Read tshwa Genesisi 49 Bible Online

Genesisi 49 - tshwa bible

Genesisi 49

¹Zonake Jakobe i lo vitana a vana vakwe, aku: Tlhanganani nzi ta mu tivisa lezi zi ta nga mu humela zikhatini za ha tako.

²Tlhanganani, vana va Jakobe, mu ingisa, Ingiselani Israeli, a raru wa nwina.

³Rubeni, hi wena matewula ya mina, A ntamu wa mina, ni kusangula ka ntamu wa mina. Wa hunza vanwani hi wukulu, wa va hunza hi ntamu wa hombe.

⁴Wa chachara kota mati! Cima u nga tava murangeli, Hakuva u lo kanziha hehla ka mubhedi wa raru wa wena, U gohile mubhedi wa mina. Ina, i yile sangweni ga mina. [60]

⁵Simoni na Levi makabye na makabye; Tisupado tabye ti tava matlhari ya tihanyi.

⁶A mbilu ya mina ngha yi nga engheni makungweni yabye! Moya wa mina ngha wu nga tlhangani ni makungo yabye, Hakuva a zangeni yabye va dele vanhu; Ku ti xalaliseni kabye va tsemile misiha ta tikuzi.

⁷A yi rukiwe a zanga yabye, hakuva ya tshisa, Ni mona wabye hakuva wa hisa. Nzi ta va hambanyisa xikari ka Jakobe, Nzi ta va hangalasa xikari ka Israeli.

⁸Juda, vamakabye va wena va ta ku dzunza; A canja ga wena gi tava hehla ka tinhamu ta valala va wena; A vana va raru wa wena va ta khizama mahlweni ka wena.

⁹Juda, u role ga nghala. U tlhelile hi le kuhlaselweni, nwananga! I khizama a barama kota nghonyamo, Kota a pswele ga nghonyamo; himani a ta nga mu vuxa ke?

¹⁰A wuhosi Cima gi nga ta suka ka Juda, Ni nhonga ya wuhosi xikari ka milenge yakwe, A kala a chikela Xilo, Zonake ni vamatiko va ta mu ingisa.

¹¹A boha a mbongola yakwe sinyeni ya vina, Ni ximbongolana xakwe sinyeni ya vina yi hlawulilweko; A hlaza tinguwo takwe lomu vinyeni. Ni nkumba wakwe nkhateni wa vinya.

¹²A mahlo yakwe maku dzipo hi vinya; Ni meno yakwe ma basa hi masi.

¹³Zebuloni i ta ya aka fungwini wa bimbi; I tava suweni ga mataru; Ni mbhingano wakwe wu tava kusuhani ni Sidoni. [61]

¹⁴Isakari i mbongola leyi ya ntamu, Yi etlelako xikari ka maranga.

¹⁵Azwa kunanziha ka wuhumulelo, A wona tiko lezaku gi nene; A koramela nzhwalo hi katla, A maha nanza go luvela.

¹⁶Dani i ta lamula timhaka ta tiko gakwe, Kota munwe wa lixaka la ka Israeli.

¹⁷Dani i tava nyoka laha ndleleni, A xihihigani laha pfutleni, Lexi xi tumako xirenze xa haxi, Kasi mukhileli wa gona awa ha xinzhakwani.

¹⁸Jehova, nzi cuwukele ku tirulwa hi wena!

¹⁹Gadi yena i ta welwa hi tiyimpi, Kanilezi i ta va tsimbeketa a va hlongola.

²⁰Axeri, a zakuga zakwe zi ta nona, Yena i ta humesa a zakuga za ti fawufawu za tihosi.

²¹Naftali i mbavala yi dlalamadlalamako; I humesa timhaka to saseka.

²²Josefa i sinya yi tewulako, I sinya leyi yi pswalako, yi nga kusuhani ni hlowo, Maravi ya yona ma nava hehla ka lihlavu.

²³Vafuli va mu vukele va mu fuletela hi miseve, Va mu karata hi livengo labye;

²⁴Kanilezi a wura gakwe gi tshamile gi tiyile; Mawoko ni mandla yakwe zi tiyisilwe Hi mandla ya Nyamintamu wa Jakobe, Loyi a nga Murisi tlhelo Ribye ga Israeli.

²⁵Hi ntamu wa Nungungulu wa raru wa wena, loyi a ta nga ku vuna; Ni wa Ntamu-Wontlhe loyi a ta nga ku katekisa Hi Xikatekiso za le tilweni le hehla, Ni zikatekiso za lomu kueteni laha hasi, Ni zikatekiso za mavele ni za nyimba.

²⁶A zikatekiso za raru wa wena za hombe ku hunza zikatekiso za vadadani va mina, Ni kusaseka ka zitsunga za kala kupinzuka, A zi tshame hehla ka hloko ya Josefa, Ni le hlokweni ya loyi a nga hosi xikari ka vanakulobye!

²⁷Benjamini i hlolwa legi gi khadamulako; Ni mixo i taga a nyama ya pfimba, Laha gambyeni i ta avanyisa muphango.

²⁸Lava va khume ni vambiri, hi tona tixaka tontlhe ta Israeli, ni timhaka leti, hi leti a raru wabye a nga wula a siku lego a nga va katekisa. I lo va katekisa munwe ni munwani kota xikatekiso xakwe.

²⁹Zonake i lo va laya, aku ka vona: Mina nzi ta amukelwa ka va ka hina; mu ta ya nzi lahla ka vadadani, lomu mhakweni leyi yi nga kona sinwini ga Efroni, a muHiti.

³⁰A mhakweni leyi yi nga le sinwini ga Makapela, leyi yi gamekeneko ni Mamre, tikweni ga le Kanani: ka simu legi Abrahama a nga xava ka Efroni, a muHiti, kasi gi maha xilahla.

³¹Hi kwalomo Abrahama na Sara a sati wakwe va lahlilweko kona; hi kwalomo kambe Isaka na Rebeka a sati wakwe va lahlilweko kona; hi kwalaho nzi nga lahla Lea; [62]

³²a simu ni mhako leyi yi nga lomo zi xabyilwe ka vanana va Heti.

³³Laha Jakobe a nga mbhetile ku laya a vana vakwe, i lo petsa milenge yakwe laha mubhedini, a nyikela a moya wakwe, i lo amukelwa ka va ka kabye.