Read tshwa 2 Samueli 24 Bible Online

2 Samueli 24 - tshwa bible

2 Samueli 24

¹A zanga ya Jehova yi lo engeta yi vukela va ka Israeli; i lo kucetela Davida a ku va vukela, aku: Famba u ya hlaya va ka Israeli ni va ka Juda.

²Zonake a hosi yi lo byela Joabe a nduna ya yimpi,, loyi a nga hi laha kusuhani kakwe, aku: Famba makunu ka tontlhe tixaka ta ka Israeli, kusukela le Dani kala le Berexeba, u hlaya vanhu va lomu tikweni, kasi nza fela ku tiva a tsengo wabye. [51]

³Joabe i te ngalo ka hosi: Jehova Nungungulu wa wena a engetele a vanhu lomu tikweni hi ka zana ni mahlo ya hosi ya mina a ma zi wone! Makunu hi kuyini a hosi ya mina a ha lavako ku maha lezo ke?

⁴Kanilezi a gezu ga hosi gi lo hlula Joabe ni tinduna ta yimpi, zonake Joabe ni tinduna ta yimpi va lo suka mahlweni ka hosi va ya hlaya vanhu va tiko ga ka Israeli.

⁵Va lo tlhatuka Jordani, va ya gova le Aroera hi tlhelo ga xinene ga muti lowu wu nga xikari ka kova wa ka Gadi, ni le kusuhani ka Jazera. [52]

⁶Zonake va loya le Gileade le tikweni ga Tahtim-Hodxi; va lo ya chikela le Dani-Jaani ni le kusuhani ka Sidoni.

⁷Zonake va loya chikela le khokholeni ga le Tire, ni lomu mitini yontlhe ya maHivi ni ya maKanani, va hunza hi le Dzongeni ga ka Juda le Berexeba.

⁸Va lo fambafamba lomu tikweni gontlhe ga ka Israeli; zonake a nzhako ka 9 wa tihweti ni 20 wa masiku, va lo chikela le Jerusalema.

⁹Zonake Joabe i lo hendleleta a tsengo wa vanhu ka hosi; a va ka Israeli va wa hi 800,000 wa vavanuna lava va zi kotako ku hloma matlhari, a va ka Juda va wa hi 500,000 wa vavanuna.

¹⁰Laha Davida a nga hlayile vanhu i lo biwa hi livalo lakwe. Zonake aku ka Jehova: Nzi onhile nguvu hi lezi nzi mahileko lezi zilo! Makunu Jehova, susa kuonha ka nanza ga wena, hakuva hakunene nzi mahile wupumbu.

¹¹Hi siku gi gamelako, ku te na ha vuka, a gezu ga Jehova gi suya ka muprofeti Gadi, a muwoni wa Davida, gi yaku: Famba u ya byela Davida uku:

¹²Jehova i wulawulile makunu, i te ngalo; Nza veka zixaniso zinharu mahlweni ka wena, hlawula xinwe xa zona, nzi ta ku tsayisa ha xona.

¹³Gadi i loya ka Davida a ya mu tivisa timhaka leti, aku kakwe; U hlawula yini? Kutani 7 wa malembe ya ndlala mave kona lomu tikweni ga wena, kutani ku panzanywa hi valala va wena tihweti tinharu, kutani a kuva ni ntungu masiku manharu lomu tikweni ga wena ke? Makunu ehleketa u nzi tivisa lezi nzi ta nga ya hlamula ka Loyi a nzi rumileko. [53]

¹⁴Davida i te ngalo ka Gadi: Nzi lomu hlomulweni wa hombe nguvu. A hi weleni canjeni ga Jehova, hakuva a wuxinji gakwe ga hombe nguvu; ngha nzi nga weli mandleni ya vanhu!

¹⁵Zonake Jehova i lo rumela a ntungu wu ta daya vanhu lomu tikweni ga va ka Israeli; wu lo enghena kusukela ni mixo kala xikhatini xi yimisilweko. Ku lofa 70,000 wa vanhu kusukela le Dani kala le Berexeba,

¹⁶Makunu laha a ngelosi yi nga tlakusile a canja ga yona hehla ka Jerusalema a kuva yi gi lovisa, Jehova i lo tlhela kubiheni loko, aku ka ngelosi leyi yi lovisako vanhu: Basi, ku enele! Humuta a canja ga wena makunu! A ngelosi ya Jehova yi wa hi laha kusuhani ni nzhimbo wa Arauna a mujebusi. [54]

¹⁷Laha Davida a nga wa wonile a ngelosi ya Jehova leyi yi lovisako vanhu lomu xikari ka tiko i lo wulawula ka Jehova, aku: Languta, mina hi mina nzi onhileko, hi mina nzi mahileko loku kubiha; kanilezi a tiyivu leti ti onhile yini ke? Ngha canja ga wena gi hi hehla ka mina ni hehla ka yindlu ya dadani wa mina!

¹⁸Lego siku Gadi i lota ka Davida, a taku: Kanziha u ya aka a alati ga Jehova le nzhimbyeni wa Arauna a mujebusi.

¹⁹Davida i lo kanziha, khwatsi hi kuwula ka Gadi, kota lezi a leletelweko hi Jehova.

²⁰Zonake Arauna i lo cuwuka na hi le hehla, a wona a hosi zinwe ni malanza ya yona na va kari vata ka yena; zonake Arauna i lo huma lahandle a ya khizama mahlweni ka hosi,

²¹aku: Hosi yanga, U tela yini ka nanza ga wena ke? Davida aku ngalo: Nzi lava a ku xava a nzhimbo wa wena nzi aka a alati ga Jehova laho kasi a ntungu lowu wu fela ku susiwa lomu tikweni.

²²Arauna i te ngalo ka Davida: Hosi yanga, wu teke, u nzi nyika lezi zi faneleko kuwoneni ka wena. Languta, a tihomu ta ku maha ha tona a munyikelo wa kuhiswa, ni ngholowonya ya za ku hula ha zona, ni miyoka zi ta maha tihunyi.

²³Arauna i lo nyikela lezo ka hosi, aku ka yona: Jehova Nungungulu wa wena a ku amukele!

²⁴A hosi yiku ka Arauna: Lezo a hi zona. Nzi ta xava ka wena hi mali, hakuva a nzi zi koti ku nyikela ka Jehova Nungungulu wa mina a muphahlelo wa zilo lezi nzi nga rihelangiko nchumu. Zinghaho Davida i lo xava a nzhimbo ni tihomu hi 50 wa maxekeli ya siliva.

²⁵Zonake Davida i lo aka a alati ga Jehova; a nyikela miphahlelo ya kuhiswa, ni miphahlelo ya kurula; hilezo Jehova i lo tsetselela a vanhu, zonake a ntungu wa khawula lomu ka Israeli.