Read tshwa Genesisi 45 Bible Online

Genesisi 45 - tshwa bible

Genesisi 45

¹Zonake Josefa i wa nga zi koti ku ti khoma mahlweni ka vona vontlhe lava va nga wa mu ranzele, i lo kanyuluka, aku: Vontlhe vanhu lava va nga laha a va hume! Ku wa nga hi kona munhu a nga sele naye laha a nga ti tivekisa ka vanakulobye.

²Zonake i lo tlakusa a gezu gakwe i lo rila; ni vaGipite va lo zizwa zinwe ni yindlu ya Faro.

³Josefa aku ka vanakulobye: Hi mina Josefa! Dadani wa hanya ke? A vanakulobye va lo tsanzeka ni ku mu hlamula, hakuva va lo dzuka mahlweni kakwe.

⁴Josefa aku ka vanakulobye: Tshinelani ka mina! Va lo tshinela. Aku: Hi mina Josefa, a nakuloni loyi mu nga mu xavisa, nzita seno Gipite.

⁵Makunu mu nga bayiseki timbilu, mu xaniseka hi kota ya lezi mu nga nzi xavisa nzita seno, hi lezaku Nungungulu i nzi rumile nzi mu rangela, a ku ta hanyisa wutomi ga vanhu.

⁶Hakuva malembe mambiri laya a ndlala na yi hi kona lomu tikweni; ka ha sele a ntlhanu wa malembe laya ku to kala ku nga Timiwi hambu ku tshovela nchumu ka wona.

⁷Nungungulu i lo nzi rumela mahlweni ka nwina ku ta mu ponisa laha misaveni, ni ku ta mu hlanguta hi kupona loku ka hombe.

⁸Hikwalaho a hi nwina mu nzi rumeleko seno, hi Nungungulu a nzi mahileko nziva raru wa Faro, tlhelo hosi ya yindlu yakwe yontlhe, ni mufumeli wa tiko gontlhe ga Gipite.

⁹Hatlisani mu ya ka dadani, mu yaku ngalo kakwe: A nʼwana wa wena Josefa i te ngalo: Nungungulu i nzi mahile hosi ya Gipite gontlhe; relela uta seno ka mina, u nga hlweli.

¹⁰U ta ta aka tikweni ga le Goxeni, u tava kusuhani na mina, ni vana va wena, ni vazukulu va wena, ni tiyivu ta wena, ni tihomu ta wena, ni zontlhe lezo u nga nazo.

¹¹Nzi ta ku wundla kona, hakuva ka ha sele ntlhanu wa malembe ya ndlala; ku nga taku u kiyelelwa wena ni ngango wa wena, ni vontlhe lavo u nga navo.

¹²Ma zi wona hi mahlo ya nwina, na Benjamini a nzisana ya mina, i zi wonile hi mahlo yakwe, lezaku hi nomu wa mina lowu nzi wulawulako na nwina.

¹³Mu ta ya byela dadani hi wuhosi ga mina gontlhe ga lomu Gipite, ni zontlhe lezi mu zi wonileko; hatlisani mu neha dadani seno ka mina.

¹⁴Zonake i lo wela nhanwini ya nzisana yakwe, a rila; yenawu Benjamini i lo rila nhanwini yakwe.

¹⁵I lo pswopswa ni vanakulobye vontlhe, a rila navo; anzhako ka lezo a vanakulobye va lo wulawula naye.

¹⁶Laha a mubiko wa timhaka leto wu nga chikela ka Faro, lezaku a vanakulobye va Josefa va tile, Faro ni malanza yakwe va lo xalala.

¹⁷Zonake Faro aku ka Josefa: Byela vanakuloni uku: Mahani lezi; rwexani timbongola ta nwina, mu famba tikweni ga le Kanani;

¹⁸mu ta ya wuya ni raru wa nwina, ni mingango ya nwina, seno ka mina; nzi ta ta mu nyika tiko ga gi nene ga Gipite, muga kunona ka tiko.

¹⁹Makunu nzi ku layile, u taku: Mahani lezo; tekani tikareta ta lomu tikweni ga Gipite, leti ti nga ya rwala a vana va nwina ni vasati va nwina, mu wuya ni raru wa nwina seno.

²⁰Mu nga kanakani hi tinhunzu ta nwina, hakuva zontlhe lezi zi sasekileko za lomu tikweni ga Gipite, za nwina.

²¹A vana va Israeli va lo maha lezo; Josefa i lo va nyika tikareta hi kulaya ka Faro, i lo va longisela timbuva ta ndlela.

²²I lo nyika ka munwe ni munwani a nguwo ya mubuzo, kanilezi ka Benjamini i lo mu nyika 300 wa maxekeli ya siliva, ni ntlhanu wa tinguwo ta mubuzo.

²³A ka raru wakwe i lo rumela a khume ga timbongola, na ti rwele a zilo zo saseka za tiko ga Gipite, ni khume ga mapswele ya timbongola, na ti rwele mavele ni zibaba ni timbuva ta raru wakwe laha ndleleni.

²⁴Zonake i lo tlhelisa vanakulobye va famba; yena aku kabye: Mu nga holovi laha ndleleni.

²⁵Vona va suka le Gipite, va lo ya chikela tikweni ga Kanani, ka Jakobe a raru wabye.

²⁶Zonake va lo ya mu byela ku ngalo: Josefa wa hanya; hi yena a nga hosi lomu tikweni gontlhe ga Gipite. Kanilezi a mbilu ya Jakobe yi lo mbhela ntamu, hakuva i wa nga kholwi ha vona.

²⁷Va lo mu hlawutela timhaka tontlhe leti Josefa a nga va byelile. Makunu laha a nga wona tikareta leti Josefa a nga wa mu rumele ku ta mu teka ha tona, a moya wa Jakobe a raru wabye wu lo vuxiwa.

²⁸Zonake Israeli aku: Ku enele! A nʼwana wa mina wa hanya; nzi taya nzi ya mu wona na nzi nga se kufa.