Read tshwa 2 Tihosi 18 Bible Online

2 Tihosi 18 - tshwa bible

2 Tihosi 18

¹Hi lembe ga wunharu ga kufuma ka Hoxea nʼwana Ela hosi ya ka Israeli, Hezekia nʼwana Ahaza a hosi ya ka Juda i lo sangula ku fuma.

²I wa hi ni 25 wa malembe laha a nga sangula ku fuma; i lo fuma 29 wa malembe le Jerusalema. A vito ga nyine wakwe i wa hi Abi wa Zakaria.

³1 lo maha kululama mahlweni ka Jehova, khwatsi hi zontlhe lezi a zi mahileko a raru wakwe Davida.

⁴I lo susa a matshamu ma tlakukileko, a fayetela a zifananiso, a khungumulela a zifananiso za Axtarte, a fayetela ni nyoka ya suku leyi yi nga wa mahilwe hi Mosi; hakuva kala masikwini lawo a vanana va ka Israeli va wa hisa tibani mahlweni ka yona; yena i lo yi chula vito ga Nehuxtani. [50]

⁵I lo tsumba Jehova Nungungulu wa ka Israeli, laha kaku xikari ka tontlhe tihosi ta ka Juda leti ti nga lanzela anzhako kakwe ni leti ti nga ranga ti fuma, cima a ku na ngava kona wo kota yena.

⁶Hakuva yena i lo namarela ka Jehova; a nga mu tsikangi: i lo hlayisa milayo leyi Jehova a nga leletela Mosi.

⁷Jehova i wa hi zinwe naye. I lo humelela mitirweni yakwe yontlhe. I lo hluwuka a hosi ya Asiria, a nga ha yi tireli. [51]

⁸I lo hlasela maFilistia kala le Gaza ni tiko ga kona, kusukela ka tiyindlu ta varinzeli kala mitini ya makhokhola.

⁹Makunu hi lembe ga wumune ga kufuma ka Hezekia, gi nga lembe ga wu 7 ga kufuma ka Hoxea nʼwana Ela a hosi ya ka Israeli, Xalmanesera a hosi ya le Asiria i lo kanziha ata le Samaria a ta vimbezela muti.

¹⁰Anzhako ka malembe manharu va lo wu teka. Hi lembe ga wu 6 ga kufuma ka Hezekia, gi nga lembe ga wu 9 ga kufuma ka Hoxea a hosi ya ka Israeli, a Samaria gi lo tekiwa.

¹¹A hosi ya le Asiria yi lo khoma va ka Israeli, yi va yisa tikweni ga le Asiria, yi ya va akisa le Hala, ni le Habora le Congweni wa Gozani, ni le mitini ya vaMedi,

¹²hakuva vona a va ingisangi a gezu ga Jehova Nungungulu wabye, kanilezi va hambunyetile a xivumelwano xakwe, ni zontlhe zileletelo za Mosi a nanza ga Jehova, a va zi ingisangi ge hambu ku zi maha.

¹³Hi lembe ga wu 14 ga kufuma ka Hezekia ku lota Senakeribe a hosi ya le Asiria; i lo kanziha ku ta hlasela a miti yontlhe ya makhokhola ya ka Juda, a yi teka. [52]

¹⁴Hezekia a hosi ya ka Juda i lo rumela mhaka ka hosi ya le Asiria le Lakixe, aku: Mina nzi onhile! Nzi tsike! Kani hi xihi u ta nga xi veka ka mina, nzi ta xi rwala. A hosi ya le Asiria yi lo rwexa Hezekia a hosi ya ka Juda a nanzu wa 300 wa titalenta ta siliva ni 30 wa titalenta ta nzalama.

¹⁵Hezekia i lo humesa yontlhe a mali leyi yi nga wa hi lomu ndlwini ya Jehova, ni lomu ka bako ga yindlu ya hosi.

¹⁶Xikhatini xwalexo Hezekia i lo susa a nzalama ya tivati ta tempeli ya Jehova, ni timhanzeni leti Hezekia a hosi ya ka Juda a nga wa ti nameketele nzalama, a nyika a hosi ya le Asiria.

¹⁷A hosi ya le Asiria yi lo ruma Tartani, na Rabsarisi, na Rabxeka, va suka hi le Lakixe vata ka hosi Hezekia le Jerusalema, na va hi ni yimpi ya hombe: va lo kanziha va ta chikela le Jerusalema. Laha va nga wa chikele va lo yima hi laha kusuhani ka tiva gi kelilweko ga le hehla, gi nga le ndleleni ya simu ga vahlazi. [53]

¹⁸Laha va nga vitana a hosi, Eliakimu nʼwana Hilkia, a nduna ya yindlu ya hosi, i lo huma ata kabye na a hi na Xebna, a matsalani na Joa nʼwana Asafa, a muhlayisi wa mabhuku.

¹⁹Rabxeka i te ngalo kabye: Byelani Hezekia, muku: A hosi ya hombe ya le Asiria yi ngalo: Wo tsumba yini wena ke?

²⁰A timhaka ta wena a ti vuni nchumu. A zikungo ni mintamu zi fanele kuva kona loku ku hlomiwa a yimpi. Makunu u tsumba mani lezi u kalako u nzi vukela?

²¹Hi nga wona! U tsumba Gipite, a lihlanga li tshobyilweko, li tlhavako a canja ga loyi a khegelako ka lona. Faro a hosi ya le Gipite i maha lezo ka vontlhe lava va mu tsumbako. [54]

²²Loku nwina muku ka mina: Hi tsumba Jehova Nungungulu wa hina! a hi yena loyi Hezekia a khungumuleleko a matshamu yakwe ma tlhakukileko ni maalati, lawa a ngaku ka Juda ni ka Jerusalema: Mu ta khozele mahlweni ka alati legi gi nga le Jerusalema ke?

²³Makunu mina nzi ngalo ti bohe ka nwinyi wa mina, a hosi ya le Asiria; nzi ta ku nyika a 2,000 wa mahaxi, loku wena u kuma a vavanuna lava va ta ngava vakhileli va wona.

²⁴Xana u ta hlongolisa kuyini a nduna yinwe basi xikari ka malanza lawa matsongwani ya hosi ya mina ke? Wena u tsumba Gipite hi kota ya tikareta ni mahaxi ya kona.

²⁵Kasi mina a nzi kanzihangi nzita ka wutshamu legi a ku ta gi lovisa hi kuranza ka Jehova ke? Jehova i wulile ka mina, aku: Kanziha ka legi tiko u ya gi lovisa!

²⁶Zonake Eliakimu nʼwana Hilkia, na Xebna, na Joa, va te ngalo ka Rabxeka: Wulawula ni malanza ya wena hi lirimi la xiSiria, hakuva ha li tiva; u nga wulawuli na hina hi xijuda kuzweni ka vanhu lava va nga lomu ligingisini.

²⁷Kanilezi Rabxeka i te ngalo kabye: Xana a hosi ya mina yi nzi rumele ka hosi ya wena ni ka wena a ku ta wulawula timhaka leti ke? A hi kona ka vanhu lava va tshamako lomu ligingisini, lava va ta ngaga a chaka ga vona venyi, ni kunwa mirunzo ya vona venyi zinwe na nwina ke?

²⁸Zonake Rabxeka i lo yima a kanyuluka hi gezu ga hombe hi lirimi la xijuda, aku: Zwanani a gezu ga hosi ya hombe ya le Asiria!

²⁹A hosi yi ngalo: Mu nga khohliswi hi Hezekia, hakuva cima a nga ta zi kota ku mu tlhatlhisa mandleni ya mina.

³⁰Hezekia ngha a nga mu kalaveli hi ku tsumba Jehova, a mu byela ku ngalo: Hakunene Jehova i ta hi tlhatlhisa, a muti lowu cima wu nga ta nyikelwa mandleni ya hosi ya Asiria!

³¹Mu nga ingiseli Hezekia, hakuva a hosi ya Asiria yi ngalo: Mahani kurula xikari ka mina na nwina, mu ti nyiketa ka mina; zonake munwe ni munwani i taga mihanzu ya xivina xakwe ni mihanzu ya nkuwu wakwe, anwa a mati ya hlowo yakwe,

³²kala mina nzi ta mu susa nzi mu yisa ka tiko legi gi fananako ni tiko ga nwina, a tiko ga mavele ni vinya, a tikweni ga zibaba ni zivina, ga tisinya ta mafura ni wulombe, kasi ma fela ku hanya, mu ngafi. Mu nga ingisi Hezekia, hakuva yena o mu khohlisa, aku: Jehova i ta hi tlhatlhisa.

³³Xana a vanungungulu va manwani matiko va zi kotile ku tlhatlhisa a matiko ya vanhu va kona mandleni ya hosi ya le Asiria ke?

³⁴Va kwihi vanungungulu va le Hamate ni va le Arpade? Va kwihi vanungungulu va le Sefarvaime, ni va le Hena, ni va le Iwa ke? Xana va tlhatlhisile a Samaria mandleni ya mina ke?

³⁵Hi vahi vanungungulu xikari ka vanungungulu vontlhe va matiko, lava va tlhatlhisileko a matiko ya vona mandleni ya mina, ko kala Jehova a tlhatlhisa Jerusalema mandleni ya mina ke?

³⁶Kanilezi a vanhu va lo miyela va nga hlamuli nchumu, hakuva a hosi yi wa leletele lezaku: Mu nga mu hlamuli nchumu!

³⁷Zonake Eliakimu nʼwana Hilkia, a nduna ya yindlu ya hosi, na Xebna a matsalani, na Joa nʼwana Asafa, a muhlayisi wa mabhuku, va lota ka Hezekia na va hanzulele tinguwo tabye, va ta mu byela timhaka ta Rabxeka. [55]