Read tshwa 1 Tihosi 10 Bible Online

1 Tihosi 10 - tshwa bible

1 Tihosi 10

¹Laha a muzinza wa le Xeba a nga wa zwile a wudumo ga Solomoni xungetano ni vito ga Jehova, i lo ta mu ringa hi ziwutiso zo binza. [32]

²I lota le Jerusalema na hi ni vanhu vo tala nguvu, na va hi ni makameli ma rweleko mipepo yo nuhela, ni nzalama yo tala nguvu, ni maribye ya tsengo. I lota ka Solomoni a ta mu hlawutela zontlhe zi nga hi mbilwini yakwe.

³Solomoni i lo hlamula zontlhe ziwutiso zakwe; cima ku wa nga hi na nchumu xi nga fihlele ka hosi, lexi a nga tsanzeka ku xi tlhamusela ka yena.

⁴Laha a muzinza wa le Xeba a nga wona wutlhari gontlhe ga Solomoni, ni yindlu leyi a yi akileko,

⁵ni zakuga za laha mezeni yakwe, ni matshamela ya malanza yakwe, ni matirela ya tinduna takwe, ni tinguwo tabye, ni vakhomi va magombe yakwe, ni minyikelo leyi a yi nyikelako lomu ndlwini ya Jehova, zonake i lo mbhela ntamu hi kuhlamala,

⁶aku ngalo ka hosi: Hakunene zi tiyile lezi nzi nga zizwa na nzi hi le tikweni ga mina, va hlawutela hi timhaka ta wena ni wutlhari ga wena!

⁷Nzi wa nga kholwi na nzi nga se ta zi wona hi mahlo ya mina. Kanilezi vona a va nzi byelangi a khihlanya ga zona. A wutlhari ga wena ni titshomba ta wena za hunza lezi nzi zi zwileko.

⁸Va katekile a vanhu va wena, ma katekile malanza ya wena, lawa ma yimako wontihe masiku mahlweni ka wena ma ingisa wutlhari ga wena!

⁹A ku khesiwe Jehova Nungungulu wa wena, loyi a xaleleko ha wena, a ku ku yimisa xitshanwini xa wuhosi xa ka Israeli! Jehova i ku yimisile a kuva hosi, u lamula ni ku tsema timhaka, hakuva wa ranza va ka Israeli kala kupinzuka.

¹⁰Zonake i lo nyika a hosi a 120 wa titalenta ta nzalama, ni mipepo yo tala nguvu, ni maribye ya tsengo. Cima ku wa nga tangi ni siku ginwe a mipepo yo tala nguvu kota leyi yi ngata ni muzinza wa le Xeba ku ta nyika hosi Solomoni.

¹¹A mataru ya Hiramu, lawa ma nehako a nzalama ya le Ofira, ma lo neha kambe ni tisinya to tala nguvu ta almuga, ni maribye ya tsengo, na zita hi le Ofira.

¹²Zonake a hosi yi lo maha timhanze ta yindlu ya Jehova ni ta yindlu ya hosi hi tisinya ta almuga, ni ku maha zitende, ni timbila ta vayimbeleli. Hi cima ku wa nga se ngata a tisinya ta almuga to kota leto, ni kambe cima a ta ha woniwangi to kota leto kala nyamutlha.

¹³Yenawu hosi Solomoni i lo nyika muzinza wa le Xeba zontlhe lezi a nga wa zi ranza ni lezi a nga wa zi kombela; hosi Solomoni i lo mu nyika zinyikiwo za wukosi ni ku hunza lezo. Zonake i lo tlhela a famba tikweni gakwe ni malanza yakwe.

¹⁴A kubinza ka nzalama leyi yi nga wata ka Solomoni lembe ni lembe, ku wa hi 666 wa titalenta ta nzalama,

¹⁵ahandle ka leyi yi ngata hi ka vamahungani ni ka vaxavisi, ni ka tihosi tontlhe ta le Arabia, ni ka tinduna ta tiko.

¹⁶Hosi Solemoni i lo maha 200 wa tingenge ta nzalama yi tlombilweko; a ngenge yinwe ni yinwani yi wa hi ya 600 wa maxekeli ya nzalama.

¹⁷I lo maha kambe a 300 wa zitlhangu za nzalama yi tlombilweko; a xitlhangu xinwe ni xinwani ni mahiwa hi tikilo tinharu ta nzalama; a zi veka lomu ndlwini ya Khwati-ga-Lebanoni.

¹⁸Zonake i lo maha xitshamu xa hombe xa wuhosi xa timhonzo ta tindlovu, a xi nameketa hi nzalama yo ngangamela.

¹⁹A xitshamu lexo xi wa hi ni 6 wa zikanzihelo; le hehla ka xona ku wa hi ni xirenzelekwani hi le nzhako ka xona; lomu matlhelweni ya kona ku wa hi ni mawoko; ni tinghala timbiri lomu matlhelweni ya mawoko.

²⁰A tinghala tinwani ta 12 ti wa yimile hi lomu matlhelweni mambiri ya zikanzihelo. Cima a zi na nga mahiwa zo kota lezo ka yinwani hosi.

²¹Zontlhe zibya za kunwa ha zona za hosi Solomoni zi wa hi za nzalama, ni zontlhe zibya za yindlu ya Khwati-ga-Lebanoni zi wa hi za nzalama yo ngangamela. Cima a ku na ngava ni xinwe xibya xa siliva. Hakuva a siliva yi wa nga hlayelwi nchumu masikwini ya Solomoni.

²²Hakuva a hosi yi wa hi ni mataru le bimbini ga le Tarxixi ni mataru ya Hiramu; nzeni ka malembe manharu, a mataru ya le Tarxixi ma wata kanwe na ma rwele nzalama ni siliva, ni timhonzo ta tindlovu, ni tifenhe ni tipavawu.

²³Zinghaho hosi Solomoni i lo hunza tontlhe tihosi ta misava hi titshomba ni wutlhari.

²⁴Vontlhe vanhu va misava va wa lava ku wona Solomoni, ni kuzwa hi wutlhari legi Nungungulu a nga wa gi vekile mbilwini yakwe;

²⁵loyi ni loyi i lo nehela nzuwo yakwe, zi nga zona zibya za siliva ni za nzalama, ni tinguwo, ni matlhari, ni mipepo, ni mahaxi, ni mamula, zi mahiwa lezo lembe ni lembe.

²⁶Solomoni i lo hlengeleta a tikareta ni vakhileli va mahaxi, na yena i wa hi ni 1,400 wa tikareta, ni 12,000 wa vakhileli va mahaxi, lava a nga va veka lomu mitini ya tikareta, ni le hosini le Jerusalema.

²⁷I lo hlengeletela a siliva yi tala le Jerusalema khwatsi maribye, ni tisinya ta tisedare khwatsi mikuwu le koveni.

²⁸Solomoni i wa hi ni mahaxi yakwe lawa ma nga wata hi le Gipite; a vamahungani va hosi va lo ya lava mitlhambi ya wona hi tsengo wa mali leyo yi wulilweko;

²⁹a kareta yinwe ni yinwani yi ngata hi le Gipite yi lo vitana 600 wa maxekeli, ni mahaxi ma wa hi 150 wa maxekeli kada ginwe; va wa neha zona ni ka tihosi tontlhe ta maHiti ni ka tihosi ta le Siria.