Read tshwa 1 Tihosi 16 Bible Online

1 Tihosi 16 - tshwa bible

1 Tihosi 16

¹A gezu ga Jehova gi loya ka Jehu a nʼwana Hanani, gi vukela Baaxa giku:

²Mina nzi ku tlakusile lomu tshurini, nzi ku yimisa a kuva murangeli wa vanhu va mina va ka Israeli; kanilezi wena u lanzele a ndlela ya Jeroboamu u onhisa a vanhu va mina, a va ka Israeli, va nzi zangarisa hi zionho zabye.

³Languta, mina nzi ta hangalasa Baaxa ni yindlu yakwe, nzi maha a yindlu ya wena kota a yindlu ya Jeroboamu wa Nebate.

⁴A munhu wa ka Baaxa a ta ngafa laha mutini i ta giwa hi timbyana, ni loye a ta nga fela khwatini i ta giwa hi tinyanyani ta tilo.

⁵A timhaka tinwani ta Baaxa leti a ti mahileko, ni mitiro yakwe, zi tsalilwe lomu bhukwini ga Matimu ya tihosi ta ka Israeli.

⁶Baaxa i lo etlela ni vararu vakwe a lahliwa le Tirza; zonake Ela a nʼwana wakwe a fuma xikhundleni xakwe.

⁷A gezu ga Jehova gi lota ka muprofeti Jehu nʼwana Hanani, gi vukela Baaxa ni yindlu yakwe hi kota ya kubiha kontlhe loku a ku mahileko mahlweni ka Jehova, a mu zangarisa hi mitiro ya mandla yakwe a ku fanana ni yindlu ya Jeroboamu, ni lezi yena a nga hlasela a yindlu ya Jeroboamu.

⁸Hi lembe ga 26 ga kufuma ka Asa a hosi ya ka Juda, Ela a nʼwana Baaxa i lo sangula ku fumela va ka Israeli le Tirza, a fuma malembe mambiri.

⁹Kanilezi a nanza gakwe Zimri, a nduna ya khihlanya ga tikareta takwe, i lo maha mahlevo. Laha Ela a nga wa hi le Tirza, na a kari anwa a popiwa lomu ndlwini ka Arza, loyi a nga wa hi muhlayisi wa yindlu ya le Tirza,

¹⁰Zimri i lo enghena a mu tlhava, a mu daya hi lembe ga 2 7 ga kufuma ka Asa a hosi ya ka Juda; zonake i lo fuma xikhundleni xakwe.

¹¹Laha na a sangule ku fuma, na a tshamile xitshanwini xakwe xa wuhosi, i lo hihirita vontlhe vanhu va yindlu ya Baaxa, a nga siyi hambu ni munhu munwe, hambu ni maxaka yakwe, ni vanghana vakwe.

¹²Zimri i lo hihirita yontlhe a yindlu ya Baaxa, khwatsi hi lezi Jehova a wulawulileko hi nomu wa muprofeti Jehu,

¹³hi kota ya zionho zontlhe za Baaxa, ni zionho za Ela nʼwana wakwe, lezi va zi mahileko ni lezi va nga onhisa ha zona va ka Israeli, va zangarisa Jehova a Nungungulu wa vaIsraeli hi ku khozela a zifananiso zabye za hava.

¹⁴A timhaka tinwani ta Ela, ni zontlhe lezi a zi mahileko zi tsalilwe lomu bhukwini ga Matimu ya tihosi ta ka Israeli.

¹⁵Hi lembe ga 27 ga kufuma ka Asa a hosi ya ka Juda, Zimri i lo fuma 7 wa masiku le Tirza. Makunu a vanhu va wa govile va vimbezela Gibetoni legi gi nga ga vaFilistia,

¹⁶A vanhu va lozwa na va hi kwaleyo wugovelweni lezaku Zimri i mahile mahlevo ni lezaku i dele a hosi. Gwalego siku vontlhe va ka Israeli, kwaleyo wugovelweni, va lo yimisa Omri a nduna ya yimpi a kuva hosi ya ka Israeli.

¹⁷Zonake Omri ni vontlhe va ka Israeli va lo suka le Gibetoni va ya vimbezela Tirza.

¹⁸Laha Zimri a nga wona lezaku a muti wu khozisilwe, i lo enghena lomu ndlwini ya wuhosi a yi hisa na hi lomu,

¹⁹afa hi kota ya zionho zakwe lezi a zi mahileko hi ku maha kubiha mahlweni ka Jehova, hi ku lanzela a ndlela ya Jeroboamu ni lomu xionhweni xakwe lexi a onhisileko ha xona a va ka Israeli.

²⁰A timhaka tinwani ta Zimri ni mahlevo lawa a ma mahileko, zi tsalilwe lomu bhukwini ga Matimu ya tihosi ta ka Israeli.

²¹Zonake a vanhu va ka Israeli va lo avanyeka va maha mitlawa mimbiri; a vanwani va lo lanzela Tibini nʼwana Ginate, va mu maha hosi, a vanwani va lanzela Omri.

²²A valanzeli va Omri va lo hlula a valanzeli va Tibini nʼwana Ginate. Zonake Tibini i lofa, ku fuma Omri.

²³Hi lembe ga 31 ga kufuma ka Asa a hosi ya ka Juda, Omri i lo sangula ku fumela Israeli. I lo fuma 12 wa malembe, a fuma le Tirza 6 wa malembe.

²⁴Zonake i lo xava a xitsunga xa le Samaria ka Xemeri hi titalenta timbiri ta siliva. I lo aka ka xitsunga lexo, a muti lowo a wu chula vito ga Samaria, hi kota ya vito ga Xemeri a nwinyi wa xitsunga lexo.

²⁵Omri i lo maha lezi zi bihileko mahlweni ka Jehova, ku hunza vontlhe lava va mu rangeleko. [47]

²⁶I lo lanzela tontlhe tindlela ta Jeroboamu nʼwana Nebate, ni xionhweni xakwe lexi a onhisileko ha xona va ka Israeli, va zangarisa Jehova Nungungulu wa ka Israeli hi zifananiso zabye za hava.

²⁷A timhaka tinwani ta Omri, ni mitiro leyi a yi mahileko ni zimaho zakwe za ntamu, zi tsalilwe lomu bhukwini ga Matimu ya tihosi ta ka Israeli.

²⁸Omri i lo etlela ni vararu vakwe, a lahliwa le Samaria; zonake a nʼwana wakwe Ahabi i lo fuma xikhundleni xakwe.

²⁹Ahabi nʼwana Omri i lo sangula ku fumela Israeli hi lembe ga 38 ga kufuma ka Asa a hosi ya ka Juda. I lo fumela va ka Israeli 22 wa malembe le Samaria.

³⁰Ahabi nʼwana Omri i lo maha lezi zi bihileko mahlweni ka Jehova ku hunza vontlhe lava va mu rangeleko.

³¹A nga kolwangi hi ku maha a zionho lezi zi mahilweko hi Jeroboamu nʼwana Nebate. I lo engeta kambe hi ku teka Jezebeli wa Etebali, a hosi ya vaSidoni, a ya khozela Baali a mu khizamela.

³²I lo aka a alati ga Baali lomu ndlwini ka Baali, leyi a yi akileko le Samaria.

³³Ahabi i lo maha xifananiso xa Axtarte. Lezo Ahabi i lo zangarisa Jehova Nungungulu wa ka Israeli ku hunza tontlhe tihosi ta ka Israeli leti ti mu rangeleko.

³⁴Xikhatini xakwe, Hieli a muBeteli i lo aketa Jeriko. I lo aka a xiseketelo xa gona hi kufa ka Abiramu a nʼwana wakwe wa matewula, a vekela tivati ta kona hi kufa ka Seguba a nʼwana wakwe wa xisiva-marumbu, khwatsi hi kuwula ka Jehova a ka Joxua a nʼwana wa Nuni. [48]