Read tshwa 2 Samueli 1 Bible Online

2 Samueli 1 - tshwa bible

2 Samueli 1

¹Anzhako ka kufa ka Saule, Davida na hi ku wuya hi le ko ya hlasela vaAmeleki, na tshamile masiku mambiri le Ziklagi;

²hi siku ga wunharu ku lo ta chikela munhu na ata hi le yimpini, le wugovelvzeni ga Saule, a tinguwo takwe na ti hanzulelwe, na a porongelene ni misava hlokweni yakwe. I lota ka Davida a ta wa lahasi, a nyika xichavo.

³Davida i te ngalo kakwe: Uta hi kwihi? Yena aku: Nzita hi le wugovelweni ga ka Israeli; nzi lo pona.

⁴Davida aku kakwe: Hi nga hlawuta; mahungu muni? Yena aku: A vanhu va panzanyekile le yimpini; vanyingi va kona va wile, va file. Saule ni nʼwana wakwe Jonatani va filewo.

⁵Davida i te ngalo ka jaha legi gi nga mu hlawutela timhaka leti: U zi tivisa kuyini aku Saule ni nʼwana wakwe Jonatani va file?

⁶A jaha lego giku: Nzi te nzi hunza le xitsungeni xa Gilboa nzi si wona Saule na a khegele laha ka tlhari gakwe, a tikareta ni vakhileli va mahaxi na va kari va tsimbeketa va mu lanzela.

⁷Laha a nga hunzuluka a cuwuka nzhako, i lo nzi wona a nzi vitana, nzi mu hlamula nziku: Nzi laha!

⁸Yena aku ka mina: Hi wena mani? Mina nziku: Nzi muAmeleki!

⁹Yena aku ka mina: Tshinela u nzi daya, hakuva nzi khomilwe hi kukarateka ka hombe, hambu loku kuhanya ka hi kona ka mina.

¹⁰Zinghaho nzi lo tshinela nzi mu daya, hakuva zi wa su dlunya ka mina lezaku lezi a wileko cima a nga ta hanya. Nzi lo teka a xidlodlo lexi xi nga hi hlokweni yakwe ni sinza legi gi nga hi wokweni gakwe, lezi nzi zi nehileko ka hosi ya mina.

¹¹Zonake Davida i lo hanzula tinguwo takwe, ni lava a nga hi navo va lo mahawu zalezo.

¹²Ya lo rila va hlomula, va yila kala laha gambyeni hi kota ya Saule ni nʼwana wakwe Jonatani, ni vanhu va Jehova, ni yindlu ya ka Israeli, lava va wileko hi supado.

¹³Davida i lo wutisa a jaha lego gi mu byelileko timhaka leto, aku: Wena na u hi wa ka mani? Yena aku: Nzi nʼwana wa muluveli wa muAmeleki.

¹⁴Davida i te ngalo kakwe: Hi kuyini u nga kala ku chava ku tlakusa a canja ga wena u lovisa a totilweko wa Jehova?

¹⁵Zonake Davida i lo vitana a munwe wa majaha yakwe, aku kakwe: Tshinela u mu daya! Zinghaho yena i lo mu gwaza afa.

¹⁶Davida i te ngalo ka yena: A nkhata wa wena a wuve hlokweni ya wena nwinyi, hakuva a nomu wa wena wu kustumunya, wuku: Hi mina nzi nga daya a totilweko wa Jehova.

¹⁷Davida i loba nkosi lowu, a hlaluka Saule ni nʼwana wakwe Jonatani.

¹⁸I lo kombela vanhu lezaku a lisimu la kona li gonziswa ha vanana va ka Juda, a lisimu la Wura. Zinghaho li lo tsaliwa lomu bhukwini ga Loyi a Lulamileko. [1]

¹⁹A wumbhuri ga wena Israeli gi hlaselwe le zitsungeni za wena! Ti wisile kuyini tinhenha!

²⁰Mu nga dzuki mu byela va le Gati, Mu nga zwati timhaka leto lomu maphangweni ya le Axkeloni, Va nga bhuma; a vanhwana va vaFilistia, Ni vanhwana va makhuna va nga khana.

²¹Nwina zitsunga za Gilboa! Ngha ku nga havi kona a nzhokati ni vula hehla ka nwina, Ku nga havi kona a simu ga munyikelo! Hakuva laho ku hoxilwe a zitlhangu za tinhenha, Khwatsi a xitlhangu xa Saule a xi totiwangi hi mafura.

²²A wura ga Jonatani a ga ha wuyangi kambe Hi le nkhateni wa lava va delweko, Hi le ka mafura ya tinhenha; Ni supado ya Saule a yi tlhelangi yi hi phanga.

²³Saule na Jonatani va wa ranzeka ni ku xalalisa kuhanyeni kabye, Ni le kufeni kabye vona a va hambanyiswangi; Va wa haha ku hunza magama, Va hi ni ntamu ku hunza tinghala.

²⁴Vanhwana va ka Israeli! rilelani Saule, Loyi a mu ambexileko hi kupswhuka, Loyi a bombisileko tinguwo ta nwina hi nzalama.

²⁵Ti wisile kuyini a tinhenha le yimpini! O Jonatani, loyi a delweko hehla ka zitsunga!

²⁶Nza ku bayisekela wena nakulori, Jonata! U wa nzi xalalisa nguvu. A liranzo la wena li wa nzi tsakisa, Li wa hunza ni liranzo la vava sati.

²⁷Ti wisile kuyini a tinhenha! Ni matlhari ya tona ma lahlekisile kuyini!