Read tshwa 2 Tihosi 22 Bible Online

2 Tihosi 22 - tshwa bible

2 Tihosi 22

¹Josia i wa hi ni 8 wa malembe a xikhati a nga sangula ku fuma; i lo fuma 31 wa malembe le Jerusalema. A vito ga nyine wakwe i wa hi Jedida nʼwana Adaia wa le Bozkate.

²I lo maha kululama mahlweni ka Jehova, a famba hi tontlhe tindlela ta Davida a dadani wakwe, a nga hambuki xibhabheni ge hambu xineneni.

³Hi lembe ga wu 18 ga kufuma ka hosi Josia, a hosi yi lo ruma Xafani a mutsali, a nʼwana wa Azalia wa Mexulamu a kuya lomu ndlwini ya Jehova aku kakwe:

⁴Kanziha uya ka Hilkia a mupristi wa hombe, kasi a fela ku humesa yontlhe a mali leyi yi nehilweko lomu ndlwini ya Jehova, yi hlengisilweko ka vanhu va tiko hi vahlayisi va nyangwa;

⁵kasi va fela ku yi hendleleta mandleni ya vakhomi va mitiro, va nga vona vahlayisi va yindlu ya Jehova, va ta fela ku nyika lava va tirako mitiro ya yindlu ya Jehova a ku lema a tifa ta yindlu,

⁶va nga vavatli, ni vaaki, ni vavatli va maribye, ni ku xava ha yona tisinya, ni maribye ma vatlilweko va lulamisa a yindlu.

⁷Ni lezaku va nga wutisiwi nchumu hi mali leyi yi vekilweko mandleni yabye, hakuva vona va tira hi kutsumbeka.

⁸A mupristi wa hombe Hilkia i te ngalo ka mutsali Xafani: Nzi thumbile a bhuku ga milayo lomu ndlwini ya Jehova. Hilkia i lo gi nyika ka Xafani a gi gonza. [64]

⁹A mutsali loye Xafani i loya ka hosi a ya mu byela ku ngalo: A malanza ya wena ma hlengeletile a mali leyi yi nga hi lomu ndlwini, va yi veka mandleni ya vakhomi va mitiro, va nga vona vahlayisi va yindlu ya Jehova.

¹⁰A mutsali Xafani i lo engeta aku ka hosi: Mupristi Hilkia i nzi nyikile a bhuku; i lo gonza a bhuku lego mahlweni ka hosi.

¹¹Makunu laha a hosi yi nga zwile a timhaka ta bhuku ga milayo, yi lo hanzula a tinguwo ta yona.

¹²A hosi yi lo leletela mupristi Hilkia na Ahikamu nʼwana Xafani, na Akbora nʼwana Mikaia, na mutsali Xafani, na Asaya a nanza ga hosi, aku:

¹³Fambani mu ya nzi wutisela ka Jehova, mu wutisela ni vanhu vontlhe va ka Juda, xungetano ni timhaka ta bhuku legi gi thumbilweko, hakuva a zanga ya Jehova yi vurako hehla ka hina nja hombe, hakuva a vadadani va hina a va ingisangi timhaka ta bhuku legi, ni ku maha zontlhe kota lezi hi layilweko ka gona.

¹⁴Zinghaho mupristi Hilkia, na Ahikamu, na Akbora, na Xafani, na Asaya va loya ka Hulda a muprofeti wa xisati, a sati wa Xaluma a nʼwana Tikva wa Harhasa, a muhlayisi wa tinguwo; i wa akile le Jerusalema hi tlhelo ga wumbiri ga muti, va lo ya wulawula naye.

¹⁵I te ngalo kabye: Jehova Nungungulu wa ka Israeli i ngalo: Fambani mu ya byela a munhu loyi a mu rumileko kuta laha ka mina, muku: Jehova i ngalo:

¹⁶Nzi ta neha a khombo ka legi wutshamu ni hehla ka vanhu va gona, ti nga tona a timhaka tontlhe ta bhuku legi a hosi ya ka Juda yi gi gonzileko.

¹⁷Hakuva va nzi fularele va hisa tibani ka vanwani vanungungulu, va nzi zangarisa hi mitiro yontlhe ya mandla yabye; hikwalaho a zanga ya mina yi vindlukile yi vukela wutshamu legi; cima yi nga ta renga.

¹⁸Kanilezi a hosi ya ka Juda leyi yi mu rumileko ku ta wutisa ha Jehova, mu ta ya yi byela ku ngalo: Jehova Nungungulu wa ka Israeli i ngalo: Xungetano ni timhaka leti u ti zwileko,

¹⁹kota lezi a mbilu ya wena yi olovileko, na u ti koramisile mahlweni ka Jehova, laha u ngazwa hi lezi nzi wulileko xungetano hi wutshamu legi, ni vaaki va gona, lezaku va ta lobyiswa vave xiruko, u hanzula tinguwo ta wena u rila mahlweni ka mina, minawu nzi ku zwile, ku wula Jehova.

²⁰Hikwalaho nzi ta ku amukela ka vararu va wena, u lahliwa hi kurula xilahleni xa wena; a mahlo ya wena cima ma nga ta wona a khombo legi nzi ta nga gi neha wutshanwini legi. Va lo neha a timhaka leto ka hosi.