Read tshwa 2 Samueli 18 Bible Online

2 Samueli 18 - tshwa bible

2 Samueli 18

¹Davida i lo hlaya a vanhu lava a nga hi navo, a yimisa tinduna ta hombe ni ta titsongwani hehla kabye,

²a wuya a rumela vanhu: A xipanze xa wunharu xi wa rangelwa hi Joabe, a xinwani kambe xa wunharu xi rangelwa hi Abixai, nʼwana wa Zeruia a nakulobye wa Joabe, a xinwani xa wunharu kambe xi rangelwa hi Itai a muGiti. A hosi yi te ngalo ka vanhu: Minawu nzi ta huma na nwina.

³Kanilezi a vanhu va te ngalo: Cima u nga taya wutshamu, hakuva laha zi ta nga fanela ku tsutsuma, vona va nga ta chela kota ha hina, hambu loku kofa a khihlanya ga hina, cima va nga ta hi khatalela hakuva wena u ringana ni 10,000 wa hina. Kanilezi zinene a kuva u hi vuna na u hi kwalaha mutini.

⁴A hosi yiku kabye: Nzi ta maha lezi zi wonekako na zi hi zinene ka nwina. Zinghaho a hosi yi lo yima hi laha tlhelweni ga nyangwa, zonake vontlhe vanhu va lo hunza hi mitlawa ya 100 ni ya 1,000.

⁵A hosi yi lo leletela Joabe, na Abixai, na Itai, yiku: Nzi maheni khwatsi hi jaha Absalome; ni vanhu vontlhe va lo zizwa laha a hosi yi nga leletela tontlhe tinduna ha Absalome.

⁶Zinghaho a vanhu va lo huma lahandle a ku yalwa ni va ka Israeli; a yimpi yi wa hi le makhwatini ya le Efraime.

⁷A va ka Israeli va lo hlulwa hi malanza ya Davida; ku lo dawa a vanhu vo tala lego siku, a tsengo wa 20,000 wa vavanuna.

⁸A yimpi yi lo fenengeta a tiko gontlhe, ni khwati gi lo hihirita a vanhu vo tala lego siku ku hunza lava va nga dawa hi tisupado.

⁹Absalome i lo tlhangana ni malanza ya Davida na khilele mbongola, kanilezi a mbongola yi lo enghena hi laha maravini yo khwela ya nkuhlu ya hombe, a hloko ya Absalome yi si khwekela laha ka nkuhlu a cikita laha xikari ka tilo ni misava, a mbongola leyi yi nga hi lahasi kakwe yi si simama yi famba.

¹⁰A munhu wo kari i lo zi wona, a si ya byela Joabe, aku: Nzi wonile Absalome na cikile lomu ka nkuhlu.

¹¹Joabe i te ngalo ka munhu loye a mu byelileko timhaka leto: U mu wonile? Hi kuyini u nga kala ku mu gwaza? Ngha nzi ku nyikile a 10 wa maxekeli ya siliva ni likalo.

¹²A munhu loye i te ngalo ka Joabe; Hambu loku nzi wa ta amukela a 1,000 wa maxekeli mandleni ya mina, ngha nzi nga tlakusi a canja ga mina hehla ka nʼwana wa hosi, hakuva hi zi zwile a xikhati lexi a hosi yi nga leletela wena na Abixai na Itai, yiku: Ngha munwe ni munwani a nzi tsetsa hi jaha lego Absalome.

¹³Makunu loku mina nzi wa mu dele hi mona, ngha zi nga fihlalangi ka hosi, hambu wena u ta nga u hi kustumunyu ya ku nzi vukela.

¹⁴Joabe i lo hlamula aku kakwe: Nzi nga ta hungala hi ku wulawula na wena! Zonake i lo teka matlhari manharu a ya gwaza ha wona Absalome hi laha mbilwini, na a ha hanya lomu hehla ka nkuhlu.

¹⁵Zonake a 10 wa majaha, a vaweleli va matlhari ya Joabe, ma lo ranzela Absalome va mu gwaza afa.

¹⁶Joabe i loba mpunzu, zonake vontlhe vanhu va lo tlhela hi le ko hlongola va ka Israeli, hakuva Joabe i lo tsetsa a vanhu.

¹⁷Zonake va lo teka Absalome va mu hoxa lomu rinzini ga hombe, lomu khwatini, va vingeretela a nhulu ya hombe ya maribye hehla kakwe. Zonake vontlhe va ka Israeli va lo tsutsuma, loyi ni loyi a ti yela kaya kakwe. [37]

¹⁸Makunu Absalome na ha hanya, i wa ti mahele a mhinga ya xialakanyiso le koveni wa hosi, hakuva i waku: A nzi na nʼwana wa mufana wa ku hlayisa xialakanyiso xa vito ga mina; hilezo i lo yi chula vito gakwe, yi vitanwa ku ngalo xialakanyiso xa Absalome kala ni lezi. [38]

¹⁹Zonake Ahimaza wa Zadoke i te ngalo: Nzi vumele nzi tsutsuma nzi ya bikela hosi a mahungu lawa yo saseka, khwatsi hi lezi Jehova a photileko ka valala vakwe.

²⁰Joabe i te ngalo kakwe: U nga tava mubiki wa mahungu yo saseka inyamutlha. U ta ya bika ginwani siku. Inyamutlha u nga fambi, hilezi ku file nʼwana wa hosi.

²¹Zonake Joabe aku ka muKuxe: Famba u ya bikela hosi lezi u zi wonileko. A muKuxe i lo korama mahlweni ka Joabe, zonake a tsutsuma.

²²Ahimaza nʼwana Zadoke i lo engeta kambe aku ka Joabe: Hambu loku ku humelela xilo, nzi vumele nzi tsutsumawu nzi lanza muKuxe. Joabe aku: U ta tsutsuma u fela yini, nwananga, na u wona lezaku u hava nchacazelo ka timhaka leto?

²³Ahimaza aku: Hambu zi hi lezo, nzi ta tsutsuma. Zonake Joabe aku kakwe: Tsutsuma! Zonake Ahimaza i lo tsutsuma hi ndlela ya libala a rangela muKuxe.

²⁴Makunu Davida i wa tshamile xikari ka tinyangwa timbiri; ni murinzeli i wa hi le hehla ka langwa la nyangwa le khurisini. Laha a nga tlakusa a mahlo i lo wona a munhu na a kari a tsutsuma na a hi yece.

²⁵A murinzeli i lo kanyuluka a tivisa hosi; zonake a hosi yi te ngalo: Loku ku hi yena yece, i na ni timhaka to saseka lomu nonwini wakwe. Kanilezi i lo tsutsuma a tshinela laha kusuhani.

²⁶A murinzeli i lo wona munwani munhu na a kari a tsutsuma; zonake a murinzeli i lo byela a muhlayisi wa nyangwa aku: Hi gaya munwani munhu a tsutsumako na a hi yece. A hosi yiku: Yenawu i neha timhaka.

²⁷A murinzeli i te ngalo: A matsutsumela ya loyi wo ranga ma fanana ni ya Ahimaza wa Zadoke. A hosi yiku ngalo: Inaloye munhu nene; i neha mahungu yo saseka.

²⁸Ahimaza i lo vitana aku ka hosi: Kurula! Zonake i lo korama mahlweni ka hosi a kombisa xichavo, a wuya aku: A ku dumiswe Jehova Nungungulu wa wena loyi a Wulileko a vanhu lava va vukelako hosi ya mina.

²⁹A hosi yi te ngalo: Xana xi lele xungetano na Absalome ke? Ahimaza aku: A xikhati lexo Joabe a nga ruma a nanza ga hosi, mina nanza ga wena, nzi wonile a pfilupfilu ya hombe; kanilezi a nzi tivangi lezaku nja yini.

³⁰A hosi yiku kakwe: Hambuka u yima tlhelweni! Zonake i lo hambuka a yima tlhelweni.

³¹Zonake i lo chikela a muKuxe, aku: Hosi yanga, a yi amukele a mahungu yo saseka, hakuva Jehova i photile inyamutlha lomu canjeni ga vontlhe lava va ku vukelako.

³²A hosi yiku ka muKuxe: Xana xi lele xungetano ni jaha lego Absalome ke? A muKuxe aku: A valala va hosi ya mina, ni vontlhe lava va sukako ku lamata wena, a va kote jaha lego.

³³Zonake a hosi yi lo xaniseka nguvu lomu mbilwini, yi kanziha yiya le ndlwini ya le hehla ka nyangwa, na yi kari yi rila; na a kari a famba, i wa wulawula, aku: Nwananga Absalome! Nwananga Absalome! Ku wa hi chukwana na ku file mina wutshanwini ga wena! Absalome nwananga, nwananga!