Read tshwa 1 Tihosi 8 Bible Online

1 Tihosi 8 - tshwa bible

1 Tihosi 8

¹Zonake Solomoni i lo tsombanyisa a masingalakati ya va ka Israeli, ni tihosana tontlhe ta tixaka ni tihloko ta tiyindlu ta vanana va ka Israeli, a kuva vata ka hosi Solomoni le Jerusalema a kuta heleketa a arke ga xivumelwano xa Jehova, gi huma le mutini wa Davida, lowu wu nga Zioni. [16]

²Ni vavanuna vontlhe va ka Israeli va lo tsombana le ka hosi Solomoni, le mubuzweni hi hweti ya Etanim, leyi yi nga hweti ya wu 7.

³Laha masingalakati wontihe ya ka Israeli ma nga wa chikele, a vapristi va lo rwala a arke.

⁴Va lo kanziha va neha a arke ga Jehova, ni tenda ga mutlhangano, ni zontlhe zibya zo basa lezi zi nga wa hi lomu ka tenda; a vapristi ni vaLevi va lo zi heleketa kona.

⁵Hosi Solomoni ni wontihe a tlhangano wa ka Israeli lava va nga wa tsombanyisilwe ka yena va lo yima mahlweni ka arke; va nyikela miphahlelo ya tiyivu ni tihomu leti ti nga kotiwiko ni ku hlayiwa hi wunyingi ga tona.

⁶Zonake a vapristi va lo enghenisa a arke ga xivumelwano xa Jehova lomu wutshanwini ga gona, lomu ka wutshamu go basabasa, hi lahasi ka tipapa ta makerubima. [17]

⁷Hakuva a makerubima ma wa tshambulutile a tipapa ta wona laha ka wutshamu ga arke, ma fenengeta a arke ni mipingu ya kona.

⁸Ni mipingu ya kona va wa lehisile laha kaku le magumo ka kona ku woneka le wutshanwini ga kubasa, kanilezi yi wa nga woneki lahandle; na yona ya hi kona inyamutlha,

⁹Ku wa nga hi na nchumu lomu ka arke, saseka timbila timbiri ta maribye leti Mosi a nga wa vekile lomo na va ha hi le Horebe, laha Jehova a nga maha xivumelwano zinwe ni vanana va ka Israeli xikhatini lexo va nga wa huma hi le tikweni ga Gipite. [18]

¹⁰Ni laha a vapristi va nga wa humile lomu wutshanwini ga kubasabasa, a refu gi lo tata a yindlu ya Jehova,

¹¹laha kaku a vapristi va tsanzeka ku yima va khozela hi kota ya refu; hakuva a kungangamela ka Jehova ku wa tatile a yindlu ya Jehova.

¹²Zonake Solomoni i lo kanela, aku ngalo: Jehova i wulile lezaku i ta tshama lomu munyameni wa hombe! [19]

¹³Hakunene mina nzi ku akele a yindlu, a wutshamu legi u ta nga tshama ka gona kala kupinzuka.

¹⁴Zonake a hosi yi lo hunzuluka yi katekisa wontihe a hlengeletano wa va ka Israeli; ni wontihe a hlengeletano wa ka Israeli wu wa yimile.

¹⁵Yena i te ngalo: A ku dumiswe Jehova Nungungulu wa ka Israeli, loyi a tatisileko hi canja gakwe, lezi a nga zi wulawula hi nomu wakwe ka dadani Davida, aku:

¹⁶Kusukela lezi nzi nga humesa a vanhu va mina va ka Israeli le Gipite, cima a nzi langangi a muti xikari ka tixaka tontlhe ta ka Israeli, a kuva va nzi akela a yindlu yi lumbako a vito ga mina, kanilezi nzi langile Davida lezaku kasi yena a fumela a vanhu va mina va ka Israeli.

¹⁷A dadani wa mina Davida i wa xuvile ku aka a yindlu yi lumbako a vito ga Jehova Nungungulu wa ka Israeli.

¹⁸Kanilezi Jehova i te ngalo ka dadani wa mina Davida: Kota lezi u xuvako ku akela vito ga mina a yindlu, u mahile khwatsi hi kuxuva loko.

¹⁹Hambu zi hi tano a hi wena u ta nga aka yindlu leyo; kanilezi ku tava nʼwana wa wena a humako xiwunwini xa wena, hi yena a ta nga nzi akela yindlu.

²⁰Kunene, Jehova i tatisile a gezu gakwe; mina nzi tshamile xitshanwini xa wuhosi xa ka Israeli xikhundleni xa dadani, khwatsi hi lezi Jehova a wulileko, ni kambe nzi akile a yindlu leyi yi lumbako a vito ga Jehova Nungungulu wa ka Israeli.

²¹Nzi longisile a wutshamu ga arke, laho ku nga kona a xivumelwano xa Jehova lexi a nga xi maha zinwe ni vadadani va hina xikhatini lexo a nga va humesa le tikweni ga Gipite.

²²Zonake Solomoni i lo yima mahlweni ka alati ga Jehova, ni mahlweni ka yontlhe hlengeletano ya ka Israeli, a nawuluta a mandla yakwe le hehla, aku:

²³Jehova Nungungulu wa ka Israeli! A nga kona munwani Nungungulu a fananako na wena, le hehla tilweni hambu lahasi misaveni; wena u loyi a hlayisako a xivumelwano ni tipswalo ka malanza ya wena lawa ma fambako mahlweni ka wena hi timbilu tontlhe ta wona.

²⁴Hakuva u hlayisile a gezu legi u nga gi wula ka nanza ga wena, dadani Davida, u wula hi nomu u tlhela u tatisa a gezu ga wena hi canja ga wena, kota lezi zi nga zona inyamutlha.

²⁵Makunu, Jehova Nungungulu wa ka Israeli, tatisa lezi u zi tsumbisileko ka nanza ga wena, dadani Davida, uku: Cima ku nga ta vumaleka munhu mahlweni ka mina, loyi a ta nga tshama xitshanwini xa va ka Israeli, loku futsi a vanana va wena va ti tsitsirita tindleleni tabye a kuva va famba mahlweni ka mina, khwatsi hi lezi wena u nga wa fambisa zona mahlweni ka mina.

²⁶Makunu, Nungungulu wa ka Israeli, tatisa magezu lawa u nga ma wula ka nanza ga wena, dadani Davida!

²⁷Xana hakunene Nungungulu a nga tshama misaveni ke? Languta, a tilo ga matilo a gi zi koti ku ku kangatela wena; nguvunguvu a yindlu leyi nzi ku akeleko yona! [20]

²⁸Hambu lezo, Jehova Nungungulu wa mina, zwana mikhongelo ya nanza ga wena ni kukombela ka yena! Ingisa kurila ni mukhongelo lowu a nanza ga wena a kombelako mahlweni ka wena nyamutlha.

²⁹A mahlo ya wena a ma cuwuke ka yindlu leyi wusiku ni hlikanhi, ni wutshamu legi u nga gi wula, uku; A vito ga mina gi tava kona, kasi ku ingisa a mukhongelo lowu a nanza ga wena gi wu khongelako wutshanwini legi. [21]

³⁰Ingisa kukhongela ka nanza ga wena, ni ka vanhu va wena va ka Israeli, loku va ta khongela ka legi wutshamu. Ingisa na u hi kwaleyo tilweni wutshanwini ga wena, ni laha u zwako, tsetselela!

³¹Loku munhu a onhela muakelwane wakwe, zonake va mu hlambanyisa mahlweni ka alati ga wena ndlwini leyi,

³²zi ingise wena na u hi kwaseyo tilweni; u tsema timhaka ta malanza ya wena; u kombisa wa kubiha hi ku tlhelisela hlokweni yakwe a kubiha kakwe; ni ku kombisa kululama ka loyi a mahileko kululama.

³³Loku a vanhu va wena va ka Israeli, va hluliwa hi valala vabye hi kota ya kukuonhela kabye, loku vona va tlhelela ka wena, va ta dumisa a vito ga wena, va maha mukhongelo mahlweni ka wena lomu ndlwini leyi,

³⁴zi ingise wena na u hi kwaseyo tilweni, u tsetselela a vanhu va wena va ka Israeli a kuonha kabye, u va tlhelisela ka tiko legi u nyikileko vadadani vabye!

³⁵Loku a tilo gi valeka, a vula yi nga hani hi kota ya kuonha kabye, loku vona va khongela ka legi wutshamu, va dumisa a vito ga wena, va tsika kuonha kabye hi kota ya lezi u va tsayisileko,

³⁶va ingise na u hi kwaseyo tilweni, u tsetselela zionho za malanza ya wena ni vanhu va wena, a va ka Israeli, u va gonzisa a ndlela yi nene leyi va faneleko ku famba ha yona, zonake u rumela vula misaveni leyi u nyikileko a vanhu va wena a kuva tshomba yabye.

³⁷Loku ku huma ndlala lomu tikweni, kutani mitungu, ni kubola ka mavele, a humbi ni ziwungwani, ni loku a valala va vimbezela lomu tikweni legi gi nga ni miti yabye, ni loku mababyi ya tixaka ti hambeneko ma enghena;

³⁸ni loku a munwe, kutani vontlhe vanhu va wena va ka Israeli va kombela a mukhongelo, zonake a munwe ni munwani a wulela kubayiseka ka mbilu yakwe, a nawuluta a mandla yakwe a ka yindlu leyi;

³⁹va ingise na u hi kwaseyo tilweni laho u tshamileko kona, u va tsetselela u tira; u nyika ka munwe ni munwani kotisa tindlela takwe, kota lezi wena u tivako a mbilu ya munhu, hakuva hi wena wece u tivako timbilu ta vontlhe vanana va vanhu, [22]

⁴⁰kasi va fela ku ku chava wontihe masiku lawa va ta nga hanya tikweni legi u nyikileko vararu va hina.

⁴¹Ni loku a muluveli loyi a nga hiko wa vanhu va wena, a va ka Israeli, kanilezi na hi wa kuta hi le kule hi kota ya vito ga wena,

⁴²hakuva va tazwa a timhaka ta vito ga wena ga hombe, ni canja ga wena ga ntamu, ni woko ga wena gi tlakukileko; loku yena a ta khongela ndlwini leyi;

⁴³mu ingise na u hi kwaseyo tilweni laho u tshamako kona, u mu mahela zontlhe lezo a muluveli loye a zi kombelako ka wena, kasi a matiko wontihe ya laha misaveni ma ta tiva a vito ga wena; ma ku chava kota a vanhu va wena va ka Israeli, va tiva lezaku a vito ga wena gi khongelwa ndlwini leyi nzi yi akileko. [23]

⁴⁴Ni loku a vanhu va wena va hloma yimpi ya ku yalwa ni nala wabye, na va kari va famba hi ndlela leyi u ta nga va kombisa yona, va khongela Jehova, va cuwuka tlhelweni ga muti lowu wena u wu tengileko, ni tlhelo ga yindlu leyi nzi yi akeleko a vito ga wena;

⁴⁵va ingise na u hi kwaseyo tilweni a mukhongelo ni kukombela kabye, u va yimela timhakeni tabye.

⁴⁶Loku va ku onhele, hakuva a ku na munhu loyi a nga onhiko, lezaku u va zangarela, u va nyikela ka valala vabye, zonake va khonwa va yiswa kule kutani kusuhani, tikweni ga valala; [24]

⁴⁷loku va ya ti sola na va hi kwaleyo tikweni lego va ta nga ya maha tikhumbi ka gona, va hunzuluka va khongela na va hi kwaleyo tikweni ga lavo va va khomileko, vaku: Hi onhile, hi mahile zo biha, hi gohile!

⁴⁸Loku va tlhelela ka wena hi timbilu tabye tontlhe ni mihefemulo yabye yontlhe na va hi kwaleyo tikweni ga valala vabye lava va va khomileko; va khongela na va cuwukile tlhelo ga tiko gabye legi u nyikileko vararu vabye, ni tlhelo ga muti lowu u wu tengileko, ni tlhelo ga yindlu leyi nzi yi akeleko vito ga wena; [25]

⁴⁹zwana kukombela kabye na u hi kwaseyo tilweni laho u tshamako kona, u va yimela timhakeni tabye;

⁵⁰u tsetselela a vanhu va wena a zionho lezi va ku onheleko ha zona, ni zihambuko zabye zontlhe lezi va zi mahileko, u va maha va hawukelwa hi vakhomi vabye, kasi va fela ku va tsetselela,

⁵¹hakuva mbanhu va wena ni tshomba ya wena leyi u yi humesileko te Gipite, xikari ka nzilo wa nyunzo. [26]

⁵²Ngha a mahlo ya wena ma cuwuka a kukhongela ka nanza ga wena, ni kukhongela ka vanhu va wena va ka Israeli, u va ingisa ni xihi xikhati va kombelako ka wena.

⁵³Hakuva wena u va hambanyisile ni matiko wontihe ya misava a kuva tshomba ya wena, kota lezi u wulileko hi nanza ga wena Mosi, a xikhatini lexo u nga humesa vakoko va hina te Gipite, Hosi Jehova!

⁵⁴Makunu laha Solomoni a nga wa mbhetile ku kombela ka Jehova wontihe mukhongelo lowu ni kukombela loku, i lo suka a yima mahlweni ka alati ga Jehova, laha a nga wa khizamile kona hi madzolo yakwe, na a tlakusile mandla yakwe te hehla,

⁵⁵zonake a katekisa a hlengeletano wontihe wa ka Israeli hi gezu ga hombe, aku:

⁵⁶A ku dumiswe Jehova loyi a nyikileko kuhumula ka vanhu vakwe va ka Israeli, kota lezi a wulileko! Cima a ku kona ni gezu ginwe gi wileko ka wontihe magezu lawa yo saseka a ma tsumbisileko ka nanza gakwe Mosi. [27]

⁵⁷Ngha Jehova Nungungulu wa hina ave zinwe na hina, khwatsi hi lezi a nga wa hi zinwe ni vakoko va hina. Ngha yena a nga hi tsiki a hi rivala;

⁵⁸ngha yena a kokela kakwe a timbilu ta hina, kasi hina hi fela ku famba hi tontlhe tindlela ta yena, hi hlayisa yontlhe milayo yakwe, ni zontlhe ziyimiso zakwe, ni zontlhe zileletelo zakwe, lezi yena a leleteleko vararu va hina!

⁵⁹Ngha timhaka leti nzi ti wulileko ka Jehova kukhongeleni ka mina, tiva mahlweni ka Jehova Nungungulu wa hina mumu ni wusiku, kasi yena a yimela a nanza gakwe ni vanhu vakwe va ka Israeli a timhakeni tabye a siku ginwe ni ginwani;

⁶⁰kasi wontihe matiko ya laha misaveni ma fela ku zi tiva lezaku Jehova hi Nungungulu, ni lezaku a nga kona munwani. [28]

⁶¹Ngha timbilu ta nwina tontlhe ti namarela ka Jehova Nungungulu wa hina, a kuva mu famba hi zileletelo zakwe ni ku hlayisa milayo yakwe kota legi siku.

⁶²Zonake a hosi ni vontlhe va ka Israeli, va lo nyikela miphahlelo mahlweni ka Jehova.

⁶³Solomoni i lo nyikela a miphahlelo ya kurula; a minyikelo leyi a nga phahlela ka Jehova ku wa hi 22,000 wa tihomu, ni 120,000 wa tiyivu; lezo hi lezi a hosi ni vanana va ka Israeli va nga nyikelisisa ha zona a yindlu ya Jehova.

⁶⁴A siku lego a hosi yi lo basisa a wutshamu ga xipetso xa laha xikari lexi xi nga mahlweni ka yindlu ya Jehova, hakuva i lo nyikela a miphahlelo ya kuhiswa, ni ya zakuga, ni mafura ya muphahlelo wa kurula, hakuva a alati ga suku legi gi nga hi mahlweni ka Jehova gi wa hi gitsongwani gi nga ringani a miphahlo ya kuhiswa ni munyikelo wa zakuga ni mafura ya miphahlo ya kurula.

⁶⁵Ka xwalexo xikhati Solomoni ni va ka Israeli vontlhe va lo maha mubuzo; a hlengeletano wa hombe lowu wu humako kusukela tlhelo ga le Hamate kala le xicongwaneni xa le Gipite, va lo tsombana mahlweni ka Jehova Nungungulu wa hina 7 wa masiku, ni manwani 7 wa masiku, ma maha 14 wa masiku.

⁶⁶Hi siku ga wu 8 i lo fambisa vanhu; na vona va lo katekisa hosi va tlhelela matendeni yabye hi kutsaka ni kubonga ka mbilu, hi kota ya zikateko zontlhe lezi Jehova a maheleko a nanza gakwe Davida ni vanhu vakwe va ka Israeli.