Read tshwa Genesisi 33 Bible Online

Genesisi 33 - tshwa bible

Genesisi 33

¹Jakobe i lo tlakusa mahlo yakwe a wona Esau a kari ata ni 400 wa vavanuna. Yena i lo hambanyisa Lea na Rakeli ni malanza ya xisati ya mambiri ni vanana vabye.

²Zonake i lo rangisa mahlweni a malanza ya xisati ni vanana vabye. Lea ni vanana vakwe hi le nzhako, na Rakeli na Josefa hi le nzhako nguvu.

³Yena i lo ranga mahlweni kabye, a korama ntlhanu wa zikhati ni zimbiri, kala a tshinela kusuhani ka nakulobye.

⁴Esau i lo tsutsuma a mu khinga, a ya mu wukarela lomu nhanweni yakwe a mu pswopswa; va lo rila.

⁵Esau i lo tlakusa mahlo yakwe, a wona vavasati ni vanana, i te ngalo: Mbamani lava u nga navo ke? I lo hlamula aku: Hi vanana lava Nungungulu hi wuxinji gakwe a nyikileko a nanza ga wena.

⁶Ku lo tshinela malanza ya xisati ni vanana vabye, va lo ti koramisa.

⁷Ku lo tshinela Lea ni vanana vakwe va ta korama; hi le nzhako ku lo tshinela Josefa na Rakeli, vonawu kambe va lo ta ti koramisa.

⁸Esau i te ngalo: U wula yini hi mitlawa leyi nzi tlhangeneko nayo ke? Jakobe aku: Kasi nza kuma thomo mahlweni ka hosi ya mina.

⁹Esau i te ngalo: Nzi na ni zinyingi, nakulori wanga; lezo u nga nazo a zive za wena.

¹⁰Jakobe i lo hlamula aku: Ahihi, loku mina nzi kumile thomo mahlweni ka wena, amukela xinyikiwo xa mina; hakuva nzi wonile a nghohe ya wena kotisa loyi a wonileko a nghohe ya Nungungulu, u nzi amukela hi kurula.

¹¹Maha wuxinji u amukela xinyikiwo xa mina lexi xi nehilweko ka wena, hakuva Nungungulu i nzi mahele wuxinji, ni lezaku nzi na ni zo tala. Yena i lo mu khongotela kala a amukela.

¹²Esau i te ngalo: A hi sukeni hi famba, nzi ta famba na wena.

¹³Jakobe i lo hlamula aku: A hosi ya mina ya zi tiva lezaku a vanana va tsongwani, ni lezaku ku tele tihomu ni tiyivu leti ti anwisako; ni loku va ti gula hi siku ginwe, a ntlhambi wontihe wu tafa.

¹⁴Ngha hosi ya mina yi ranga mahlweni ka nanza ga yona; mina nzi ta ti hlenga khwatsi, kota kufamba ka tihomu ni kota kufamba ka vanana, nzi kala nzi chikela ka hosi ya mina le Seire.

¹⁵Esau i te ngalo: Ngha mina nzi ku siya ni vanwani vanhu va mina. Yena aku ngalo: Hi kota ya yini xana? Zi enele loku nzi kuma thomo mahlweni ka hosi ya mina.

¹⁶Zinghaho hi lego siku Esau i lo tlhela a famba le Seire.

¹⁷Jakobe i lo suka a famba le Sukote, laho i lo ya aka yindlu yakwe, i lo aka ni maranga ya tihomu; hikwalaho a vito ga lego wutshamu gi lo chulwa ku ngalo hi Sukote.

¹⁸Jakobe i lota hi kurula a mutini wa Xekemi, lowu wu nga tikweni ga le Kanani, na hata hi le Padanaramu; i lo gwimba tenda gakwe mahlweni ka muti.

¹⁹I lo xava xipetso lexo a nga gwimba a tenda, gakwe ka xona, a humesa a 100 ga makesita ka vanana va ka Hamori, a raru wa Xekemi.

²⁰Laho i lo aka a alati, i lo gi chula ku ngalo hi El-Elohe-Israeli.