Read tshwa Genesisi 34 Bible Online

Genesisi 34 - tshwa bible

Genesisi 34

¹Zonake Dina a nhanyana wa Lea, loyi a nga pswalele Jakobe, i lo huma ku ya wona a vanhanyana va lego tiko.

²Xekemi a nʼwana Hamori a muHivi, a hosi ya tiko, i lo mu wona a mu teka, a etlela naye, a mu xakela.

³A mbilu yakwe yi lo namarela ka Dina, a nhanyana wa Jakobe, i lo mu ranza loyi wa nhanyana, a xalalisa a mbilu yakwe.

⁴Xekemi i te ngalo ka Hamori a raru wakwe: Nzi tekele loyi nhanyana a maha sati wa mina.

⁵Jakobe i lozwa lezaku va xakele a nhanyana wakwe Dina; kanilezi i lo miyela a vafana vakwe va kala va wuya hi le tihonwini le mikoveni.

⁶Zonake ku lo suka Hamori, a raru wa Xekemi, aya ka Jakobe a ku ya wulawula naye.

⁷Laha a vafana va Jakobe va nga wuya hi le mikoveni na va zi zwile va lo zangara va xaniseka nguvu, hakuva Xekemi i wa mahile kubiha ka Israeli, hi ku etlela ni nhanyana wa Jakobe, lezi zi nga faneliko ku maheka.

⁸Hamori i te ngalo kabye: A mbilu ya nʼwana wa mina Xekemi yi namarela ka nhanyana wa nwina; hikwalaho nza mu kombela, mu nyikeni a maha sati wakwe.

⁹Tekanani na hina, mu hi nyika vanhanyana va nwina, nwinawu mu teka vanhanyana va hina.

¹⁰Mu ta tshama na hina, ni tiko gi ta lumba nwina; akani, mu xaviseiana, mu fuya ka gona.

¹¹Xekemi i te ngalo ka raru wa Dina, ni ka vamakabye vakwe: Ngha mina nzi kuma thomo mahlweni ka nwina. Wulani, kani hi xihi mu ta nga nzi byela nzi ta mu nyika.

¹²Vitanani ka mina ni wihi a nzowolo ni xinyikiwo, nzi ta mu nyika kota lezi mu ta nga wula ka mina; ntsena nzi nyikeni a nhwana loyi a maha sati wa mina.

¹³A vana va Jakobe va lo hlamula Xekemi ni raru wakwe Hamori hi ku va khohlisa, hi kota ya lezi a nga xakela Dina a makabye wabye.

¹⁴Va te ngalo kabye: A hi na ku nyikela makabye wa hina ka khuna; hakuva lexo manyala ka hina.

¹⁵Kanilezi i chukwana hi vumelana ka tlhelo legi lezaku mu kota hina; va enghena wukwera vontlhe vavanuna xikari ka nwina.

¹⁶Zonake hi ta mu nyika a vanhanyana va hina, hinawu hi ta teka a vanhanyana va nwina, hi tshama na nwina, hi maha va tiko ginwe.

¹⁷Kanilezi loku mu nga vumeli ku mahiwa mikwera, zonake hi ta teka nʼwana wa hina hi famba.

¹⁸A timhaka tabye ti lo xalalisa Hamori, na Xekemi a nʼwana Hamori.

¹⁹A jaha lego a gi hlwelangi a ku maha lezo zilo, hakuva i wa mu ranza nguvu nwa Jakobe; na yena i wa hi wahombe lomu ndlwini yontlhe ya raru wakwe.

²⁰Hamori na Xekemi, a nʼwana wakwe, ya loya hubyeni ya muti wabye, va ya wulawula ni vanhu va muti wabye, vaku:

²¹A vanhu lava va nga kona xikari ka hina mbanhu vo rula, a va ake lomu tikweni, va maha mabhinzu yabye; na mu wona lezaku a tiko legi gi nga mahlweni kabye ga hombe. A hi tekeni a vanhanyana vabye va maha vasati va hina, hinawu hi va nyika vanhanyana va hina.

²²Ntsena lezaku lava vanhu va nga vumela ku tshama na hina, hi maha lixaka linwe, loku a vavanuna vontlhe va ka hina va maha mikwera; kota lezi vona va mahileko.

²³Xana mitlhambi yabye, ni titshomba tabye, ni tontlhe tihomu tabye zi nga tava za hina ke? A hi vumeleni lezi va zi wulako basi, kasi va fela ku tshama na hina.

²⁴Zonake vontlhe lava va humako hubyeni ya muti wa Hamori, va lo vumela timhaka ta Hamori na Xekemi a nʼwana wakwe; vontlhe vavanuna lava va nga wa akile mutini wakwe va lo mahiwa mikwera.

²⁵Zonake hi siku ga wunharu, laha va nga wa hi le kubayisekeni, vafana vambiri va Jakobe, Simoni na Levi, a vamakabye va Dina, loyi ni loyi i lo teka supado yakwe, va lo ya enghena mutini na va nga tibyiwi, va lo daya vontlhe vavanuna.

²⁶Va lo daya Hamori na Xekemi a nʼwana wakwe hi supado, va lo teka Dina lomu ndlwini ya Xekemi va famba naye.

²⁷A vafana va Jakobe va lo wuya ka lava va va deleko va ta phanga muti, hi kota ya lezi va xakeleko a makabye wabye.

²⁸Va lo phanga tiyivu tabye, ni timbongola tabye, ni zontlhe lezi zi nga wa hi lomu mutini ni za lahandle,

²⁹Va lo phanga ni yontlhe tshomba yabye, ni vontlhe vanana vabye, ni vasati vabye ni zontlhe lezi zi nga hi lomu tindlwini.

³⁰Jakobe i te ngalo ka Simoni na Levi: Mu nzi gisile mihumbo, mu nzi mahile xinyenyeko ka vanhu va tiko legi, ni ka maKanani, ni ka maPerezi, na ha hi vatsongwani; va ta so tsombana va nzi hlasela, nzi lova ni yindlu ya mina.

³¹Vona va te ngalo: Saseka ku mu maha kota xibhayi a makabye wa hina ke?