Read tshwa 2 Samueli 10 Bible Online

2 Samueli 10 - tshwa bible

2 Samueli 10

¹Anzhako ka lezo a hosi ya va ka Amoni yi lofa. Hanuna a nʼwana wa yona i lo fuma xikhundleni xakwe.

²Zonake Davida i te ngalo: Nzi ta mu mahela tipswalo Hanuna nʼwana Nahaxi, khwatsi hi lezi a raru wakwe a nga nzi mahele tipswalo. Davida i lo rumela a malanza yakwe ku ya mu chavelela hi kota ya kufa ka raru wakwe; a malanza ya Davida ma lo ya chikela tikweni ga vanana va ka Amoni.

³Kanilezi a tinduna ta vanana va ka Amoni ti te ngalo ka Hanuna a hosi yabye: Xana wena u alakanya lezaku Davida i rumele a vanhu mahlweni ka wena a ku ta ku chavelela hi ku dzunza a raru wa wena ke? A nga no rumela a malanza yakwe a ku ta kamba muti ni ku wu hlola ni ku wu hangalasa ke?

⁴Zonake Hanuna i lo teka a malanza ya Davida, ginwe ni ginwani a gi cinga a tlhelo ga xilevu, a tsema tinguwo ta gona hi tlhelo kusukela lahasi kala xiwunwini, zonake i lo va tlhelisa va famba.

⁵Makunu vona va lo yisa mahungu ka Davida. Yena i lo rumela a vanhu a ku va khinga, hakuva a vavanuna lavo va wa hi ni tingana ta hombe nguvu; zonake a hosi yi te ngalo kabye: Tshamani leyo Jeriko kala zi kula zilevu za nwina, zonake mu ta wuya.

⁶Kanilezi a vanana va ka Amoni va lo wona lezaku va vangile livengo ka Davida; zonake va lo rumisa a kuva ku rambiwa 20,000 wa maSiria ya le Bete-Rehoba, ni maSiria ya le Zoba; a hosi ya le Maaka leyi yi nga wa hi ni 1,000 wa vavanuna, ni vanana va Toba va wa hi 12,000 wa vavanuna.

⁷Makunu laha Davida a nga wa zi zwile, i lo rumela Joabe ni yontlhe yimpi ya tinhenha ta vavanuna.

⁸Zonake a vanana va ka Amoni va lo huma na va hlomile matlhari le nyangweni; kanilezi a maSiria ya le Zoba ni ya le Rehoba, ni vavanuna va le Toba ni va le Maaka, va lo yima hi tlhelo hi le handle.

⁹Makunu laha Joabe a nga wona lezaku a tiyimpi ti le mahlweni ni lenzhako kakwe, i lo hlawula a vavanuna va tinhenha a xikari ka tinhenha tontlhe ta ka Israeli a ya navo a ku yalwa ni maSiria.

¹⁰A vavanuna vontlhe lava va nga wa sele i lo va nyikela mandleni ya nakulobye Abixai, kasi va fela kulwa ni va ka Amoni.

¹¹Yena i te ngalo kakwe: Loku a maSiria ma nzi hlula, u ta nzi vuna, ni loku a va ka Amoni va ku hlula, mina nzi ta ku vuna.

¹²Tiya, hi maha vavanuna va tinhenha, hi lwela a vanhu va hina ni miti ya Nungungulu wa hina; na Jehova a mahe lezo zi wonekako na zi sasekile mahlweni ka yena!

¹³Zonake Joabe zinwe ni vavanuna lava a nga hi navo, va lo tshinela mahlweni valwa ni maSiria; ma lo panzanyeka mahlweni kabye.

¹⁴Laha a vanana va ka Amoni va nga wona lezaku a maSiria va tsutsumile, vonawu va lo panzanyeka mahlweni ka Abixai, va tlhelela lomu mutini; zonake Joabe i lo tlhela hi le kolwa ni vanana va ka Amoni aya Jerusalema.

¹⁵Makunu laha a maSiria ma nga wona lezaku ma hlulilwe mahlweni ka va ka Israeli, ma lo tsombana wontihe.

¹⁶Hadarezeri i lo rumela vanhu a ku ya vitana a maSiria lawa ma nga wa hi le tlhatukweni wa congo. Vona va lota hi le Helama ni murangeli wabye Xobaka a nduna ya hombe ya yimpi ya Hadarezeri.

¹⁷Laha Davida a nga wa byelilwe timhaka leto, i lo tsombanyisa vontlhe va ka Israeli, va tlhatuka Jordani vaya le Helama; a maSiria ma lo tlhangana na Davida valwa naye.

¹⁸A maSiria ma lo panzanyeka mahlweni ka Va ka Israeli, na Davida i lo daya a 700 wa vakhileli va tikareta, ni 40,000 wa vakhileli va mahaxi, a daya Xobaka a nduna ya yimpi afa kwalaho.

¹⁹Makunu laha tontlhe tihosi leti ti nga wa fumelwa hi Hadarezeri ti nga wona lezaku ti hlulilwe mahlweni ka va ka Israeli, ti lo kombela kurula zinwe ni va ka. Israeli, va fumelwa hi va ka Israeli. Zonake a maSiria ma lo chava ku engeta kambe va vunetela a vanana va ka Amoni.