Read tshwa 1 Tihosi 5 Bible Online

1 Tihosi 5 - tshwa bible

1 Tihosi 5

¹Hiramu a hosi ya le Tire i lo rumela malanza yakwe ka Solomoni, hakuva i wa zwile lezaku va mu totile a kuva hosi wutshanwini ga raru wakwe, hakuva Hiramu i wa hi xaka ga Davida wontihe masiku. [11]

²Zonake Solomoni i lo rumela mhaka ka Hiramu, aku:

³Wena wa zi tiva khwatsi lezaku dadani wa mina Davida a nga zi kotangi ku aka a yindlu yi lumbako a vito ga Jehova Nungungulu wakwe, hi kota ya tiyimpi leti ti nga wa hi kona, hi ku ranzelwa hi valala vakwe kala Jehova a va veka lahasi ka mikonzo yakwe.

⁴Makunu lezi Jehova Nungungulu wa mina i nzi nyikile kuhumula ka matlhelo wontihe; a ka hi kona valala hambu ni makhombo.

⁵Makunu languta, mina nzi lava ku akela a vito ga Jehova Nungungulu wa mina a yindlu, khwatsi hi lezi Jehova a wulileko ka dadani wa mina Davida, aku: A nʼwana wa wena loyi nzi ta nga mu yimisa xitshanwini xa wena xa wukosi, hi yena a ta nga akela a vito ga mina a yindlu.

⁶Makunu, ruma a vanhu va wena va ya nzi tsemela a tisinya ta tisedare le Lebanoni; a malanza ya mina ma ta famba ni malanza ya wena. Nzi ta ku nyika zontlhe lezi u ta nga zi wula, ziva hakhelo ya malanza ya wena, hakuva wena wa zi tiva lezaku a nga kona ka vanhu va ka hina a zi tivako ku tsema tisinya kota vaSidoni.

⁷Laha Hiramu a nga zwile timhaka ta Solomoni, i lo tsaka nguvu, aku: Inyamutlha a ku bongiwe Jehova, loyi a nyikileko Davida a mufana wo tlhariha a kuva a fumela vanhu va ku talisa lezi.

⁸Zonake Hiramu i lo rumela mhaka ka Solomoni, aku: Nzi ti zwile a timhaka leti u ti rumeleko ka mina. Nzi ta maha zontlhe lezi u zi xuvako xungetano ni tisinya ta tisedare ni ta kipres.

⁹A malanza ya mina ma ta relela ma famba nato kusukela le Lebanoni kala va ti chiketa le bimbini; va ta ti bohelela hi tinyanza kasi ta fela ku famba hi bimbi kala ti chikela ka wutshamu lego u ta nga nzi byela. Va ta ya rulela laho, zonake wena u ta ya ti teka. Wena u ta tatisa kuxuva ka mina hi ku phamela a ngango wa mina.

¹⁰Zinghaho Hiramu i lo nyika Solomoni a tisinya ta tisedare ni ta kipres kota lezi a nga wa xuvisa zona.

¹¹Zonake Solomoni i lo nyika Hiramu 20,000 wa tipimo ta mavele, a ku va kuga ka ngango wakwe, ni 20,000 wa tipimo ta mafura yo saseka. Solomoni i lo nyika lezo zilo ka Hiramu lembe ni lembe.

¹²Jehova i lo nyika Solomoni a wutlhari khwatsi hi lezi a wulileko ka yena. Ku wa hi kona kurula xikari ka Hiramu na Solomoni, vona vambiri va lo maha wuxaka.

¹³Solomoni i lo ramba a vanhu va xibhalu lomu xikari ka vontlhe va ka Israeli; va wa hi 30,000 wa vavanuna.

¹⁴Zonake le Lebanoni i lo rumela 10,000 wa vanhu hweti ni hweti, va nyiketana hi mitlawa; le Lebanoni va wa tira hweti yinwe, le makaya yabye va ya tshama tihweti timbiri. A nduna ya va xibhalu ku wa hi Adoniramu.

¹⁵Solomoni i wa hi ni 70,000 wa varwali, ni 80,000 wa vavatli va maribye le zitsungeni,

¹⁶ahandle ka tinduna ta Solomoni ta 3,300 leti ti yimisilweko a ku fumela vanhu lava va tirako mitiro.

¹⁷A hosi yi lo leletela a ku humesa a maribye ya hombe, ya tsengo wa hombe, kasi ku ta aka xiseketelo xa yindlu hi maribye ma vatlilweko.

¹⁸Zinghaho a vaaki va Solomoni ni vaaki va Hiramu, ni vaGebali va lo vatla maribye ni ku kulutela tisinya ta ku aka a yindlu.