Read tshwa 2 Samueli 14 Bible Online

2 Samueli 14 - tshwa bible

2 Samueli 14

¹Makunu Joabe nʼwana Zeruia i lo wona lezaku a mbilu ya hosi yi khumbula Absalome.

²I lo ruma a vanhu vaya Tekoa va ya vitana a xitlhatlha xa wasati, a taku kakwe: Ti mahisa uku khwatsi u muhlaluki, u ambala tinguwo ta xirilo; u nga toli mafura, kanilezi u ti mahisa ku khwatsi u wasati loyi xi nga xikhati xo leha na u kari u hlaluka.

³U ta enghena ka hosi, u wulawula a timhaka leti nzi ku leletelako. Zonake Joabe i lo mu byela timhaka ta kona.

⁴A wasati loye wa le Tekoa, i lo wulawula ka hosi, awa lahasi hi nghohe yakwe a kombisa xichavo, aku: Nzi hlangute wena hosi!

⁵A hosi yi te ngalo kakwe: Mahungu muni? Xini xi ku karatako? Yena aku: Hakunene mina nzi noni, a nuna wa mina i file.

⁶A nanza ga wena ga xisati gi wa hi ni vafana vambiri. Makunu va lo holova le handle na ku nga hi na munhu wa ku va lamula; hikwalaho a munwe i lo lamata munwani a mu daya.

⁷Makunu wontihe maxaka ya mina ma vukela a nanza ga wena, maku: Hi nyike loyi a nga daya nakulobye hi mu daya, hi photela wutomi ga nakulobye loyi a mu deleko, hi hetisawu a xiga-tshomba lexo. Makunu va lava a ku tima a khala ga mina legi gi seleko, va fuvisa a vito ga nuna wa mina laha misaveni! [24]

⁸A hosi yi te ngalo ka wasati: Famba kaya ka wena, nzi ta leletela hi mhaka ya wena.

⁹A wasati wa le Tekoa i te ngalo ka hosi: Wena hosi yanga, ngha a nanzu wu hi hehla ka mina ni yindlu ya dadani, kanilezi a hosi ni xitshamu xakwe xa wukosi ngha a nga hi na nanzu.

¹⁰A hosi yi te ngalo kakwe: Mu nehe laha ka mina loyi a ta nga wula mhaka leyo, kasi a fela ku kala a nga ha engeti a ku karata.

¹¹A wasati aku: Ngha a hosi yi alakanya Jehova Nungungulu wa wena, lezaku a muphoteli wa nkhata a nga engeteli a khombo legi hi ku daya a nʼwana wa mina. A hosi yi lo hlamula, yiku: Nzi hlambanya ha Jehova a hanyako, cima ku nga ta kuva kona ni sisi munwe wa nʼwana wa wena wu ta ngawa lahasi. [25]

¹²Zonake a wasati i te ngalo: Ngha a nanza ga wena ga xisati gi wula gezu ginwe ka hosi ya mina.

¹³A hosi yiku: Wula! A wasati aku: Hi kota ya yini u alakanya a zilo za ku nghahi za ku vukela a vanhu va Nungungulu ke? Hakuva khwatsi hi lezi yi wulisako zona hosi, yi na ni nanzu hi lezi yi nga lanziko loyi yi mu hlongoleko.

¹⁴Hakuva zi te dlunya lezaku hi tafa hakunene; hi fanana ni mati lawa ma halatilweko lahasi ma nga ha kotekiko ku wungeletelwa kambe, Nungungulu a nga susi wutomi ga munhu, kanilezi i xuva lezaku loyi a hlongolweko ngha a nga hambani naye. [26]

¹⁵Makunu kota lezi nzi tileko ku ta wulawula leti timhaka ka hosi ya mina, a vanhu Va wa nzi dzukisela; kanilezi a nanza ga wena ga xisati gi te ngalo: Nzi lava ku ya wulawula ni hosi, kutani a hosi yi ta maha lezi a nanza ga wena gi ta nga kombela zona.

¹⁶Hakuva a hosi yi tazwa a nanza ga yona yi nzi hlanguta mandleni ya loyi a ta nga lava ku nzi lovisa ni nʼwana wa mina, lomu tshombeni ya Nungungulu.

¹⁷A nanza ga wena gi waku: A gezu ga hosi yanga gi ta nzi nyika kurula, hakuva a hosi ya mina yi fanana ni ngelosi ya Nungungulu a ku tiva kusasa ni kubiha; hikwalaho Jehova Nungungulu wa wena ave zinwe na wena!

¹⁸Zonake a hosi yi lo hlamula, yiku: U nga nzi fihleli a mhaka leyi nzi ta nga ku wutisa. A wasati aku: Wulawula, hosi yanga!

¹⁹A hosi yiku: Xana yenawu Joabe i lomu timhakeni tontlhe leti ke? A wasati a hlamula, aku: Hizinene, loku a hosi yi wula nchumu, ku hava ku ponela tlhelweni ga xinene hambu ka ga xibhabha. Hi yena a nanza ga wena Joabe a nzi leleteleko tontlhe timhaka leti.

²⁰A nanza ga wena Joabe hi yena a nga hunzulusa mawulela ya mhaka, kanilezi a hosi yi na ni wutlhari go fanana ni ga ngelosi ya Nungungulu, a ku tiva zontlhe za laha misaveni.

²¹A hosi yi te ngalo ka Joabe: Hi zona, nzi ta maha zalezo; fambake u ya teka Absalome kambe.

²²Joabe i lowa lahasi hi nghohe a kombisa xichavo, a bonga hosi, aku: Inyamutlha a nanza ga wena ga zi tiva lezaku nzi kumile thomo mahlweni ka wena hosi ya mina, hakuva a hosi yi vumele a xikombelo xa nanza gakwe.

²³Zinghaho Joabe i lo suka aya le Gexura a ya teka Absalome a wuya Jerusalema.

²⁴A hosi yiku: A tshame ndlwini yakwe, a nga woni nghohe ya mina. Zinghaho Absalome i lo tshama ndlwini yakwe, a ngayi ka hosi.

²⁵Makunu xikari ka vontlhe va ka Israeli yi wa nga hi kona a mbhuri yo hunza Absalome. Va wa mu babaza nguvu; i wa nga hi na bawa kusukela mikonzweni kala hlokweni yakwe.

²⁶Lembe ni lembe i wa kaya misisi yakwe, hakuva yi wa mu binza. Loku a kayile, a yi veka xikalweni a kubinza ka yona yi wa ringana 200 wa maxekeli, hi lipimo la hosi.

²⁷Absalome i wa pswele vafana vanharu ni nhanyana munwe a vitwako Tamara, a mbhuri ya wasati.

²⁸Loku Absalome a tshamile malembe mambiri le Jerusalema na a nga woni a nghohe ya hosi,

²⁹i lo vitanisa Joabe kasi a fela ku ta mu heleketa ka hosi, kanilezi Joabe i lo ala. I lo mu vitanisa ga wumbiri; a si ala kambe.

³⁰Hikwalaho Absalome i te ngalo ka malanza yakwe: Cuwukani, a simu ga Joabe gi laha kusuhani ni ga mina; gi na ni mavele. Yanani mu ya gi hisa hi nzilo. Zalezo a malanza ya Absalome ma lo ya gi hisa.

³¹Zonake Joabe i lo suka aya le ndlwini ya Absalome, a yaku kakwe: Hi kuyini a malanza ya wena ma hisa a simu ga mina ke?

³²Absalome aku ka Joabe: Mina nzi rumele gezu go ku vitanisa, nziku: Ngone nzi ta ku ruma ka hosi, u yaku: Nzi wuyele yini hi le Gexura? Ku wa nga hi chukwana loku nzi wa simamisile nzi tshama leyo ke? Hikwalaho mina nzi lava ku wona a nghohe ya hosi; loku nzi hi ni nanzu, a nzi daye.

³³Zinghaho Joabe i lo ya enghena ka hosi, a yi hlawutela timhaka leto. Laha Absalome a nga vitanwa le hosini, i loya chikela a korama le mahlweni ka hosi; ni hosi yi lo pswopswa Absalome.