Read tshwa 2 Tihosi 2 Bible Online

2 Tihosi 2 - tshwa bible

2 Tihosi 2

¹Makunu laha Jehova a nga wa laya ku ta teka Elija a mu yisa tilweni hi xipupuri, Elija i wa sukile le Gilgali zinwe na Elixa.

²Elija i te ngalo ka Elixa: Tshama laha, hakuva Jehova i nzi rumile a kuya le Beteli. Elixa i te ngalo kakwe: Nzi hlambanya ha Jehova a hanyako ni muhefemulo wa wena wu hanyako, mina cima nzi nga ta ku tsika. Va lo relela zinwe vaya Beteli.

³A vapizani va vaprofeti lava va nga wa hi le Beteli va lo huma vata ka Elixa va taku kakwe: Wa zi tiva lezaku inyamutlha Jehova i ta ku tekela a hosi ya wena yiya hehla ke? Yena aku: Nza zi tiva, miyelani!

⁴Elija i te ngalo kakwe: Elixa, tshama laha, hakuva Jehova i nzi rumile a kuya le Jeriko. Yena i lo hlamula, aku: Nzi hlambanya ha Jehova a hanyako ni muhefemulo wa wena wu hanyako, cima nzi nga ta ku tsika. Va lo ya chikela le Jeriko.

⁵A vapizani va vaprofeti lava va nga wa hi le Jeriko va lo tshinela ka Elixa, ya taku kakwe: Wa zi tiva lezaku inyamutlha Jehova i ta ku tekela a hosi ya wena yiya le hehla ke? Yena aku: Nza zi tiva, miyelani!

⁶Elija i te ngalo kakwe: Tshama laha, hakuva Jehova i nzi rumile kuya le Jordani. Yena i lo hlamula, aku: Nzi hlambanya ha Jehova a hanyako ni muhefemulo wa wena wu hanyako, cima nzi nga ta ku tsika. Va lo famba zinwe.

⁷Zonake a 50 wa vanhu, va nga vapizani va vaprofeti, va lo ta yima mahlweni ka vona hi le kulanyana; vonawu hi wumbiri gabye va lo yima hi le mbhirini ya Jordani.

⁸Zonake Elija i lo teka a nguwo yakwe a yi petsa, aba ha yona a mati ya congo, a mati ma avanyeka maya seno ni seno. Vona vambiri va lo tlhatuka muhanzeni wu womileko. [3]

⁹Makunu laha va nga wa tlhatukile, Elija i te ngalo ka Elixa: Kombela lezi u zi lavako a kuva nzi ku mahela zona na nzi nga se ku tekiwa mahlweni ka wena. Elixa i te ngalo kakwe: Nzi kombela lezaku nzi hiwa a xiavelo xa moya wa wena xi wuyetwa kumbiri.

¹⁰Elija i te ngalo: U kombele a xilo xo tsanza. Kanilezi loku wa nga nzi wona ni ku tekiwa, u ta mahelwa lezo. Kanilezi loku u nga nzi woni ni ku tekiwa, lezo zi nga ta maheka.

¹¹Zonake laha va nga ha famba, na va kari va wulawula, ku lo woneka a kareta ya nzilo ni mahaxi ya nzilo; yi lo ta va hambanyisa, Elija a tlakuselwa tilweni hi xipupuri. [4]

¹²Elixa i wa kari a mu wona; i loba huwa aku: Dada, dada! Wena u nga tikareta ta ka Israeli ni vakhileli va mahaxi ya kona! A nga ha mu wonangi kambe. Zonake Elixa i lo tlemerela a tinguwo takwe a ti hanzula hi laha xikari.

¹³Zonake i lo teka a nguwo ya Elija leyi a nga wa yi tsikile lahasi, a tlhela a ya yima laha mbhirini ya congo wa Jordani.

¹⁴I lo teka a nguwo ya Elija, leyi a nga wa yi siyile, aba ha yona a mati, aku: I kwihi Jehova Nungungulu wa Elija? Zalezo yenawu i loba a mati, ma si avanyeka maya seno ni seno; Elixa a tlhatuka.

¹⁵Laha a vapizani va vaprofeti, lava va nga wa hi le Jeriko, na va mu wonile, va te ngalo: A moya wa Elija wu le hehla ka Elixa. Va lo mu khinga va mu khizamela,

¹⁶vaku kakwe: Languta, ku na ni 50 wa vavanuna va ntamu laha xikari ka malanza ya wena, a va fambe va ya lava a hosi ya wena, hakuva kutani a Moya wa Jehova wu mu tekile wu ya mu hoxa le xitsungeni, hambu le nzhelelweni. I te ngalo: Mu nga va rumi!

¹⁷Kanilezi va lo kurumeta nguvu; zonake a ku ngalo: Va rumeleni. Va lo rumela 50 wa vavanuna va ya mu lava masiku manharu, kanilezi a va mu kumangi.

¹⁸Makunu laha na va tlhelile va wuya ka Elixa, loyi a nga wa tshamile le Jeriko, yena i te ngalo kabye: Xana a nzi mu byelangi, nziku: Mu nga fambi ke?

¹⁹Zonake ku lota a vanhu va muti va taku ka Elixa: A wutshamu ga muti lowu gi sasekile, kota lezi a hosi ya mina yi wonako, kanilezi a mati ma bihile, ni tiko ga hulukela. [5]

²⁰Zonake yena i te ngalo: Nzi neheleni a fukwana ya yiswa, mu chela munyu ka yona. Va lo mu nehela.

²¹I lo huma aya hlobyeni, a ya chela munyu lomu matini, aku: Jehova i ngalo: Nzi chumile a mati lawa. Cima ku nga ha ta kuva kona kambe a kufa ka wona, ge hambu kuhulukela.

²²Zingaho a mati ma lo chumiwa, ma maha ma nene kala nyamutlha, kota kuwula ka Elixa.

²³Yena i lo suka laho aya Beteli; na a ha kanziha a famba hi ndlela, ku lota vafanyana na va huma hi lomu mutini, va ta mu hleka, vaku: Kanziha nyapandla nziwena, kanziha nyapandla nziwena!

²⁴I lo hunzuluka a va cuwuka, a va rukatela vitweni ga Jehova. Ku lo huma maurso mambiri hi lomu khwatini ma pfhemula 42 wa vafana xikari kabye,

²⁵I lo suka laho aya le xitsungeni xa Karmeli; zonake i lo suka laho a tlhelela le Samaria.