Read tshwa Genesisi 47 Bible Online

Genesisi 47 - tshwa bible

Genesisi 47

¹Zonake Josefa i lo ya bika ka Faro, aku ka yena: Dadani i chikele ni vanakulori, ni tiyivu tabye, ni tihomu tabye, ni zilo zontlhe lezi va nga nazo, vata hi le Kanani; makunu va kona le tikweni ga Goxeni.

²I lo hlawula ntlhanu wa vanakulobye a famba navo mahlweni ka Faro.

³Faro aku ka vanakulobye va Josefa: Mitiro ya nwina nja yini? Vaku ka Faro: Malanza ya wena mbarisi, hambu ni vararu va hina kambe.

⁴Vaku ka Faro kambe: Hi tela ku ta luvela lomu tikweni legi, hakuva a ga hi kona wuriselo ga mitlhambi ya malanza ya wena, hi kota ya ndlala yi tikileko le tikweni ga Kanani; hikwalaho ha ku kombela lezaku a malanza ya wena ma vumelwa ku aka le tikweni ga le Goxeni.

⁵Faro i lo byela Josefa, aku: A raru wa wena ni vanakuloni va chikele ka wena:

⁶A tiko ga Gipite gi kona mahlweni ka wena; akisa a raru wa wena ni vanakuloni ka tiko go saseka nguvu; va akise tikweni ga le Goxeni. Loku va hi kona vavanuna vo tlhariha xikari kabye, va yimise a kuva varisi va tihomu ta mina.

⁷Zonake Josefa i lo neha Jakobe, a raru wakwe, ka Faro. Jakobe i lo losa Faro.

⁸Faro aku ka Jakobe: Malembe ya wutomi ga wena mangani ke?

⁹Jakobe aku ka Faro: A malembe ya wutomi ga mina i 130, kanilezi a malembe ya wutomi ga mina ma komile, ma tlhela ma biha; cima a nzi chikelangi malembeni ya vadadani va mina, xikhatini xa kuhanya kabye.

¹⁰Jakobe i lo salisa Faro, zonake i lo suka mahlweni kakwe.

¹¹Josefa i lo akisa a raru wakwe ni vanakulobye lomu tikweni ga Gipite; i lo va nyika wutshamu go nona tikweni ga Ramsesi, kota kuleletela ka Faro.

¹²Zonake Josefa i lo wundla raru wakwe ni vanakulobye, ni yontlhe a nghamu ya raru wakwe, hi ku va nyika zakuga zi ringanako ni kutala ka vanana vabye.

¹³Ku wa hi hava zakuga tikweni gontlhe, hakuva a ndlala yi wa tshingile nguvunguvu; lomu tikweni ga Gipite ni tikweni ga le Kanani va wa boteka hi ndlala.

¹⁴Zonake Josefa i lo hlengeletela mali yontlhe leyi yi nga wa hi lomu tikweni ga Gipite ni lomu tikweni ga Kanani, ya mavele lawa ma nga wa xabyiwa; i lo yi neha ndlwini ya Faro.

¹⁵Kanilezi laha na mali yi mbhelile tikweni ga Gipite ni tikweni ga le Kanani, a vaGipite vontlhe va lota ka Josefa, va taku: Hihe zakuga! Xana hi tafa mahlweni ka wena lezi hi mbhetileko mali ke?

¹⁶Josefa aku: Nehani mitlhambi ya nwina, nzi ta muha zakuga; matshanwini ya mali nzi ta xava tihomu ta nwina, lezi a mali yi mbhelileko.

¹⁷Zonake va lo neha mitlhambi yabye ka Josefa, yena i lo va nyika zakuga, va lo neha ni mahaxi, ni tiyivu, ni tihomu, ni timbongola, zonake i lo va hanyisa hi mavele gontlhe lego lembe, hi ku xava zifuyo zabye zontlhe.

¹⁸Laha na gi mbhelile lego lembe, va lota kambe ka yena, va taku: Hosi, hi nga ta fihla nchumu ka nwinyi wa hina; a mali ya hina yi mbhelile, ni zifuyo zi mbhelile, zontlhe zi tlhelele ka hosi ya hina; a ku salangi nchumu, a handle ka mimiri ni masimu ya hina basi.

¹⁹Xana hi tafa mahlweni ka wena, hina ni tiko ga hina ke? Ngha u hi xava hina ni masimu ya hina, hi tava tikhumbi ta Faro loku wa nga hi nyika mbewu kasi hi ta hanya hi ngafi, kasi a masimu ya hina ma nga hunzuki ma maha xiwula.

²⁰Hikwalaho Josefa i lo xava a tiko gontlhe ga Gipite gi maha ga Faro: hakuva a vaGipite vontlhe va lo xavisa masimu yabye hi kota ya ndlala hakuva a ndlala yi wa va xanisa: zonake a tiko gontlhe gi lo lumba Faro.

²¹Hi tlhelo ga vanhu i lo va susa a va yisa mitini, kusukela ka tlhelo ginwani ga Gipite kala ka ginwani tlhelo ga kona.

²²Ntsena a tiko ga vapristi a nga gi xavangi, hakuva a vapristi va wa hi ni xiavelo xabye, va nga wa nyikwa hi Faro: hikwalaho a va xavisangi masimu yabye.

²³Zonake Josefa aku ka vanhu: Nzi mu xavile mu maha vanhu va Faro, nwina ni masimu ya nwina. Makunu a mbewu ya nwina hi leyi, fambani mu ya rima masimu.

²⁴Zonake a siku ga kutshovela, a xirunzu xa wuntlhanu mu ta nyika Faro, lezi za mune zi tava za nwina, mu ta ti vekela mbewu leyi mu ta nga byala ha yona, ni kuga nwina ni mingango ya nwina ni vanana va nwina.

²⁵Vona vaku: U hi hlayisile! Ngha hi kuma thomo mahlweni ka hosi ya hina, hina hi ta kuva tikhumbi ta Faro.

²⁶Hikwalaho Josefa i lo veka nayo tikweni gontlhe ga Gipite kala inyamutlha, lezaku Faro a nyikiwa xipanze xa wuntlhanu, ntsena a tiko ga vapristi goce, hakuva gi wa nga hi ga Faro.

²⁷A vaIsraeli va lo aka tikweni ga Gipite le tikweni ga Goxeni; laho va lo fuya, va tala, va enzelekelana nguvu.

²⁸Jakobe i lo hanya lomu Gipite 17 wa malembe; zinghaho a masiku ya wutomi gakwe ma wa hi 147 wa malembe.

²⁹Laha a xikhati xa kufa ka Israel xi nga wa tshinele, yena i lo vitana Josefa nʼwana wakwe, aku ka yena: Loku mina nzi kumile thomo mahlweni ka wena, enghenisa a canja ga wena lahasi ka hangaswa ga mina, u nzi mahela hi liranzo ni kutsumbeka, lezaku u nga nzi lahli lomu Gipite.

³⁰Loku nzi etlela ni vadadani va mina, u ta nzi susa lomu Gipite u ya nzi lahla tsizeni gabye. Josefa aku: Nzi ta maha kota kuwula ka wena.

³¹Israel aku: Hlambanya mahlweni ka mina. I lo hlambanya mahlweni kakwe. Zonake Israeli i lo korama laha tihlokweni ta mubhedi wakwe.