Read tshwa 1 Tihosi 9 Bible Online

1 Tihosi 9 - tshwa bible

1 Tihosi 9

¹Makunu laha Solomoni a nga wa mbhetile ku aka a yindlu ya Jehova ni yindlu ya hosi, ni zontlhe lezi Solomoni a nga wa xuvile ku zi maha,

²Jehova i lo woneka ka Solomoni hi xikati xa wumbiri, khwatsi hi lezi a nga woneka ka yena le Gibeoni.

³Jehova i te ngalo kakwe: Nzi zwile a mukhongelo wa wena ni kukombela loku u ku kombelileko mahlweni ka mina. Mina nzi basisile a yindlu leyi u yi akileko, a kuva yi lumba a vito ga mina kala kupinzuka; a mahlo ya mina ni mbilu ya mina zi tava kona kala kupinzuka. [29]

⁴Makunu loku wena u famba mahlweni ka mina, khwatsi hi raru wa wena Davida, u famba hi nongameto wa mbilu ni kululama, u maha zontlhe lezi nzi nga ku leletela, ni ku hlayisa milayo ni zileletelo za mina,

⁵zinghaho nzi ta tiyisa a xitshamu xa wuhosi xa wena hehla ka va ka Israeli kala kupinzuka, khwatsi hi lezi nzi tsumbisileko a raru wa wena Davida, nziku: Cima ku nga ta vumaleka a munhu wa pswalo wa wena laha ka xitshamu xa wuhosi xa ka Israeli.

⁶Kanilezi loku nwina ni vana va nwina mu nzi fularela, mu tsika ku hlayisa milayo ya mina ni zileletelo za mina lezi nzi zi vekileko mahlweni ka nwina, mu ya tirela vanwani vanungungulu, mu va khozela;

⁷mina nzi ta susa va ka Israeli tikweni legi nzi va nyikileko gona, nzi hoxa kule na mina a yindlu leyi nzi yi basiseleko a vito ga mina; na Israeli i tava tsheketo ni xihlekiso xikari ka matiko wontihe. [30]

⁸Ni yindlu leyi, hambu loku yi tlakukile kota lezi, ni wihi loyi a ta nga hunza hi laha kusuhani ka yona, i ta hlamala, aba noti, aku: Hi kuyini Jehova a maha za kunghahi ka tiko legi ni yindlu leyi ke?

⁹Va ta hlamula, vaku: Hi lezi va tsikileko Jehova Nungungulu wabye, loyi a humesileko vararu vabye le tikweni ga Gipite, va ya lanzela vanwani vanungungulu, va khizama mahlweni ka vona va va khozela; hikwalaho Jehova i rumele hehla kabye wontihe makhombo lawa,

¹⁰Makunu a kumbheleni ka 20 wa malembe, lawo Solomoni a nga aka ka wona a tiyindlu leto ta timbiri, a yindlu ya Jehova ni yindlu ya hosi;

¹¹hosi Solomoni i lo nyika Hiramu 20 wa miti le tikweni ga Galile. Hakuva Hiramu a hosi ya le Tire i wa nyikile ka Solomoni a tisinya ta sedari ni ta kipres, ni nzalama, kota lezi Solomoni a nga wa zi lava.

¹²Kanilezi laha a nga huma le Tire a ku ya wona a miti leyi a nyikilweko hi Solomoni, a yi mu xalalisangi.

¹³Yena i te ngalo: Miti muni leyi u nzi nykileko yona, makabye ke? I lo yi chula ku ngalo i tiko ga Kabule, i vito ga yona kala nyamutlha.

¹⁴Hiramu i lo rumela ka hosi 120 wa titalenta ta nzalama.

¹⁵Lexi hi xigelo xa xibhalu lexi hosi Solomoni a nga tirisa vanhu ku aka a yindlu ya Jehova ni yindlu yakwe, ni Millo, ni ligingisi la Jerusalema, ni Hazora, ni Megiddo, ni Gezera.

¹⁶Faro a hosi ya le Gipite i wa yile a ya khozisa le Gezera, a gi hisa hi nzilo, a hlasela maKanani lawo ma nga wa akile ka muti lowo, zonake i lo wu nyikela ka nʼwana wakwe, a sati wa Solomoni, a kuva xiavelo xakwe.

¹⁷Solomoni i lo aka Gezera ni Bete-Horoni wa le hasi,

¹⁸na Baalate na Tamara le xiwuleni xa tiko lego,

¹⁹ni yontlhe miti ya zigurumbu leyi Solomoni a nga wa hi nayo, ni miti ya tikareta, ni miti ya vakhileli va mahaxi, ni zontlhe lezo Solomoni a nga wa xuvile ku zi aka le Jerusalema, ni le Lebanoni ni tikweni gontlhe legi a nga wa gi fumela.

²⁰Vontlhe vanhu lava va nga wa sele a ka maAmori, ni maHiti, ni maPerezi, ni maHivi, ni maJebusi, lava va nga hiko vanana va ka Israeli;

²¹a vana vabye lava va nga wa sele lomu tikweni, hakuva a vanana va ka Israeli va wa tsanzekile ku va lovisa, Solomoni i lo leletela a kuva va tiriswa xibhalu kala nyamutlha lezi.

²²Solomoni a nga tirisangi xibhalu ka vanana va ka Israeli, hakuva vona va wa hi vahlomi va matlhari ni malanza yakwe ni tinduna takwe, ni tinhenha takwe, ni tinduna ta tikareta takwe, ni vakhileli vakwe va mahaxi. [31]

²³A tinduna ta hombe ta mitiro leti ti nga wa yimisilwe hi Solomoni, ti wa hi 550, leti ti nga wa fambisa lava va tirako mitiro.

²⁴Laha nʼwana Faro a nga sukile le mutini wa Davida, a ya enghena lomu ndlwini yakwe leyi Solomoni a nga wa mu akele, Solomoni i lo aka Millo.

²⁵Zikhati zinharu hi lembe Solomoni i lo nyikela miphahlo ya kuhiswa ni ya kurula laha ka alati legi a nga wa gi akele Jehova, ni ku hisa libani hehla ka gona legi gi nga wa hi mahlweni ka Jehova. Zinghaho a mbheta za yindlu.

²⁶Hosi Solomoni i lo aka mataru yo tala le Ezioni-Gebera, kusuhani ni le Elote, le fungwini wa Bimbi go Pswhuka, lomu tikweni ga Edomi.

²⁷Zonake Hiramu i lo rumela malanza yakwe lava va nga vamarinyero, va tivako za bimbi, a va rumela matarwini zinwe ni malanza ya Solomoni.

²⁸Va loya le Ofira a ku ya teka 420 wa titalenta ta nzalama va ti heleketa ka hosi Solomoni.