Read tshwa 2 Tihosi 16 Bible Online

2 Tihosi 16 - tshwa bible

2 Tihosi 16

¹Hi lembe ga wu 17 ga kufuma ka Peka nʼwana Remalia, Ahaza nʼwana Jothamu a hosi ya ka Juda i lo sangula ku fuma.

²Ahaza i wa hi ni 20 wa malembe laha a nga sangula ku fuma; i lo fuma 16 wa malembe le Jerusalema. A nga mahangi lezi zi sasekileko mahlweni ka Jehova Nungungulu wakwe, khwatsi hi raru wakwe Davida.

³I lo lanzela tindlela ta tihosi ta ka Israeli; i lo hisa a nʼwana wakwe laha nzilweni, a lanzela mahanyela ya vamatiko, lava Jehova a nga va hlongola mahlweni ka vanana va ka Israeli. [38]

⁴I lo nyikela miphahlelo, a hisa tibani lomu matshanwini ma tlakukileko ni lomu migangeni, ni lahasi ka tisinya tontlhe leti ti hlukileko.

⁵Zonake Rezini a hosi ya le Siria, zinwe na Peka nʼwana Remalia a hosi ya ka Israeli, va lo kanziha va ya hlasela Jerusalema; va lo vimbezela Ahaza, kanilezi a va mu hlulangi.

⁶Xikhatini xwalexo Rezini a hosi ya le Siria i lo tlhelisa Elate mandleni ya Siria; i lo hlongola vaJuda va huma lomu Elate, zonake a maSiria ma enghena ma aka lomo kala nyamutlha.

⁷Zonake Ahaza i lo rumela mitsumi ka Tiglate-Pilesera a hosi ya le Asiria, aku kakwe: Mina nzi nanza ga wena tlhelo nʼwana wa wena. Kanziha u ta nzi hlanguta mandleni ya hosi ya le Siria ni mandleni ya hosi ya ka Israeli, a tihosi ti tileko ku ta nzi vukela.

⁸Ahaza i lo teka a nzalama ni siliva, lezi zi nga wa hi lomu ndlwini ya Jehova, ni mali ya lomu ndlwini ya hosi, a zi rumela ka hosi ya le Asiria a ku va xinyikiwo. [39]

⁹A hosi ya le Asiria yi lo mu ingisa yi kanziha yi yalwa ni Damasku yi gi teka, yi khoma a vanhu va kona yi va maha tikhumbi yi va yisa Kira, zonake yi daya Rezini.

¹⁰Hosi Ahaza i loya le Damasku a ku ya tlhangaveta Tiglate-Pilesera a hosi ya le Asiria; zonake i lo ya wona a alati ga le Damasku. Zonake hosi Ahaza i lo rumela ka mupristi Urija a bombo ga kona ga xifananiso zinwe ni xiwumbeko xa alati ga kona.

¹¹Zonake mupristi Urija i lo aka a alati, a maha zontlhe khwatsi hi lezi hosi Ahaza a leleteleko na a hi le Damasku; i lo maha zalezo mupristi Urija hosi Ahaza na a nga se wuya hi le Damasku.

¹²Laha hosi yi nga wuya hi le Damasku yi lo ta wona a alati, yi tshinela laha kusuhani ka gona,

¹³yi nyikela laho a muphahlelo wa yona wa kuhiswa, ni munyikelo wa zakunwa, a nwatsekela hehla ka gona a nkhata wa munyikelo wa kurula.

¹⁴Kanilezi a alati legi gi nga wa hi mahlweni ka Jehova, i lo gi susa laha wutshanwini ga gona mahlweni ka tempeli, laha xikari ka yindlu ya Jehova ni alati legi giswa, a gi veka laha kusuhani ni alati gakwe hi tlhelo ga Nwalungu.

¹⁵Hosi Ahaza i lo leletela mupristi, aku: U ta hisela laha ka alati legi ga hombe a munyikelo wa kuhiswa wa laha mixweni ni muphahlelo wa laha gambyeni, ni munyikelo wa kuhiswa wa hosi, ni munyikelo wa kuhiswa wa vanhu vontlhe va tiko, ni zakunwa zabye. U ta nwatsekela kwalaho a nkhata wontihe wa munyikelo wa kuhiswa; kasike a alati legi ga suku nza ha ta alakanyela ha gona.

¹⁶Zinghaho mupristi Urija i lo maha zontlhe lezi a leletelweko hi Ahaza.

¹⁷Hosi Ahaza i lo khungumulela a matlhelo ya zikhatelo, a susa xinamelo xa le hehla ka zona, a chikisa ni bimhi gi nga hi hehla ka tihomu ta suku, leti ti nga wa hi lahasi ka kona, a gi beka laha xikhatweni xa maribye. [40]

¹⁸Lomu ndlwini ya Jehova i lo hunzulusa a nyangwa ya sabado yi nga wa akilwe kona, ni nyangwa ya le handle ya hosi, hi kota ya hosi ya Asiria.

¹⁹A yinwani mitiro ya Ahaza leyi a yi mahileko yi tsalilwe lomu bhukwini ga Matimu ya tihosi ta ka Juda.

²⁰Ahaza i lo etlela zinwe ni vararu vakwe, a lahliwa navo le mutini wa Davida; zonake a nʼwana wakwe Hezekia i lo fuma xikhundleni xakwe.