Read tshwa 1 Tihosi 6 Bible Online

1 Tihosi 6 - tshwa bible

1 Tihosi 6

¹Makunu hi lembe ga 480 kusukela kuhumeni ka vanana va ka Israeli hi le tikweni ga Gipite, hi lembe ga wumune ga Solomoni ga ku fumela va ka Israeli, hi hweti ya Ziv, yi nga hweti ya wumbiri, Solomoni i lo sangula ku aka a yindlu ya Jehova.

²A yindlu leyi Solomoni a nga akela Jehova yi wa hi 60 wa mikono a kuleha ka yona, ni 20 wa mikono a kuanama, ni 30 wa mikono a kutlakuka ka yona.

³A kuleha ka ligumbagumba leli li nga mahlweni ka Tempeli ku wa hi 20 wa mikono, ku ringana ni ku anama ka yindlu, ni kuanama ka lona ku wa hi 10 wa mikono le mahlweni ka yindlu.

⁴A yindlu i lo yi mahela a tinjhanela ti sasekisilweko na ti tiyile.

⁵I lo aka a zitezi lomu matlhelweni wontihe ya yindlu, zi longolokako ni Tempeli ni wutshamu ga ku basa lomu nzeni; i lo maha tikwarutu hi lomu matlhelweni wontihe ya zona.

⁶A kuanama ka zitezi za lahasi ku wa hi ntlhanu wa mikono; a za laha xikari ku wa hi ntlhanu ni munwe mikono; a za wunharu ku wa hi ntlhanu ni mimbiri mikono; hakuva i wa akile hi maribye lawa ma humileko tichoka lahandle lomu matlhelweni wontihe ya yindlu, kasi a timhanze ti nga engheni lomu khurisini ga yindlu.

⁷A yindlu leyo yi wa akiwa hi maribye ma vatlilweko matlhelo wontihe, hi lezo ku wa nga zwali a guwa ga nyunzo, hambu xihloka, hambu ni xiketse lomo ndlwini xikhati va akako.

⁸A nyangwa ya kwarutu ya xitezi xa lahasi yi wa hi tlhelo ga xinene ga yindlu, va lo kanziha hi mayingo ma renzetekelako a kuya ka xitezi xa lomu xikari; zonake va suka laho va kanziha ka xitezi xa wunharu.

⁹Makunu laha a nga wa mbhetile ku aka yindlu, i lo yi vekela timhanze ni ku yi nameketela mapulango ya sedare.

¹⁰Zonake i lo aka a zitezi lomu matlhelweni wontihe ya yindlu; a kutlakuka ka yinwe ni yinwani ku wa hi ntlhanu wa mikono, zonake a tlhanganyisa zitezi laha ka yindlu hi timhanze ta sedare.

¹¹A gezu ga Jehova gi lota ka Solomoni gi taku:

¹²Xungetano ni yindlu leyi u akako, loku wena u famba hi milayo ya mina, ni loku wena u maha zileletelo za mina, u hlayisa milayo ya mina yontlhe, u famba ha yona, nzi ta tatisa a gezu ga mina legi nzi gi wulileko ka raru wa wena Davida.

¹³Nzi tshama xikari ka vanana va ka Israeli, cima nzi nga ta tsika a vanhu va mina va ka Israeli. [12]

¹⁴Zinghaho Solomoni i lo aka a yindlu a yi heta,

¹⁵i lo fenengeta a khurisi ga kona ga lomu nzeni hi mapulango ya sedare kusukela lahasi kala le langweni, zonake i lo fenengeta lahasi ka kona hi mapulango ya kipres.

¹⁶I lo aka lomu xikari ka yindlu hi mapulango ya sedare kusukela lahasi kala le langweni, 20 wa mikono; a longisa kota lezo kasi gi maha wutshamu ga kubasa ga lomu nzeni, giva wutshamu ga kubasabasa.

¹⁷A yindlu yi nga hi mahlweni ka wutshamu go basabasa yi wa hi 40 wa mikono, hi lezaku i Tempeli.

¹⁸A mapulango ya sedare lawa ma nga wa hi lomu nzeni ka yindlu, ma wa vatlilwe ma fanana ni zitsangi zo saseka zi pfepfako; a tisinya ta sedare ti wa enetile kontlhe; a maribye ma wa nga woneki.

¹⁹Lomu xikari ka yindlu, a wutshanwini go basabasa, i lo longisa a wutshamu go veka a arke ga xivumelwano xa Jehova.

²⁰A kuleha ka wutshamu lego ku wa hi 20 wa mikono, ni kuanama ka gona ku wa hi 20 wa mikono, ni kutlakuka ka gona ku wa hi 20 wa mikono; i lo gi nameketa hi nzalama yo saseka, a fenengeta a alati ga kona hi sedare.

²¹Lomu nzeni ka yindlu i lo nameketa hi nzalama yo saseka. Zonake i lo vala a wuengheno hi tiketani ta nzalama, hi te mahlweni ka wutshamu ga kubasa gi nameketelweko nzalama.

²²Yena i lo nameketa yontlhe yindlu hi nzalama, zinwe ni alati legi gi nga laha mahlweni ka wutshamu ga kubasa.

²³Lomu wutshanwini ga kubasa i lo maha makerubima mambiri hi sinya ya oliva, na ma hi ya 10 wa mikono a kutlakuka ka wona. [13]

²⁴A kuleha ka yinwe ni yinwani ya tipapa ta kerubima ginwe ku wa hi ntlhanu wa mikono, na ku hi 10 wa mikono kusukela magumo ya lipapa linwe kuya magumo ka linwani lipapa.

²⁵A kerubima ginwani kambe gi wa hi ni 10 wa mikono a kutlakuka ka gona. Hi wumbiri ga wona ma wa hi ya lipimo linwe na ma hi yo fanana.

²⁶A kutlakuka ka kerubima legi go ranga ku wa hi 10 wa mikono, ni ga wumbiri ku wa hi zalezo.

²⁷I lo veka makerubima hi lomu nzeni ka yindlu, a tipapa ta kona ti tshambulutwa kasi a lipapa la ginwe li chikela le khurisini hi tlhelo ginwe, ni lipapa la ginwani li khumba le khurisini hi tlhelo ginwani; kanilezi a tinwani tipapa ta wona ti tlhangana laha xikari ka yindlu.

²⁸Zonake i lo nameka makerubima hi nzalama.

²⁹A matlhelo wontihe ya khurisi ga yindlu ni lomu ka mapulango, i lo kehlela a zifananiso za makerubima ni micinzu ni zitsangi zi pfepfako, na zi kehlelwe lomu nzeni ni lahandle ka yindlu.

³⁰Zonake i lo nameketa hi nzalama lahasi ka yindlu, ndlwini ni lahandle.

³¹Zonake i lo maha a tinyangwa ta wutshamu go basabasa hi tisinya ta maoliva. A timhanze ta kona ni malingo ya kona zi wa ringana a xipanze xa wuntlhanu xa khurisi.

³²I lo maha a tivati leti timbiri hi sinya ya maoliva; a kehlela hehla ka tona a zifananiso za makerubima ni micinzu ni zitsangi zi pfepfako, zonake a zi nameketa hi nzalama; i lo nameketa a nzalama hehla ka makerubima ni hehla ka micinzu.

³³Zinghaho! lo mahela a nyangwa ya Tempeli a timhanze ta maoliva a ka xipanze xa wumune xa khurisi.

³⁴A tivati timbiri ti wa hi ta sinya ya kipres; a livati linwe ni linwani li wa hi ni zipanze zimbiri zi nga petseka tlhelo ni tlhelo.

³⁵I lo ti kehlela a zifananiso za makerubima ni micinzu ni zitsangi zi pfepfako, a zi nameketa hi nzalama leyi yi namarelako lomu ku kehlelweko.

³⁶Zonake i lo aka a xipetso xa lomu xikari hi tixaxa tinharu ta maribye ma vatlilweko, ni lixaxa linwani la timhanze ta sedare.

³⁷A xiseketelo xa yindlu ya Jehova xi sangulwe hi lembe ga wumune ga kufuma ka Solomoni, hi hweti ya Ziv.

³⁸Makunu hi lembe ga wu 11, hi hweti ya Bul, yi nga hweti ya wu 8, a yindlu yi lo mbhela ku akiwa; zinghaho va lo yi mbheta hi 7 wa malembe.