Read tshwa Genesisi 32 Bible Online

Genesisi 32 - tshwa bible

Genesisi 32

¹Jakobe i lo famba ndlela yakwewo, ni tingelosi ta Nungungulu ti lo tlhangana na yena.

²Laha Jakobe a nga ti wona i te ngalo: Hi leyi yimpi ya Nungungulu; i lo chula vito ga wutshamu lego ku Mahanaime. [52]

³Jakobe i lo rumela mitsumi mahlweni kakwe a kuya ka Esau nakulobye le tikweni ga Seire, tikweni ga le Edomi.

⁴I lo va laya aku ngalo kabye: Mu byeleni Esau hosi ya mina, muku ngalo: A nanza ga wena Jakobe gi ngalo, nzi wa tshamile ka Labani nzi luvela kala lexi xikhati.

⁵Nzi na ni timbongola, ni tihomu, ni tiyivu, ni malanza ya xinuna ni ya xisati; makunu nza ruma ku ta bika ka hosi ya mina, kasi nza kuma thomo mahlweni ka wena.

⁶A mitsumi yi tlhelela ka Jakobe yi yaku ngalo: Hi wa chikele ka nakuloni Esau; yenawu wata ku ku khinga, i na ni vavanuna va 400.

⁷Zonake Jakobe i lo chava nguvu, a karateka; i lo avanyisa a vanhu lava a nga wa hi navo, ni tiyivu, ni tihomu, ni makameli, i lo maha mitlawa mimbiri.

⁸Aku: Loku Esau a ta hlasela munwani tlawa, wu ta pona a tlawa lowu wu seleko nzhako.

⁹Jakobe i te ngalo: Nungungulu wa dadani Abrahama, ni Nungungulu wa dadani Isaka, wena Jehova loyi u nga nzi byela ku ngalo: Tlhelela tikweni ga nwina, ni le maxakeni ya wena, nzi ta ku mahela zinene;

¹⁰a nzi faneli ka gontlhe wuxinji ga wena, ni ka zinene za wena, lezi u zi maheleko a nanza ga wena; hakuva nzi lo tlhatuka loyi Jordani na nzi hi ni nhonga ya mina basi, makunu lezi nzi mitlawa mimbiri.

¹¹Nzi ponise canjeni ga nakulori, kona canjeni ga Esau; hakuva nza mu chava, ku nga taku a nzi daya zinwe ni vanyine ni vanana.

¹²Hi wena u nga wula ku ngalo: Nza tiyisa lezaku nzi ta ku mahela zinene, nzi ta maha a pswalo wa wena wu kota a seke ga bimbi gi nga hiko na kuhlayiwa.

¹³I lo etlela laho lego wusiku. I lo hlawula xikari ka lezi a nga wa hi nazo kasi ku maha xinyikiwo ka nakulobye zi nga lezi:

¹⁴200 wa miphaphakazi, 20 wa timhongo, 200 wa tiyivu, ni 20 wa tihamba,

¹⁵ni 30 wa makameli laya ma anwisako ni marole ya wona, ni 40 wa mapswele ya tihomu, ni 10 wa tikuzi, ni 20 wa mapswele ya timbongola, ni 10 wa marole.

¹⁶I lo zi nyikela mandleni ya malanza yakwe, a ntlhambi munwe ni munwani; i te ngalo ka malanza yakwe: Rangani muya mahlweni, mu tsawukanisa a ntlhambi kuva ni vango laha xikari.

¹⁷I lo leletela loyi wo ranga aku ngalo: Loku Esau nakulori a tlhangana na wena, a ku wutisa ku ngalo: U wa ka mani? Uya kwihi? Lezi zi nga mahlweni ka wena za mani ke?

¹⁸Zonake u taku ngalo: Za Jakobe, a nanza ga wena; xinyikiwo a rumelako ka hosi ya mina Esau; languta, yenawu wata a nzhako ka hina.

¹⁹Zinghaho i lo laya ni ga wumbiri, ni ga wunharu, ni vontlhe lava va lanzelako mitlhambi leyo, i te ngalo kabye: Mu ta wula zalezo ka Esau loku mu kumana naye.

²⁰Mu ta ya wula niku ngalo: Languta, a nanza ga Wena Jakobe i kona le nzhako ka hina. Hakuva i ngalo: Nzi ta mu rulisa hi xinyikiwo lexi xi rangako mahlweni ka mina, zonake hi le nzhako nzi ta wona a nghohe yakwe, kutani i ta tlhangana na mina hi kurula.

²¹Zonake a xinyikiwo xi lo ranga mahlweni kakwe; yena i lo sala laho lego wusiku.

²²X lo suka hi gwalego wusiku, a teka vasati vakwe va vambiri, ni malanza yakwe ya xisati ya mambiri, ni vanana vakwe va khume ni munwe, i lo tlhatuka pelo ga Jaboke.

²³Yena i lo va tlhatukisa a congo, a tlhatukisa ni zontlhe lezi a nga wa hi nazo.

²⁴Jakobe i lo sala yece; laho i lo pfinyana ni munhu gi kala gica.

²⁵Laha a munhu wa kona a nga wona lezaku a nga zi koti ku mu hlula, i lo mu khumba laha nyongeni, a nyonga ya Jakobe yi lo khuyuka khwatsi hilezi va nga kari va pfinyana.

²⁶Yena i te ngalo: Nzi tsike nzi famba hakuva gi lava kuca. Jakobe aku ngalo: Nzi nga ta ku tsika u famba na u nga se nzi katekisa.

²⁷Yena i te ngalo: Hi wena mani vito ga wena ke? Yena i te ngalo: Hi mina Jakobe.

²⁸Yena i te ngalo: A vito ga wena gi nga ta ha vitanwa ku ngalo Jakobe, gi ta vitanwa ku ngalo hi wena Israeli; hakuva u pfinyene ni Nungungulu ni vanhu, u hlulile.

²⁹Jakobe i lo mu wutisa, aku ngalo: Nzi byele a vito ga wena. Yena aku ngalo: U nzi wutisela yini a vito ga mina ke? Yena i lo mu katekisa kwalaho.

³⁰Jakobe i lo chula a vito ga wutshamu lego ku Penueli; hakuva i te ngalo, Nzi wonile Nungungulu nghohe hi nghohe, hambu zi hi tano a wutomi ga mina gi lonzowotilwe.

³¹Na a ha tlhatuka Penueli a gambo gi lo tsuwuka, na yena i wo khwita hi nyonga yakwe.

³²Hikwalaho a vanana va ka Israeli a vagi a siha wa laha nyongeni, lowu wu nga laha ka gunyungu kala nyamutlha; hakuva Jakobe i lo khumbiwa hi wona siha lowo wa laha ka gunyungu.