Read tshwa 1 Tihosi 1 Bible Online

1 Tihosi 1 - tshwa bible

1 Tihosi 1

¹Makunu Hosi Davida i wa khosahele, a hi ni masiku yo tala; va wa mu fenengeta hi mikumba, kanilezi a ngazwi kukufumela.

²A malanza yakwe ma te ngalo ka yena: Ngha hosi ya hina yi labyelwa a nhwana muswa, a ta yima mahlweni ka hosi a yi hlayisa, ni ku etlela xifuveni xa yona, kasi a hosi ya hina yi fela kuzwa kukufumela.

³Va lo lava a nhwana wo saseka lomu tikweni gontlhe ga ka Israeli, va si kuma Abixaga, a muXuname, va mu neha ka hosi.

⁴A nhwana loye i wa sasekile nguvu. I lo hlayisa a hosi a yi tirela, kanilezi a hosi a yi mu tivangi.

⁵Zonake Adonija nʼwana Haggite i lo ti kulisa, aku: Mina nzi tava hosi! I lo ti lavela a tikareta ni vakhileli va mahaxi, ni 50 wa vavanuna lava va nga wa tsutsuma mahlweni kakwe. [1]

⁶A raru wakwe a nga na nga mu kawuka, aku: Hi yini u maha lezo ke? Kanilezi yenawu kambe i wa sasekile nguvu mirini wakwe, na hi nzisana ka Absalome.

⁷Yena i lo wulawula na Joabe wa Zeruia, na mupristi Abiatari; na vona va lo lanzela Adonija va mu vunetela.

⁸Kanilezi mupristi Zadoke, na Benaia wa Jehoiada, na muprofeti Natani, na Ximei, na Rei, ni tinhenha ta Davida, vontlhe lavo a va lanzelangi Adonija.

⁹Adonija i lo daya a tiyivu ni tikavi ni marole yo nona kusuhani ni ribye ga Zohelete legi gi nga laha kusuhani ni Enrogeli; na yena i lo vitana vontlhe vanakulobye, a vana va hosi, ni vontlhe vanhu va ka Juda a malanza ya hosi. [2]

¹⁰Kanilezi a nga vitanangi muprofeti Natani, na Benaia, ni tinhenha, ni nakulobye Solomoni.

¹¹Zonake Natani i lo wulawula na Batexeba, a mamani wa Solomoni, aku: A ku zi zwangi lezaku Adonija wa Haggite wa fuma, na hosi Davida a nga zi tivi?

¹²Makunu ngone, nzi ta ku nyika wusungukati legi gi ta nga ponisa wutomi ga wena ni ga nʼwana wa wena Solomoni:

¹³Famba u ya enghena ka hosi Davida, uku kakwe: Hosi yanga, a hi wena u nga hlambanya ka nanza ga wena, uku: Hizinene, a nʼwana wa wena Solomoni i ta fuma anzhako ka mina; i ta tshama hehla ka xitshamu xa wukosi xa mina ke? Makunu hi kuyini Adonija a fumako ke?

¹⁴Cuwuka, na wa ha wulawula ni hosi, minawu kambe nzi ta enghena nzhako ka wena nzi tiyisa a timhaka ta wena.

¹⁵Batexeba i lo ya enghena lomu ndlwini ka hosi. A hosi yi wa khosahele nguvu, na yi hlayiswa hi Abixaga a muXuname.

¹⁶Batexeba i lo korama a kombisa xichavo mahlweni ka hosi. Zonake a hosi yi te ngalo kakwe: Wo lava yini?

¹⁷Yena aku: Hosi yanga, wena u hlambanyile ka nanza ga wena ha Jehova Nungungulu wa wena, uku: Hizinene a nʼwana wa wena Solomoni i ta fuma anzhako ka mina; hi yena a ta nga tshama xitshanwini xa mina xa wukosi.

¹⁸Kanilezi inyamutlha ku fuma Adonija, na wena hosi yanga u nga zi tivi!

¹⁹I tlhavile tihomu ni marole yo nona, ni tiyivu to tala. I vitanile vontlhe vana va hosi na mupristi Abiatari, na Joabe a nduna ya yimpi; kanilezi cima a nga vitanangi nanza ga wena Solomoni.

²⁰Kasike wena hosi yanga, a mahlo ya vontlhe va ka Israeli ma cuwukele wena, lezaku u ta va byela loye a nga yena a to tshama xitshanwini xa wena xa wukosi anzhako ka wena hosi yanga.

²¹Xinwani xikhati laha wena hosi yanga u ta nga etlela zinwe ni vadadani va wena mina ni nʼwana wa mina Solomoni hi ta hlayiwa lezaku hi vaonhi.

²²Na a ha wulawula ni hosi, ku lo ta chikela muprofeti Natani.

²³Zonake va lo ya byela hosi, vaku: Muprofeti Natani i kona laha! I lo enghena aya mahlweni ka hosi a ya korama a kombisa xichavo.

²⁴Natani i te ngalo: Hosi yanga, Hi wena u wulileko, uku: Adonija i ta fuma anzhako ka mina, hi yena a ta nga tshama xitshanwini xa mina xa wukosi ke?

²⁵Hakuva i relele inyamutlha; i tlhavile tihomu ni marole yo nona, ni tiyivu to tala; i vitanile vontlhe vana va hosi ni tinduna ta yimpi, na muprofeti Abiatari. Languta, vona vaga vanwa mahlweni kakwe, na vaku: A simame a hanya hosi Adonija!

²⁶Kanilezi mina nanza ga wena, na mupristi Zadoke, na Benaia wa Jehoiada, ni nanza ga wena Solomoni, a nga hi rambangi.

²⁷Ina nweno lezi zilo zi mahiwa hi hosi yanga, lezaku u nga tivisi malanza ya wena loyi a ta nga tshama xitshanweni xa wena xa wukosi anzhako ka hosi ya mina ke?

²⁸Hosi Davida i lo hlamula, aku: Nzi vitaneleni Batexeba. Zonake i lo enghena a yima mahlweni ka hosi.

²⁹A hosi yi lo hlambanya yiku: Nzi hlambanya ha Jehova a hanyako, loyi a tlhatlhisileko muhefemulo wa mina makhombyeni wontihe,

³⁰khwatsi hi lezi nzi hlambanyileko ka wena hi Jehova Nungungulu wa ka Israeli, nziku: Hizinene, a nʼwana wa wena Solomoni i ta fuma anzhako ka mina, a tshama xitshanweni xa mina xa wukosi xikhundleni xa mina! Inyamutlha nzi ta maha lezo.

³¹Zonake Batexeba i lo korama a nyika xichavo mahlweni ka hosi, aku: Ngha a hosi yanga Davida a hanya kala kupinzuka!

³²Zonake hosi Davida i te ngalo: Nzi vitaneleni mupristi Zadoke, na muprofeti Natani, na Benaia nʼwana Jehoiada. Zonake va lo ta enghena mahlweni ka hosi.

³³A hosi yi te ngalo kabye: Fambani mu ya teka malanza ya hosi ya nwina, mu khilelisa a nʼwana wa mina Solomoni hehla ka mula ya mina, mu mu heleketa le Gihoni.

³⁴Mupristi Zadoke, na muprofeti Natani ngha va mu wumbela a kuva hosi hehla ka Israeli. Zonake muba mpunzu, muku: Hosi Solomoni, hanya kala kupinzuka!

³⁵Nwina mu ta mu lanzela, a ya enghena a tshama hehla ka xitshamu xa mina xa Wukosi, a fuma xikhundleni xa mina. Nzi mu yimisile a kuva murangeli wa va ka Israeli ni va ka Juda.

³⁶Zonake Benaia wa Jehoiada i lo hlamula, aku: Amen! A wulise zalezo Jehova Nungungulu wa hosi ya mina!

³⁷Khwatsi hi lezi Jehova a nga wa hi zinwe ni hosi ya mina, zinghaho ave na Solomoni kotisa zalezo, a kulisa a xitshamu xa yena xa wukosi ku hunza xitshamu xa wukosi xa Davida a nwinyi wa mina!

³⁸Zonake mupristi Zadoke i lo Suka zinwe na muprofeti Natani, na Benaia, wa Jehoiada, ni maKereti, ni maPeleti, va ya khilelisa Solomoni hehla ka mula ya hosi Davida, va mu yisa Gihoni.

³⁹Zonake mupristi Zadoke i lo ya teka limhonzo la mafura lomu Tabernakelini ga Jehova, a tota Solomoni; zonake va loba mimpunzu, a vanhu vontlhe vaku: Hosi Solomoni, hanya kala kupinzuka!

⁴⁰A vanhu vontlhe va lo mu lanzisela na vaba tinanga, na va yimbelela va tsaka nguvu, ni misava yi cwangula hi guwa ga vona.

⁴¹Adonija ni wontihe gotsovanyano lowu a nga hi nawo, laha na va ha gumesa kuga, va lozwa a guwa. Yenawu Joabe i lozwa a guwa ga mpunzu, zonake aku: A guwa lego ga pfilupfilu gi zwalako le mutini ga yini?

⁴²Laha na ha wulawula, ku lo chikela Jonatani wa mupristi Abiatari. Adonija aku kakwe: Ngone, hakuva u wanuna loyi a nehako mahungu yo saseka.

⁴³Jonatani aku ka Adonija: A hi zona! A nwinyi wa mina, hosi Davida, i yimisile Solomoni a kuva hosi.

⁴⁴A hosi yi rumile mupristi Zadoke, na muprofeti Natani, na Benaia wa Jehoiada, ni maKereti, ni maPeleti, a kuva zinwe naye, va mu khilelisa hehla ka mula ya hosi.

⁴⁵Mupristi Zadoke, na muprofeti Natani va mu totile a kuva hosi le Gihoni; va tlhela va wuya hi kutsaka. Hi kota ya lezo a muti wa cwangula kambe. Hi gona a guwa lego mu gi zwileko.

⁴⁶Yenawu Solomoni i tshamile xitshanweni xa wukosi.

⁴⁷Wontihe malanza ya hosi ma tile a ku ta bonga a nwinyi wa hina, hosi Davida, maku: Nungungulu wa wena a tlakuse a vito ga Solomoni ku hunza a vito ga wena, a kulise xitshamu xakwe xa wuhosi a ku hunza xitshamu xa wena! A hosi yi lo korama laha mubhedini wa yona.

⁴⁸Ni kambe a hosi yi te ngalo: A ku dzunziwe Jehova Nungungulu wa ka Israeli, loyi inyamutlha a nyikileko a munhu loyi ku tshama xitshanweni xa mina xa wuhosi, na nzi mu wona hi mahlo ya mina!

⁴⁹Zonake wontihe a gotsovanyano wa Adonija wu lo sangula ku rurumela, va suka va famba, loyi ni loyi a ti fambela ndlela yakwe.

⁵⁰Adonija i lo chava hi kota ya Solomoni; i lo suka a ya khoma a timhonzo ta alati. [3]

⁵¹Zonake va lo byela Solomoni, vaku: Languta, Adonija wa chava hosi Solomoni. I yile a ya khoma timhonzo ta alati, i ngalo: Ku ranga hosi Solomoni a hlambanye ka mina lezaku a nga ta daya a nanza gakwe hi tlhari!

⁵²Solomoni i te ngalo: Loku yena a kombisa kutsumbeka, ku hava ni sisi munwe wa hloko yakwe wu ta ngawa; kanilezi loku kubiha ku kumiwa ka yena, i tafa.

⁵³Zonake hosi Solomoni i lo ruma vanhu va ya mu chikisa le alatini, zonake i lo ta korama mahlweni ka hosi Solomoni. Solomoni aku kakwe: Famba ndlwini ya wena.