Read tshwa 2 Tihosi 19 Bible Online

2 Tihosi 19 - tshwa bible

2 Tihosi 19

¹Laha hosi Hezekia a nga wa zi zwile, i lo hanzula a tinguwo takwe, a fenengela a tinguwo ta tisakwa, a enghena lomu ndlwini ya Jehova. [56]

²I lo ruma Eliakimu, a nduna ya yindlu ya hosi, na Xebna a matsalani ni masingalakati ya vapristi, vaya ka muprofeti Isaya nʼwana Amozi, na va fenengele tinguwo ta tisakwa.

³Va yaku kakwe: Hezekia i ngalo: Legi siku i siku ga hlomulo, ni ga kukawukwa, ni ga tingana, hakuva a vanana va lava ku huma lomu nzeni, kanilezi a ntamu wa ku pswala wu hava. [57]

⁴Kutani Jehova Nungungulu wa wena i zwile tontlhe timhaka ta Rabxeka, leti a rumilweko hi nwinyi wakwe a hosi ya le Asiria, a ku ta rukatela Nungungulu loyi a hanyako; kutani Jehova Nungungulu wa wena i ta kawuka a timhaka leti a ti zwileko, na wena u ta maha mukombelo hi kota ya vanhu lava va seleko.

⁵A malanza ya hosi Hezekia ma loya ka Isaya.

⁶Zonake Isaya i te ngalo kabye: Mu ta ya byela a hosi ya nwina muku: Jehova i ngalo, u nga chavi hi kota ya timhaka leti mu ti zwileko, leti a malanza ya hosi ya le Asiria ma nzi rukateleko ha tona.

⁷Mina nzi ta enghenisa ka yena munwani moya, lezaku laha a ta ngazwa mahungu yo kari i ta tlhelela tikweni gakwe; nzi ta mu wisa hi tlhari lomu tikweni gakwe.

⁸Zinghaho laha Rabxeka a nga tlhela, i lo ya kuma a hosi ya le Asiria na yi kari yilwa na Libna, hakuva i wa zwile lezaku i sukile Lakixe.

⁹Laha Senakeribe a ngazwa na ku wuliwa ha Tirhaka a hosi ya le Etiopia, vaku: Hi loyi, wata ku talwa na wena! I lo rumela mitsumi ka Hezekia kambe, aku:

¹⁰Mu ta ya byela Hezekia a hosi ya ka Juda, muku: U nga khohliswi hi Nungungulu wa wena loyi u mu tsumbako, uku: A Jerusalema cima gi nga ta nyikelwa mandleni ya hosi ya le Asiria.

¹¹Wena u zwile zontlhe lezi zi mahilweko ka matiko wontihe hi tihosi ta Asiria, lezi ti nga ma lovisisa zona; wena u ta pona ke?

¹²Xana a matiko lawa ma lovisilweko hi vararu va mina ma ponisilwe hi vanungungulu va wona ke? Gozani, na Harani, na Rezefa, ni vanana va ka Edeni lava va nga le Telasara, va ponile ke?

¹³Yi kwihi a hosi ya le Hamate, ni ya le Arpada, ni ya muti wa le Sefarvaime, ni ya le Hena, ni ya le Iwa?

¹⁴Hezekia i lo amukela a papilo mandleni ya mitsumi a gi gonza; zonake i lo kanziha aya lomu ndlwini ya Jehova, a ya gi andlala mahlweni ka Jehova.

¹⁵Hezekia i lo khongela ka Jehova, aku: Jehova Nungungulu wa ka Israeli, loyi a tshamileko hehla ka makerubima! Hi wena wece a Nungungulu wa matiko wontihe ya misava; hi wena u nga maha a tilo ni misava. [58]

¹⁶Jehova, phuhunha a ndleve ya wena, uzwa! Jehova, vulula a mahlo ya wena u cuwuka; uzwa a timhaka ta Senakeribe, leti a ti rumeleko ku ta rukatela a Nungungulu loyi a hanyako.

¹⁷Jehova, hakunene a tihosi ta Asiria ti lovisile a matiko ni misava ya wona;

¹⁸ti hisile vanungungulu va wona hi nzilo, hakuva va wa nga hi vanungungulu, kanilezi va wa hi va mitiro ya mandla ya vanhu, va tisinya ni va maribye; hikwalaho va va lovisile.

¹⁹Hikwalaho Jehova Nungungulu wa hina, hi ponise mandleni ya Senakeribe, kasi a mifumo yontlhe ya misava yi fela ku zi tiva lezaku wena hi wena wece Jehova Nungungulu.

²⁰Zonake Isaya nʼwana Amozi i lo rumela a mhaka ka Hezekia, aku: Jehova Nungungulu wa ka Israeli i ngalo: Nzi zwile mukhongelo wa wena xungetano na Senakeribe a hosi ya Asiria.

²¹A gezu legi Jehova a gi wulako xungetano naye, hi legi: A mubulwa, wu nga nhwana wa Zioni, wu ku rukatele, wu ku tseketsela: ni nhwana loyi a nga Jerusalema wa ku zivisela hloko.

²²Himani u mu rukateleko? Himani u mu tseketseleko? U tlakusele mani a gezu ga wena ni mahlo ya wena le hehla ke? A kulwa ni wa ku Basa wa ka Israeli.

²³U tlangamele Hosi hi mitsumi ya wena, uku: Nzi kanzihile hehla ka zitsunga ni wunyingi ga tikareta ta mina, nzi enghena xikari ka Lebanoni; nzi lo tsema tisinya ta kona to leha ta tisedare, ni leti to saseka ta nkuwu. Zonake nzi lo enghena lomu wutshanwini gakwe ga magumo, ni lomu mihanzweni yakwe yo saseka nguvu!

²⁴Mina nzi kelile, nzinwa a mati ya matiko; nzi lo womisa yontlhe micongo ya le Gipite hi mikonzo ya mina.

²⁵Xana a ku zi zwangi lezi nzi zi mahisileko zona kale loko ke? Nzi zi wulile masikwini ya kale nguvu, makunu nzi ta zi maha zi tatiseka, nzi ku nyikile ntamu ku khungumulela a miti ya makhokhola yi maha marumbi.

²⁶Hikwalaho a vaaki va yona va lo vumala ntamu, va xeveka, va ku khwatsi i byanyi ga khwati, ni lihunga, va ku khwatsi i byanyi ga le xixungweni xa yindlu, ni mavele ma swileko na ma nga se rumbuka.

²⁷Kanilezi mina nza tiva kutshama ka wena, ni kuhuma ka wena, ni kuenghena ka wena, ni khulo ga wena ha mina.

²⁸Hi kota ya khulo ga wena ka mina, ni ku ti kukumukisa ka wena ku chikeleko tindleveni ta mina, nzi ta ku bhoxa mukhalo nhovini ya wena, nzi ku ambexa matomu nonwini wa wena, nzi ku tlhelisa hi yona ndlela leyi u tileko ha yona. [59]

²⁹A xikombiso xa kona ka wena hi lexi: A lembe legi mu taga mituke; a ga wumbiri mu taga zo ti milela ha zoce; a ga wunharu mu ta byala, mu tshovela, mu rima zivina za nwina, muga mihanzu ya zona.

³⁰Kasike a misalela ya yindlu ya ka Juda leyi yi ta nga pona, yi ta tlhava mitsu lahasi, yi chela mihanzu le hehla.

³¹Hakuva le Jerusalema yi ta huma misalela, le xitsungeni xa Zioni ku huma lava va ta nga pona. Lezo zi ta maheka hi kupangama ka Jehova.

³²Hikwalaho Jehova i wula lezi xungetano hi hosi ya Asiria: A nga ta enghena mutini lowu, hambu ku phanda ligalala lakwe ka wona, ge hambu kuta ka wona ni xitlhangu ni ku wu ketela marinzi.

³³I ta tlhela hi ndlela leyi a ngata ha yona; cima a nga ta enghena ka lowu muti, ku wula Jehova.

³⁴Nzi ta wu vikela, nzi wu hlayisela vito ga mina, hi kota ya nanza ga mina Davida.

³⁵Zonake ka gwalego wusiku a ngelosi ya Jehova yi lo huma yi ya hlasela 185,000 wa vavanuna lomu wugovelweni ga maAsiria. A xikhati lexi a vanhu va nga vuka ni mixo, va lo kuma lezaku vontlhe va wa file.

³⁶Zinghaho Senakeribe a hosi ya Asiria i lo susa a wugovelo gakwe a tlhela aya le Niniva.

³⁷Ku te na khizamile a khozela lomu ndlwini ya nungungulu wakwe Nisroko, a vana vakwe Adrameleki na Xarezera va lo mu daya hi tlhari, va chavela tikweni ga Ararate. A nʼwana wakwe Esarhaddoni i lo fuma xikhundleni xakwe.