Read tshwa Genesisi 44 Bible Online

Genesisi 44 - tshwa bible

Genesisi 44

¹Josefa i lo leletela a nekwa ya yindlu yakwe, aku: Cheletela zakuga lomu tisakweni ta vanhu lava, kotisa wukulu ga tona, u tlhelisa a mali yabye vontlhe, u yi chela lomu milonwini ya tisakwa tabye.

²U enghenisa a gombe ga mina ga siliva nonwini wa sakwa ya loyi wa tsongwani zinwe ni mali yakwe ya ku ta xava mavele. Yena i lo maha kota lezi Josefa a mu leleteleko.

³Laha gi nga wa cile, a vanhu va lo fambiswa ni timbongola tabye.

⁴Laha na va ha ku huma laha mutini, na va nga se famba kule, Josefa aku ka nekwa ya yindlu yakwe; Suka u lanza a vanhu lava, loku u va kuma u taku ka vona: Hikuyini mu tlhelisela a kusaseka hi kubiha?

⁵A hi gona a gombe legi mu tekileko a hosi yi nwako ha gona, ni ku hlahluva ha gona ke? Mu onhile hi lezi mu mahileko.

⁶Laha na a va kumile i lo va byela timhaka leto.

⁷Vaku kakwe: Hikuyini a hosi ya hina yi wula timhaka ta kunghahi? A zive kule ni malanza ya wena a ku maha a zilo za kunghaho!

⁸Cuwuka, a mali leyi hi nga yi kuma milonwini ya tisakwa ta hina hi tlhelile hi yi neha ka wena, xikhati lexi hi ngata hi le Kanani; makunu hi nga mahisa kuyini a ku yiva a siliva kutani nzalama lomu ndlwini ya hosi ya wena?

⁹Kani hi wihi wa malanza ya wena gi ta nga kumiwa ka yena a dawe, hina hontlhe hi tava tikhumbi ta hosi ya wena.

¹⁰A nekwa yiku: Hi zona, a zi maheke kota kuwula ka nwina; a munhu loyi gi ta nga kumiwa ka yena, yaloye i tava khumbi ya mina, nwina nwentlhe mu nga tava ni nanzu.

¹¹Zinghaho vontlhelele va lo hatlisa ku rula tisakwa tabye, va ti tlhatlha.

¹²A nekwa yi lo lavisisa, a sangula hi ka nhonzo kala a chikela ka loyi wa nzisana, zonake a gombe gi lo kumiwa lomu sakweni ya Benjamini.

¹³Vona va lo hanzula tinguwo tabye, zonake vontlhelele va lo rwexa timbongola tabye va tlhelela mutini.

¹⁴Juda ni vanakulobye va lo ya enghena lomu ndlwini ya Josefa, hakuva i wa hi kona, va lo ti wisa lahasi mahlweni kakwe.

¹⁵Josefa aku kabye: Hikuyini mu maha lezi? A mu zi tivi lezaku a munhu wo kota mina wa zi kota ku vumba ke?

¹⁶Juda aku: Hi ta kuyini ka hosi ya mina? Hi ta wula yini? Hi ta ti hlaza hi yini? Nungungulu i wonile a kubiha ka malanza ya wena. Hina hi tikhumbi ta hosi ya hina, hina ni munhu loyi a gombe gi kumilweko sakweni yakwe.

¹⁷Kanilezi Josefa aku ka vona: Cima tua nga ta maha lezo. A munhu loyi a gombe gi kumilweko canjeni gakwe, yaloye i tava khumbi ya mina; kanilezi nwina nwentlhe ti fambeleni hi kurula ka raru wa nwina.

¹⁸Zonake Juda i lo tshinela kusuhani ka Josefa, aku: O! hosi yanga, ngha a nanza ga wena gi wula gezu ginwe tindleveni ta hosi ya mina; ngha a zanga ya wena yi ngave hehla ka nanza ga wena, hakuva wena u ecana na Faro.

¹⁹A hosi ya mina yi lo wutisa malanza ya yona, yiku: Mu na ni raru kutani nakuloni ke?

²⁰Hina hi te ngalo ka hosi ya mina: Hi naye raru, yena xikhosana, ni nʼwana loyi a nga mu beleka wukhosaneni gakwe, wa nzisana; ni nhonzo yakwe a yi kona, hi yena yece a seleko lomu ndlwini ya nyine wabye, hikwalaho dadani wa mu ranza nguvu.

²¹Zonake wena u te ngalo ka malanza ya wena: Mu neheni nzi ta mu wona hi mahlo.

²²Hina hi te ngalo ka hosi ya hina: A mufana a nga zi koti ku hambana ni raru wakwe, hakuva loku yena a suka ka dadani wakwe, dadani a ngafa.

²³U te ngalo ka malanza ya wena: Loku mu nga wuyi ni nzisana ya nwina cima mu nga ta ha wona a nghohe ya mina.

²⁴Laha hi nga tlhela hiya ka nanza ga wena, a raru wa hina, hi lo mu hlawutela a timhaka ta hosi ya mina.

²⁵Dadani i te ngalo ka hina: Tlhelani kambe mu ya hi xujela zakuganyana.

²⁶Hina hi te ngalo kakwe: Hi nga ta zi kota ku tlhela hiya kambe; loku a nakulori wa hina wa tsongwani a nga fambi na hina, hi ta fambisa kuyini, hakuva loku hi nga fambi naye, cima hi nga ta zi kota ku wona a nghohe ya munhu loye.

²⁷Makunu a nanza ga wena, a raru wa hina, i te ngalo ka hina: Ma zi tiva lezaku a sati wa mina i lo beleka varisanyana vambiri.

²⁸Munwani i lo suka ka mina, mina nzi alakanya lezaku i pfhemulwe hi zivanza; kusukela lezo a nza ha mu wonangi kambe.

²⁹Hikwalaho loku mu nzi tekela ni loyi, kutani a kumiwa hi timhango, nwina mu ta relelisa a wuvu ga hloko ya mina hi xiviti le nkeleni.

³⁰Makunu loku nzi tlhela ka nanza ga wena, a raru wa hina, na nzi nga hi na mufana loyi, loyi a wutomi ga raru wa hina gi bohilweko hi wutomi gakwe;

³¹laha a ta nga wona lezaku a mufana a nga kona, zalezo i tafa, zonake hina malanza ya wena hi ta relelisa a wuvu ga hloko ya raru wa hina nkeleni na a hi ni xiviti.

³²Hakuva mina nzi ti bohile ka dadani hi kota ya mufana loyi, nzi te ngalo: Loku nzi nga wuyi naye ka wena, nzi tava ni nanzu a masiku wontihe ya kuhanya ka mina.

³³Hikwalaho nza ku khongotela lezaku u vumela a nanza ga wena gi sala gi maha khumbi, wutshanwini ga mufana loyi, nzi maha khumbi ya hosi ya mina, a mufana a famba ni vanakulobye.

³⁴Hakuva nzi ta fambisa kuyini ka dadani, na nzi nga hi na mufana loyi? Ku nga taku nzi wona a khombo legi gi ta nga humelela ka dadani.