Read tshwa 1 Tihosi 21 Bible Online

1 Tihosi 21 - tshwa bible

1 Tihosi 21

¹Anzhako ka lezo, Nabote a muJezreeli i wa hi ni simu ga xivina le Jezreeli, kusuhani ni yindlu ya wuhosi ya Ahabi a hosi ya le Samaria.

²Ahabi i lo wulawula na Nabote, aku: Nzi nyike a xivina xa wena, kasi nza maha a mazunze ha xona, hakuva xi laha kusuhani ni yindlu ya mina; nzi ta ku nyika xinwani xo saseka ku hunza lexi; ni loku u zi ranza nzi ta ku nyika hi mali yi ringanako xona.

³Nabote i te ngalo ka Ahabi: Kokwihi, a nzi zi koti ku ku nyika a tshomba ya vadadani va mina! [73]

⁴Ahabi i lo famba ndlwini yakwe na a tsanwile, a xaniseka hi kota ya timhaka ta Nabote a muJezreeli, taku: A nzi zi koti ku ku nyika a tshomba ya vadadani va mina, I lo ya etlela mubhedini wakwe, a nghohe yakwe na yi cuwukile khurisini, a ngagi nchumu.

⁵A sati wakwe Jezebeli i lota kakwe a taku: Kasi wo tsuvela yini lezi u nga giko nchumu?

⁶Yena i te ngalo kakwe: Hi lezi nzi nga wulawula na Nabote a muJezreeli, nziku: Nzi xavisele a xivina xa wena hi mali, ni lezaku loku u zi ranza nzi ta ku nyika xinwani xivina wutshanwini ga lexi. Makunu yena i lo hlamula, aku: A nzi zi koti ku ku nyika a simu ga mina!

⁷Jezebeli a sati wakwe i te ngalo: Kasi a hi wena u fumelako a tiko ga va ka Israeli ke? Vuka uga, u xalala; nzi ta ku nyika a simu ga xivina ga Nabote a muJezreeli.

⁸Zonake i lo tsala mapapilo hi vito ga Ahabi, a ma gandla a karimbu yakwe; i lo rumela mapapilo lawo ka masingalakati ni manghanakana lawa ma akeleneko na Nabote.

⁹Lomu mapapilweni i tsalile ku ngalo: Banani hungu ga kuyila, mu nyika Nabote a wutshamu ga le mahlweni;

¹⁰mu yimisa a vavanuna vambiri va nyamijiri mahlweni kakwe, lava va ta ngava timboni ha yena, vaku ngalo: Wena u rukatele Nungungulu ni hosi. Zonake mu ta mu humesa lahandle mu mu gandla hi maribye, afa.

¹¹A vavanuna va muti wabye, a masingalakati ni manghanakana, lava a akeleneko navo, va lo maha khwatsi hi lezi Jezebeli a nga wa va tsalele mapapilweni a va leletela.

¹²Va loba a hungu ga kuyila, va nyika Nabote a wutshamu ga le mahlweni.

¹³Zonake a vavanuna vambiri va nyamijiri va lo ya tshama mahlweni kakwe, va maha wukustumunyu va vukela Nabote mahlweni ka vanhu vaku: Nabote i rukatele Nungungulu ni hosi. Zonake va lo mu humesa lahandle ka muti va ya mu gandla hi maribye, afa.

¹⁴Zonake va lo ya tivisa Jezebeli, vaku: Nabote i gandlilwe hi maribye, afa.

¹⁵Makunu laha Jezebeli a ngazwa lezaku Nabote i gandlilwe hi maribye, afa, i te ngalo ka Ahabi: Suka u ya teka a xivina xa Nabote a muJezreeli, lexi a nga wa ala ku ku xavisela, hakuva Nabote a nga ha hi kona, i file.

¹⁶Laha Ahabi ngazwa lezaku Nabote i file, i lo suka a relela le sinwini ga Nabote a muJezreeli a ya gi teka.

¹⁷Zonake a gezu ga Jehova gi loya ka Elija a muTixebeti gi yaku:

¹⁸Suka u relela u ya tlhangana na Ahabi a hosi ya ka Israeli, loyi a akileko le Samaria; hi gaya, i lomu sinwini ga Nabote, legi a releleko ku ya gi teka.

¹⁹U ta ya mu byela, uku: Jehova i ngalo: Xana a hi wena mudayi ni khamba ke? U mu byela kambe uku: Jehova i ngalo: Laha a timbyana ti nga lazela a nkhata wa Nabote hi kwalaho kambe ti ta nga lazela a nkhata wa wena futsi!

²⁰Ahabi i te ngalo ka Elija: Xana u nzi kumile wena nala wa mina ke? Elija aku: Hi zona, nzi ku kumile, hakuva wena u ti xavisile hi ku maha lezi zi bihileko mahlweni ka Jehova!

²¹Languta, nzi ta neha a khombo hehla ka wena, nzi lovisa vafana vontlhe va ka Ahabi, lava va tsongwani ni lava va nga va hombe lomu ka va ka Israeli;

²²a yindlu ya wena nzi ta yi maha khwatsi hi lezi nzi nga maha a yindlu ya Jeroboamu a nʼwana Nebate, ni ku yi maha khwatsi hi lezi nzi nga maha a yindlu ya Baaxa a nʼwana Ahija, hakuva u nzi zangarisile hi ku onhisa va ka Israeli.

²³Jehova i wulawula kambe ha Jezebeli, aku: A timbyana ti taga Jezebeli laha kusuhani ni khokhola ga Jezreeli.

²⁴Kani hi wihi munhu wa ka Ahabi a ta nga fela laha mutini, a timbyana ti ta muga; ni loyi a ta nga fela khwatini, a tinyanyani ta tilo ti ta muga.

²⁵Kunene, a ku na nga va kona a hosi yo kota Ahabi loyi a xavisileko wutsumbu gakwe hi ku maha lezi zi bihileko mahlweni ka Jehova, hi kota ya Jezebeli sati wakwe a nga mu kucetela.

²⁶Yena i mahile zo biha ku hunzeleta ku lanzeleni ka zifananiso za vanungungulu, ni ku maha zontlhe lezi zi nga wa mahiwa hi vaAmori, lava Jehova a nga wa va hlongolile mahlweni ka vanana va ka Israeli.

²⁷Makunu laha Ahabi a ngazwa timhaka leti, i lo hanzula a tinguwo takwe, a ambala a tinguwo ta tisakwa, a yila. I lo etlela ni tinguwo ta tisakwa, a famba hi kunyanima.

²⁸Zonake a gezu ga Jehova gi loya ka Elija a muTixebeti, gi yaku:

²⁹Xana u zi wonile lezi Ahabi a ti koramisisako zona mahlweni ka mina ke? Kota lezi a ti koramisileko mahlweni ka mina, nzi nga ta neha khombo masikwini yakwe; nzi ta neha khombo ka yindlu yakwe masikwini ya nʼwana wakwe.