Read tshwa 2 Samueli 21 Bible Online

2 Samueli 21 - tshwa bible

2 Samueli 21

¹Makunu xikhatini xa Davida ku wa hi ni ndlala malembe manharu ma lanzelanako, na Davida i lo wutisa ka Jehova. Jehova i lo mu hlamula, aku: Ku na ni nanzu wa nkhata hi kota ya Saule ni yindlu yakwe, hakuva i dele maGibeoni. [39]

²Zonake a hosi yi lo vitana a maGibeoni yi ta wulawula nawo. A maGibeoni ma wa nga hi vanana va ka Israeli, kanilezi va wa hi misalela ya vaAmori, lava va vanana va ka Israeli va nga va hlambanyele, ku nga vona Saule a nga xuvile ku va daya hi ku bayisekela a vanana va ka Israeli ni va ka Juda.

³Davida aku ka maGibeoni: Xini nzi ta nga mu mahela? na ku hi nzhiho muni nzi ta nga mu mahela kasi nwina mu fela ku katekisa a vanhu va Jehova?

⁴A maGibeoni ma te ngalo kakwe: A hi timhaka ta mali kutani nzalama xikari ka hina na Saule ni yindlu yakwe; ni kambe a hi ka hina ku daya a munhu wa va ka Israeli. Yena aku kabye: Lezi mu ta nga zi wula, nzi ta mu mahela zalezo.

⁵Vona va te ngalo ka hosi: A munhu loyi a nga hi hlasela, ni loyi a bohileko xikungo xa ku hi lovisa, kasi hi nga hanyi lomu matikweni wontihe ya va ka Israeli;

⁶hi nyikeni a ntlhanu ni vambiri a vana vakwe, kasi hi fela ku va hayeka mahlweni ka Jehova le Gibea wa Saule, a totilweko wa Jehova. A hosi yiku: Nzi ta va nyikela. [40]

⁷A hosi yi lo ponisa Mefiboxete nʼwana Jonatani wa Saule, hi kota ya xifungo xakwe ka Jehova, lexi xi nga wa hi kona ka vona, xikari ka Davida na Jonatani wa Saule.

⁸Kanilezi a hosi yi lo teka Armoni na Mefiboxete, a vana vambiri va Rizpa, a nhanyana wa Aia, a nga va belekile na Saule, ni ntlhanu wa vana va Merabe, a nhanyana wa Saule, a nga belekile na Adrieli nʼwana Barzillari a muMehola.

⁹Zonake i lo va nyikela mandleni ya maGibeoni, va va hayeka le xitsungeni mahlweni ka Jehova. Lava va ntlhanu ni vambiri va lofa khatiginwe. Va lo dawa masikwini yo ranga ya kutshovela a sevada.

¹⁰Rizpa a nhanyana wa Aia i lo teka a nguwo ya sakwa a ti andlalela laha ribyeni, kusukela kusanguleni ka kutshovela kala va sangula ku nelwa hi ti vula. A nga vumelangi a tinyanyani ti khapama hehla kabye ni hlikanhi, ge hambu a zihari za khwati ni wusiku.

¹¹Va lo ya bika ka Davida lezi zi mahiwako hi Rizpa, a nhanyana wa Aia a mundlukulu wa Saule.

¹²Davida i lo ya teka marambu ya Saule ni ya nʼwana wakwe Jonatani le ka va ka Jebexe-Gileade, lawa va nga ma yivile le libaleni la le Bete-Xane laho a vaFilistia va nga wa hayekile kona a siku lego va nga daya Saule le Gilboa.

¹³Leyo i lo ya teka marambu ya Saule ni ya nʼwana wakwe Jonatani, va rolela ni marambu ya lava va nga wa hayekilwe.

¹⁴Zonake va lo ketela marambu ya Saule ni ya nʼwana wakwe Jonatani le tikweni ga ka Benjamini, le Zala, a xilahleni xa dadani wakwe Kixi. Va lo maha zontlhe lezi zi nga wa leletelwe hi hosi; zonake Nungungulu i lozwa kurila ka vanhu. A kudawa ka zihotlovila.

¹⁵A va Filistia va lo engeta kambe va vukela va ka Israeli. Zonake Davida i lo relela ni malanza yakwe va yalwa ni vaFilistia; Davida i lo mbhela ntamu.

¹⁶Ixibe-Nobe, a munwe wa vanana va zihotlovila, loyi a kubinza ka tlhari gakwe ku nga wa hi 300 wa maxekeli ya suku a kutika ka gona, a nga bohile a supado yiswa, i lo alakanya ku daya Davida:

¹⁷Kanilezi Abixai wa Zeruia i lo mu ponisa hi ku tlhava muFilistia a mu daya. Zonake a vanhu va Davida va lo mu khongotela, vaku: U nga ta ha famba na hina le yimpini, u nga tala ku tima kandiya ya ka Israeli.

¹⁸Anzhako ka lezo yi wa hi kona kambe a yimpi ni vaFilistia le Goha. Zonake Sibekai a muHuxate i lo daya Safa a munwe wa vanana va zihotlovila.

¹⁹Ku wa hi kona kambe a yinwani yimpi le Goha ya vaFilistia. Elhanana nʼwana Jaare-Oregime, a muBetlehema, i lo daya Golia a muGiti, loyi a mbingo wa tlhari gakwe wu nga wa ku khwatsi i tsanza ya muluki.

²⁰Ku wa hi kona yinwani yimpi kambe le Gati. Laho ku wa hi kona a munhu wo leha, loyi a nga hi ni 6 wa titiho lomu mandleni yakwe ni 6 wa titiho lomu mikonzweni yakwe; tontlhe ti wa hi 24 wa tona. Yenawu i wa hi xihotlovila.

²¹Laha a nga rukatela a vaIsraeli, Jonatani wa Xemei, a nakulobye wa Davida, i lo mu daya.

²²Lava va mune va pswalilwe hi xihotlovila le Gati; kanilezi va lo dawa hi canja ga Davida, ni mandla ya malanza yakwe.