Read tshwa 2 Tihosi 13 Bible Online

2 Tihosi 13 - tshwa bible

2 Tihosi 13

¹Hi lembe ga wu 23 ga kufuma ka Joaxi nʼwana Ahazia a hosi ya ka Juda, Jehoahaza nʼwana Jehu i lo sangula ku fumela va ka Israeli le Samaria; i lo fuma 17 wa malembe.

²Yena i lo maha lezi zi bihileko mahlweni ka Jehova, a lanzela a zionho za Jeroboamu nʼwana Nebate, lezi a nga onhisa ha zona va ka Israeli, a nga zi tsiki.

³A zanga ya Jehova yi lo vindlukela va ka Israeli, a va nyikela ka Hazaeli a hosi ya le Siria ni le mandleni ya Ben-Hadade a nʼwana Hazaeli a masiku wontihe. [30]

⁴Jehoahaza i lo khongela ka Jehova, Jehova a mu ingisa, hakuva i le wona kutsimbeketwa ka va ka Israeli loku a hosi ya le Siria yi nga wa va tsimbeketisa zona.

⁵Jehova i va nyika muhlanguti va ka Israeli, va tlhatlhiswa mandleni ya maSiria, va ya tshama lomu mitini yabye kota kale.

⁶Hambu lezo, cima a va tsikangi a zionho za yindlu ya Jeroboamu lezi a nga onhisa va ka Israeli ha zona. Va lo ti nyiketela ka zona, ni xifananiso xa Axtarte xi lo sala na xi yimile le Samaria.

⁷Jehoahaza i lo sala ni yimpi ya 50 wa vakhileli va mahaxi, ni 10 wa tikareta, ni butho ga 10,000 wa vavanuna basi, hakuva a hosi ya le Siria yi wa lovisile va ka Israeli, yi va maha ku khwatsi i tsutsungwani lowu wu kanzihelelako.

⁸A yinwani mitiro ya Jehoahaza ni zontlhe lezi a zi mahileko, ni wunhenha gakwe, zi tsalilwe lomu bhukwini ga Matimu ya tihosi ta ka Israeli.

⁹Jehoahaza i lo etlela zinwe ni vararu vakwe, va mu lahla le Samaria. A nʼwana wakwe Joaxi i lo fuma xikhundleni xakwe.

¹⁰Hi lembe ga wu 37 ga kufuma ka Joaxi a hosi ya ka Juda, Jehoaxi nʼwana Jehoahaza i lo sangula ku fumela va ka Israeli le Samaria, a fuma 16 wa malembe.

¹¹I lo maha lezi zi bihileko mahlweni ka Jehova, a nga tsiki a zionho zontlhe za Jeroboamu nʼwana Nebate lezi a nga onhisa ha zona va ka Israeli; i lo ti nyiketela ka zona.

¹²A yinwani mitiro ya Joaxi ni zontlhe lezi a zi mahileko, ni wunhenha gakwe legi a ngalwa ha gona na Amazia a hosi ya ka Juda zi tsalilwe lomu bhukwini ga Matimu ya tihosi ta ka Israeli.

¹³Joaxi i lo etlela zinwe ni vararu vakwe; zonake Jeroboamu i lo fuma xikhundleni xakwe. Joaxi i lo lahliwa le Samaria zinwe ni tihosi ta ka Israeli.

¹⁴Elixa i lo babya a wubabyi legi a ngafa ha gona; Joaxi a hosi ya ka Israeli i lo relela aya kakwe, a rila nghoheni yakwe, aku: Dada, dada! wena u nga tikareta ta ka Israeli ni vakhileli va tona!

¹⁵Elixa i te ngalo kakwe: Teka a wura ni tigalala ta gona. I lo teka a wura ni tigalala ta gona.

¹⁶Elixa i te ngalo ka hosi ya Israeli: Khoma wura hi canja ga wena. Na khomile a wura, Elixa i lo tlhateka a canja gakwe hehla ka canja ga hosi.

¹⁷Aku ka hosi: Vulula a njhanela hi tlhelo ga le Mutsuwuka-gambo! Laha a nga wa vulule, Elixa i te ngalo: Phanda! Yena i lo phanda. Elixa aku: Leli ligalala la kuhlula ka Jehova! Ligalala la ku hlula a maSiria; u ta hlasela maSiria le Afeka kala u va lovisa.

¹⁸Yena i lo engeta aku: Teka tigalala! I lo teka tigalala. Zonake Elixa aku ka hosi ya ka Israeli: Bana lahasi! Yena i loba lahasi makhati manharu. Zonake i lo yima.

¹⁹A munhu wa Nungungulu i lo mu zangarela, aku: Loku u wa bile ka ntlhanu ni ginwe, u wa ta hlula maSiria ntlhanu ni ginwe makhati kala u va lovisa. Makunu lezi u ta hlula maSiria zikhati zinharu basi.

²⁰Elixa i lofa, va mu lahla. Makunu hi kusanguleni ka lembe gi lanzelako, a mabutho ya vaMoabi ma lo enghena lomu tikweni ma hlasela.

²¹Laha va nga wa lahla munhu, va lo wona a butho ginwe na gita. Va lo hoxa a xirumbi lomu nkeleni wa Elixa. Laha a nga khumba a marambu ya Elixa, i lo vuka a hanya a yima hi milenge yakwe.

²²Hazaeli a hosi ya le Siria i lo tsimbeketa Israeli wontihe masiku ya kufuma ka Jehoahaza.

²³Kanilezi Jehova i lo va zwela wusiwana, a va mahela wuxinji, a va languta hi kota ya xivumelwano xakwe zinwe na Abrahama, na Isaka, na Jakobe; a nga lavangi ku va lovisa, kala lezi a nga va hoxangi kule ni nghohe yakwe. [31]

²⁴Hazaeli a hosi ya le Siria i lofa, zonake Ben-Hadade a nʼwana wakwe i lo fuma xikhundleni xakwe.

²⁵Joaxi nʼwana Jehoahaza i lo tlhela a teka kambe lomu mandleni ya Ben-Hadade nʼwana Hazaeli a miti leyi a nga wa yi tekile mandleni ya Jehoahaza a raru wakwe hi kulwa. Joaxi i lo mu hlula makhati manharu a tlhela a wutla a miti ya ka Israeli.