Read tshwa 2 Samueli 7 Bible Online

2 Samueli 7 - tshwa bible

2 Samueli 7

¹Laha a hosi yi nga wa tshamile lomu ndlwini ya yona, Jehova na mu nyikile xikhati xo humula xikari ka valala vakwe lava va nga wa mu ranzele,

²i te ngalo ka muprofeti Natani: Mina nzi tshama lomu ndlwini ya sedare kasilezo a arke ga Nungungulu gi tshama lomu matendeni!

³Natani aku ka hosi: Famba u ya maha zontlhe lezi zi nga mbilwini ya wena, hakuva Jehova i zinwe na wena.

⁴Kanilezi gwalego wusiku ku lota gezu ga Jehova ka Natani, gi taku:

⁵Famba u ya byela Davida, a nanza ga mina, uku: Jehova i ngalo: Kasi nzi ta akelwa hi wena a yindlu leyi nzi ta nga tshama ka yona ke?

⁶Hakuva cima a nzi se nga tshama lomu ndlwini kusukela siku lego nzi nga humesa ha gona va ka Israeli le Gipite, nzi wa hi mufambi, na nzi tshamile lomu tendeni ni lomu tabernakeleni. [10]

⁷Kontlhe lomu nzi nga fambafamba ni va ka Israeli, kasi nzi na nga wula ni gezu ginwe ka linwe la tixaka ta ka Israeli leti nzi ti rumileko a ku risa vanhu va mina, va nga va ka Israeli; nziku: Hi yini mu nga nzi akeliko a yindlu ya sedare ke?

⁸Hikwalaho u ta mu byela lezo Davida, a nanza ga mina, uku; Jehova wa tiyimpi i ngalo: Mina nzi ku tekile lomu wuriselweni, ni xikari ka tiyivu kasi wena u fela ku maha murangeli wa vanhu va mina, va nga vona va ka Israeli.

⁹Na mina nzi wa hi na wena kontlhe lomu u nga wa famba kona; nzi hetile vontlhe valala va wena mahlweni ka wena, nzi ku maha uva ni vito ga hombe, khwatsi hi mavito ya vahombe va nga laha misaveni.

¹⁰Mina nzi ta longisa a wutshamu ga vanhu va mina, va ka Israeli, nzi va zimekisa va aka ka gona, va nga ha nzulanzula A vanhu vo biha cima va nga ta ha va hlokisa kambe khwatsi hi kusanguleni. [11]

¹¹Kusukela siku lego nzi nga yimisa valamuli hehla ka vanhu va mina, va ka Israeli. Nzi ku nyikile kuhumula ka vontlhe valala va wena. Tlhatakumbiri Jehova i ku tivisa lezaku yena i ta ku mahela yindlu.

¹²Loku masiku ya wena ma mbhelile, na u etlele ka vararu va wena, mina nzi ta yimisa a nʼwana wa wena a nzhako ka wena, loyi a ta nga huma xiwunwini xa wena, nzi tiyisa mufumo wakwe.

¹³Yena i ta akela vito ga mina a yindlu, minawu nzi ta yimisa xitshamu xakwe xa wukosi xa mufumo wakwe kala kupinzuka.

¹⁴Nzi tava raru wakwe, yenawu i tava nʼwana wa mina. Ku taku loku a maha za kubiha nzi mu tsayisa hi nhonga ya vanhu, ni limhika la vanana va vanhu, [12]

¹⁵Kanilezi a wunene ga mina gi nga ta suka ka yena, khwatsi hi lezi nzi gi susileko ka Saule, loyi nzi mu susileko mahlweni ka wena.

¹⁶Kanilezi a yindlu ya wena, ni mufumo wa wena zi ta tshama kala kupinzuka mahlweni ka mina. A xitshamu xa wena xa wukosi xi ta su tsonzoma kala kupinzuka.

¹⁷Natani i lo ya hlawutela Davida tontlhe timhaka leto ni muwoniso wontihe lowo.

¹⁸Zonake Davida i lo enghena a tshama mahlweni ka Jehova, aku: Hi minawu mani, Hosi Jehova? A yindlu ya mina yona ya kuva xini, ko kala u nzi neha laha? [13]

¹⁹Na kona xi wa hi xilo xitsongwani mahlweni ka wena Hosi Jehova. Kanilezi wena u wulawulile hi yindlu ya nanza ga wena ni ka xikhati xa ha tako. O Hosi Jehova, xana lexo xileletelo xa vanhu ke?

²⁰Xini a nga engetako a wula Davida ka wena? Hakuva wena wa gi tiva a nanza ga wena, Hosi Jehova!

²¹Hi kota ya gezu ga wena ni mbilu ya wena u mahile a xilo lexi xa hombe, ni ku tivisa a nanza ga wena, kasi a fela ku zi tiva.

²²Hikwalaho u wa hombe, Jehova Nungungulu! Hakuva a nga kona munwani wa ku fanana na wena, a nga kona Nungungulu ahandle ka wena, kukotisa zontlhe hi zi zwileko hi tindleve ta hina. [14]

²³Hi gihi tiko laha misaveni gi fananako ni vanhu va wena va ka Israeli, lava Nungungulu a va tlhatlhisileko, kasi va fela ku maha a vanhu vakwe, a ti mahela vito, a mu mahela zilo za hombe zi chavekako lomu tikweni ga wena, hi ku hlongola a vanhu ni vanungungulu vabye mahlweni ka vanhu va wena lava u va tlhatlhisileko le tikweni ga Gipite ke?

²⁴Wena u ti yimisele a vanhu va wena va ka Israeli a kuva va wena kala kupinzuka; hikwalaho wena Jehova u mahile Nungungulu wabye.

²⁵Makunu Jehova Nungungulu, tatisa kala kupinzuka a gezu legi u gi wulileko hi nanza ga wena ni yindlu yakwe, u maha khwatsi hi lezi u wulileko.

²⁶Zonake a vito ga wena gi ta dumiswa kala kupinzuka, vaku: Jehova wa tiyimpi i Nungungulu wa ka Israeli! Lezo a yindlu ya nanza ga wena Davida yi ta tiyiswa mahlweni ka wena.

²⁷Hakuva wena Jehova wa tiyimpi, Nungungulu wa ka Israeli, u tivisile a nanza ga wena, uku: Nzi ta ku akela a yindlu. Hikwalaho a nanza ga wena gi tiyile mbilu gi khongela a mukombelo lowu.

²⁸Makunu Hosi Jehova, hi wena u nga Nungungulu, ni timhaka ta wena ta zinene; na wena u tsumbisile a mhaka leyi yo saseka ka nanza ga wena.

²⁹Hikwalaho katekisa a yindlu ya nanza ga wena makunu, kasi yi fela ku tshama mahlweni ka wena kala kupinzuka. Hakuva hi wena Hosi Jehova u wulileko lezo; hikwalaho ngha a yindlu ya nanza ga Wena yi katekiswa hi zikatekiso za wena za kala kupinzuka.