga Lea ni lomu tendeni ga malanza ya xisati ya mambiri; a nga kumangi nchumu. I lo huma lomu tendeni ga Lea a enghena lomu tendeni ga Rakeli.

³⁴Makunu Rakeli i wa tekile a materafime a ma tumbeta lomu ka xigabhatsa xa kameli a xi tshamela. Labani i lo lavisisa kontlhe lomu tendeni, kanilezi a nga ma kumangi.

³⁵Zonake Rakeli i te ngalo ka raru wakwe: Ngha a hosi ya mina yi nga zangari loku nzi nga suki nzi yima mahlweni ka wena; hi lezaku nzi lomu ka mukhuwo wa vavasati. Yena i lo lavisisa kanilezi a nga ma kumangi a materafime lawo.

³⁶Jakobe i lo zangara a holova na Labani, aku ngalo kakwe: Wu kwihi a nanzu wa mina? Hi xihi xihoxo xa mina xo kala u nzi lanza na u zangarile?

³⁷Laha ko kala u hanzela zontlhe zibya za mina, u kumile zilo muni za yindlu ya wena? Xi veke laha mahlweni ka vamakabye va mina ni vamakabye va wena, kasi vona va fela ku lamula xikari ka hina vambiri.

³⁸A ka malembe laya ya 20 na nzi tshama ka wena, a tiyivu ta wena ni timbuti ta wena a ti handlangi; ni tihamba ta ntlhambi wa wena mina a nzi gangi.

³⁹Leti ti nga wa tobyiwa hi zivanza nzi wa nga ti nehi ka wena, nzi wo ti riha; na wena u wo ti wutisa canjeni ga mina, hambu loku ti yibyiwa ni mumu, kutani ti yibyiwa ni wusiku.

⁴⁰Nzi wa maha kota lezo; nzi wo pswhumulwa hi kuhisa ka mumu, ni laha wusikwini nzi wo khanyana hi xirami, nzi vumala ni wurongo.

⁴¹A 20 wa malembe laya nzi nga wa ku tirela lomu ndlwini ya wena; a 14 wa malembe nzi lo tirela a vana va wena va vambiri, ni ntlhanu wa malembe ni ginwe nzi lo tirela a zifuyo za wena; hambu lezo u tlhela u hunzulusa a hakhelo ya mina khume ga zikhati.

⁴²Loku ku wa nga hi lezi a nga na mina Nungungulu wa dadani, ni Nungungulu wa Abrahama, loyi Isaka a mu chavako, ngha u lo nzi fambisa na nzi nga hi na nchumu. Nungungulu i wonile a kuxaniseka ka mina, ni mitiro ya mandla ya mina, a kala a ku kawuka atolo ni wusiku.

⁴³Labani i lo hlamula, aku ngalo ka Jakobe: Lava vanhwana mbanhanyana va mina, ni lava mbazukulu va mina, ni lezi zifuyo zifuyo za mina, ni lezi zontlhe u zi wonako za mina; hikwalaho nzi ta maha yini mina nyamutlha ka lava vanhwana va mina ni zivanana zabye lezi va belekileko ke?

⁴⁴Ntsena ngha hi maha xivumelwano, mina na wena, lexi xi ta ngava wukustumunyu xikari ka mina na wena.

⁴⁵Jakobe i lo teka ribye, a gi yimisa gi maha mhinga.

⁴⁶Jakobe i te ngalo ka vamakabye vakwe: Vingeretelani maribye; va lo teka maribye va maha xitsunzulu; vona va loga laho xitsunzulwini.

⁴⁷Zonake Labani i lo gi chula lego wutshamu ku Jegar sahaduta; kanilezi Jakobe i lo gi chula ku ngalo Galedi.

⁴⁸Labani i te ngalo: Makunu lexi xitsunzulu i kustumunyu xikari ka mina na wena. Hikwalaho a vito ga xona gi chulwa ku ngalo hi Galedi;

⁴⁹kambe xi lo vitanwa ku ngalo hi Mizpa; hakuva i te ngalo: Jehova a cuwuke xikari ka mina na wena, lezi hi to hambana munwe ni munwani.

⁵⁰Loku wena u xanisa a vana va mina, ni loku wena u teka vanwani vasati lahandle ka vana va mina, hambu loku ku nga hi na munhu, languta Nungungulu i kustumunyu xikari ka mina na wena.

⁵¹Labani i lo engeta aku ka Jakobe: Languta lexi xitsunzulu, cuwuka leyi mhinga leyi nzi yi yimisileko xikari ka mina na wena;

⁵²lexi xitsunzulu ngha xi hi kustumunyu, ni leyi mhinga ngha yi hi kustumunyu, lezaku nzi nga hunzi lexi xitsunzulu nzita ka wena, ni lezaku wenawu u nga hunzi lexi xitsunzulu ni leyi mhinga, uta ka mina hi wulala.

⁵³Nungungulu wa Abrahama, Nungungulu wa Nahori, ni Nungungulu wa vararu vabye, a lamule xikari ka mina na wena. Jakobe i lo hlambanya hi loyi a chabyiwako hi Isaka.

⁵⁴Jakobe i lo tlhava tihomu laho xitsungeni, i lo vitana vamakabye vakwe ku ta ga zakuga; va loga kuga loko, va tshama xitsungeni lego wusiku.

⁵⁵Labani i lo vuka ni mixo, i lo pswopswa vazukulu vakwe ni vanana vakwe, a va katekisa; zonake i lo suka a tlhelela kaya kakwe.