Read tshwa Genesisi 6 Bible Online

Genesisi 6 - tshwa bible

Genesisi 6

¹Laha a vanhu va nga wa sangula a ku anza misaveni, va beleka vanhwana,

²a varisanyana va Nungungulu va lo wona a vanhwana va vanhu lezaku va sasekile; va lo va teka a kuva vasati vabye ka vontlhe lava va nga va hlawula.

³Jehova aku ngalo: A Moya wa mina wu nga ta simamisa ku tshama ni vanhu xontlhe xikhati, hakuva a munhu i nyama futsi; ni masiku yakwe ma tava 120 wa malembe.

⁴Ni zihotlovila zi wa hi kona misaveni hi lexo xikhati, ni nzhako ka lezo kambe, laha varisanyana va Nungungulu va nga enghena ka vanhwana va vanhu, va lo beleka navo vanana, va nga vanhu va tinhenha ti nga dumile kale. [16]

⁵Nungungulu i lo wona kuonha ka vanhu lezaku ku kulile laha misaveni, ni lezaku a mixuvo ya timbilu tabye yi bihile masiku wontihe.

⁶Zonake Jehova i lo ti laya hilezi a vangileko a munhu misaveni, i lo xaniseka mbilwini yakwe.

⁷Na Jehova aku ngalo: Nzi ta lovisa a vanhu lava nzi nga va vanga, ina, a vanhu ni zifuyo, ni zikokakoka, ni tinyanyani ta tilo, hakuva nza ti laya hilezi nzi zi mahileko.

⁸Kanilezi Noa i lo kuma thomo mahlweni ka Jehova.

⁹Leti hi timhaka ta Noa. Noa i wa hi munhu a lulamileko, a nga hi na nanzu xikhatini xakwe; Noa i lo famba zinwe na Nungungulu. [17]

¹⁰Noa i lo beleka varisanyana vanharu, Xemi, na Hamu, na Jafete.

¹¹A misava yi wa onhekile mahlweni ka Nungungulu, ni misava yi wa tele hi tihanyi.

¹²Nungungulu i lo wona lezaku a misava yi wa onhekile; hakuva a vanhu vontlhe va wa onhile tindlela tabye laha misaveni.

¹³Jehova aku ngalo ka Noa: Nzi ta lovisa a nyama yontlhe, hakuva a misava yi tele hi tihanyi ta vanhu, languta, nzi ta va lovisa zinwe ni misava.

¹⁴Ti akele taru hi sinya ya goferi, u maha a makwarutu lomu tarwini; u gi tota hlakati lomu nzeni ni lahandle.

¹⁵Lezi u ta nga gi mahisa zona hi lezi: kuleha ka gona 300 ya mikono, ni kuanama ka gona 50 ya mikono, ni kutlakuka ka gona 30 ya mikono.

¹⁶U ta maha a njhanela le hehla ka taru yi nga ni nkono munwe a kutlakuka u veka nyangwa ya taru laha tlhelweni ga gona; a taru a give ni yindlu ya lahasi ni ya wumbiri hehla, ni ya wunharu hehla ka tona.

¹⁷Hakuva nzi ta neha a ntalo wa mati misaveni; kasi wu ta lovisa a nyama yontlhe yi nga ni muhefemulo wu hanyako, yi nga laʼhasi ka tilo; zontlhelele zi nga laha misaveni zi tafa.

¹⁸Kanilezi nzi ta yimisa xivumelwano zinwe na wena; u ta enghena lomu tarwini, wena ni vana va wena, ni sati wa wena, ni vasati va vana va wena.

¹⁹Ni zontlhe zilo zi hanyako za nyama yontlhe, u ta teka mipatswa ka tontlhe tixaka, u zi enghenisa lomu tarwini kasi zi hanya zinwe na wena, zi tava matsune ni kati.

²⁰A tinyanyani hi tixaka ta tona, ni zifuyo hi tixaka ta zona, ni zontlhelele a zihari zo kokakoka za misava hi tixaka ta zona; zi tata ka wena patswa wa zontlhelele hi tixaka ta zona, u zi hlayisa zi hanya.

²¹U teka ni kuga ka zona zontlhe loku ku giwako u ku hlengeletela ka wena: ku tava kuga ka wena ni ka zona.

²²I lo maha lezo Noa; kota lezi Nungungulu a nga mu layisile zona i lo zi maha.