Read tshwa Genesisi 48 Bible Online

Genesisi 48 - tshwa bible

Genesisi 48

¹Anzhako ka lezo zilo, va lo byela Josefa vaku: A raru wa wena wa babya. Yena i loya zinwe ni vana vakwe va vambiri, Manasse na Efraime.

²Jakobe i lo bikelwa lezaku: A nʼwana wa wena Josefa wata ka wena. Zonake Israel i lo ti tiyiseta, i lo tshama laha mubhedini.

³Jakobe aku ka Josefa: Nungungulu wa Ntamu Wontihe i lo woneka ka mina le Luzi, tikweni ga le Kanani, a nzi katekisa,

⁴aku ka mina: Nzi ta ku nyika kubeleka nzi ku anzisa, nzi ta ku maha matiko manyingi, nzi ta ku nyika legi tiko, wena ni pswalo wa wena anzhako ka wena, yi tava a tshomba ya kala kupinzuka.

⁵Hikwalaho a vana va wena lava vambiri, lava u nga beleka lomu tikweni ga Gipite, na nzi nga se kuta ka wena lomu ka tiko legi ga Gipite, va tava vana va mina; Efraime na Manasse va tava va mina kota Rubeni na Simoni.

⁶Kanilezi a vanana lava u belekileko anzhako ka lava va tava va wena; va ta hlayiwa hi mavito ya vanakulobye lomu tshombeni yabye.

⁷Laha nzi nga sukile le Padani, nzi lo felwa hi Rakeli le tikweni ga Kanani, laha ndleleni, na ku hi pfhuka ku chikela Efrata; nzi lo mu lahla laha ndleleni ya kuya Efrata, ku nga Betlehema.

⁸Makunu laha Israeli a nga wona vana va vambiri va Josefa, i te ngalo: Mbamani lava?

⁹Josefa i lo hlamula, aku ka raru wakwe: I vana va mina, lava Nungungulu a nzi nyikileko lomu. Jakobe aku ka yena: Va nehe laha ka mina nzi va katekisa.

¹⁰Makunu a mahlo ya Israeli ma wa hi xilutsu hi kukhosahala, i wa nga zi koti ku wona. Josefa i lo va tshineta ka yena, yena i lo va wukarela a va pswopswa.

¹¹Zonake Israeli aku ka Josefa: Nzi wa nga alakanyi lezaku nzi ta wona a nghohe ya wena, kasi lezo Nungungulu i nzi vunile nzi kala nzi wona ni vanana va wena kambe.

¹²Zonake Josefa i lo va susa marumbini ya raru wakwe, i lo khizama lahasi a ti koramisa.

¹³Josefa i lo tlhela a va teka hi wumbiri gabye a va yimisa, i lo, veka Efraime hi canjeni gakwe ga xinene, ku cuwukana ni canja ga xibhabha ga raru wakwe Israeli; Manasse i wa hi canjeni ga xibhabha, ku cuwukana ni canja ga xinene ga Israeli, i lo va tshineta kusuhani kakwe.

¹⁴Kanilezi Israeli i lo nawuluta a canja gakwe ga xinene, a gi tlhateka hlokweni ya Efraime, kasi lezo i nzisana, zonake i lo teka a canja gakwe ga xibhabha a gi tlhateka hlokweni ya Manasse; a hambanyisa mawoko yakwe ha womu, kasi lezo Manasse hi yena matewula.

¹⁵Zonake i lo katekisa Josefa, aku: Nungungulu loyi vadadani, Abrahama, na Isaka, va nga wa famba mahlweni kakwe, Nungungulu loyi a nga nzi wundla kusukela kubelekweni ka mina kala lezi, [58]

¹⁶ni ngelosi leyi yi nga nzi hlanguta kubiheni kontlhe, a yi katekise a vafana lava; a va vitanwe hi vito ga mina, hi mavito ya vakokwani, Abrahama na Isaka; a va anze va tala nguvu laha misaveni.

¹⁷Makunu laha Josefa a nga wona lezaku a raru wakwe i tlhatekile a canja gakwe ga xinene hlokweni ya Efraime, i lo tsanwa; zonake i lo tlakusa a canja ga raru wakwe, a gi susa hlokweni ya Efraime, a gi tlhateka hlokweni ya Manasse.

¹⁸Josefa aku ka raru wakwe: U nga mahisi lezi dada, hakuva loyi hi yena wa matewula; tlhateka canja ga wena ga xinene hlokweni yakwe.

¹⁹Kanilezi a raru wakwe i lo ala, aku: Nza zi tiva, nwananga, nza zi tiva; yenawu i tava a tiko, ni lezaku yenawu i tava wa hombe; hambu zi hi tano a nzisana yi tava wa hombe kakwe, ni pswalo wakwe wu tava matiko manyingi.

²⁰Hikwalaho i lo va katekisa lego siku, aku: A vaIsraeli a va wule hi kukateka ka wena, vaku: Nungungulu a ku mahe kota Efraime ni ku kota Manasse. Zi wa nghaho i lo yimisa Efraime mahlweni ka Manasse.

²¹Zonake Israeli aku ka Josefa: Nzi tafa; kanilezi Nungungulu i tava na nwina, i ta mu tlhelisa muya tikweni ga vakoko va nwina.

²²Makunu mina nza ku nyika a xiavelo xinwani a handle ka vanakuloni, lexi nzi wutlileko canjeni ga maAmori hi supado ya mina zinwe ni wura ga mina. [59]