Read tshwa 2 Samueli 8 Bible Online

2 Samueli 8 - tshwa bible

2 Samueli 8

¹Anzhako ka lezo Davida i lolwa ni vaFilistia a va hlula, a teka zinza gabye mandleni ya vaFilistia.

²Zonake i lo hlasela a vaMoabi, a va etlelisa lahasi, a va pima hi lingoti; lava va nga wa ringana tingoti timbiri i lo va daya; lava va nga wa ringana lingoti linwe i lo va tsika va hanya. Zinghaho a vaMoabi va lo maha malanza ya Davida, va luva yena. [15]

³Davida i lo hlasela Hadadezera nʼwana Rehoba, a hosi ya le Zoba, na a haya ku ya tiyisa mufumo wakwe le Congweni wa Eufrate.

⁴I lo mu wutlela 1,700 wa vakhileli va mahaxi, ni 20,000 wa vavanuna va fambako hi milenge, a tsema misiha ya mahaxi ya tontlhe tikareta, a siya lawa ma ringanako 100 wa tikareta.

⁵A maSiria ya le Damasku ma lota ku ta vunetela Hadadezera, a hosi ya le Zoba, kanilezi Davida i lo daya 22,000 wa maSiria.

⁶Zonake Davida i lo veka mabutho ya tiyimpi takwe a ku hlayisa le Siria wa le Damasku; zonake a maSiria ma lo maha malanza ya Davida, va luva kakwe. Zinghaho Jehova i lo vunetela Davida ni kwihi laha a yako kona.

⁷Davida i lo teka a zitlhangu za nzalama lezi zi nga wa hi za malanza ya Hadadezera a zi neha Jerusalema.

⁸Davida i lo teka a suku wo tala nguvu le Betani le Berotai, a miti ya Hadadezera.

⁹Makunu laha Toi, a hosi ya le Hamate, a ngazwa lezaku Davida i khozisile tontlhe tiyimpi ta Hadadezera;

¹⁰Toi i lo rumela a nʼwana wakwe Joramu le ka Davida a ku ya mu losetela ni ku ya mu dzunza hi kota ya lezi a ngalwa na Hadadezera a mu hlula; hakuva Hadadezera i wa hi ni zunga na Toi. Joramu i lota ni zibya za siliva ni za nzalama ni za suku.

¹¹Zonake Davida i lo zi nyikela ka Jehova, zinwe ni siliva ni nzalama leyi a nga wa yi tekile ka wontihe matiko lawa a nga wa ma khozisile.

¹²A za le matikweni ya le Siria ni tiko ga le Moabi, ni ka vanana va ka Ammoni, ni ka vaFilistia, ni ka vaAmaleki, ni muphango wa Hadadezera nʼwana Rehoba, a hosi ya le Zoba.

¹³Davida i lo kulisa vito gakwe laha a nga wa wuya hi le ko ya hlasela maSiria le Koveni wa Munyu, a daya 18,000 wa vavanuna.

¹⁴Zonake i lo veka mabutho ya tiyimpi ka wontihe matiko ya ka Edomi, ni vontlhe vaEdomi va lo maha malanza ya Davida. Zinghaho Jehova i lo vunetela Davida a ku hlula ni kwihi laha a yako kona. [16]

¹⁵Davida i lo fumela vontlhe va ka Israeli, a lamula ni ku lulamisa timhaka ta vanhu vakwe vontlhe.

¹⁶Joabe nʼwana Zeruia i wa hi nduna ya yimpi, Jehoxafate nʼwana Ahiluda i wa hi muhlayisi wa mitsalo;

¹⁷Zadoke nʼwana Ahituba, na Ahimeleki nʼwana Abiatara, va wa hi vapristi; Seraia i wa hi matsalani;

¹⁸Benaia nʼwana Jehoiada i wa hi nduna ya vaKereti ni maPeleti; a vanana va Davida va wa hi vapristi.