Read tshwa 2 Tihosi 3 Bible Online

2 Tihosi 3 - tshwa bible

2 Tihosi 3

¹Makunu Jehoramu nʼwana Ahabi i lo sangula ku fumela va ka Israeli le Samaria hi lembe ga 18 ga kufuma ka Jehoxafate a hosi ya ka Juda. I lo fuma 12 wa malembe.

²I lo maha lezi zi bihileko mahlweni ka Jehova, kanilezi a nga mahangi zo kota a raru wakwe ni nyine wakwe, hakuva yena i susile a xifananiso xa Baali lexi a raru wakwe a nga wa xi mahile.

³Hambu lezo, i lo namarela ka zionho za Jeroboamu nʼwana Nebate, lezi a nga onhisa va ka Israeli ha zona, a nga zi tsikangi.

⁴Makunu Mexa a hosi ya le Moabi i wa fuyile a tiyivu; i wa luva ka hosi ya ka Israeli hi woya ga 100,000 wa tiyivu ni 100,000 wa tihamba.

⁵Makunu laha Ahabi a nga wa file, a hosi leyo ya le Moabi yi lo hluwuka ka hosi ya ka Israeli.

⁶Hosi Jehoramu i lo huma lomu Samaria a hlomisa yimpi yontlhe ya ka Israeli.

⁷I lo rumela mitsumi ka Jehoxafate a hosi ya ka Juda, aku: A hosi ya vaMoabi yi nzi hluwukile; xana u nga ta famba zinwe na mina hi yalwa ni vaMoabi ke? Yena i te ngalo: Nzi ta famba, hakuva mina nzi khwatsi hi wena; a vanhu va mina ve khwatsi hi va wena, ni mahaxi ya mina me khwatsi hi ya wena.

⁸Yena a ku ngalo: Hi ta famba hi yihi ndlela ke? Jehoramu aku: Hi ta famba hi ndlela ya xiwula xa le Edomi.

⁹Zinghaho a hosi ya ka Israeli yi lo suka ni hosi ya ka Juda, zinwe ni hosi ya ka Edomi. Makunu laha na va fambile 7 wa masiku, a yimpi ni zifuyo lezi va nga wa hi nazo zi lo vumala mati.

¹⁰A hosi ya ka Israeli yi te: Mbuyangwana! Jehova i vitanile tihosi leti tinharu a ku ta ti nyikela mandleni ya vaMoabi!

¹¹Kanilezi Jehoxafate i te ngalo: Kasi seno a nga kona a muprofeti wa Jehova loyi hi faneleko ku wutisa Jehova ha yena ke? A munwe wa malanza ya hosi ya ka Israeli i lo hlamula, aku: I kona Elixa a nʼwana Xafate, loyi a nga wa chelile mati mandleni ya Elija.

¹²Jehoxafate i te ngalo: A mhaka ya Jehova yi zinwe na yena. Zinghaho a hosi ya ka Israeli na Jehoxafate, ni hosi ya ka Edomi va lo relela vaya ka yena.

¹³Elixa i te ngalo ka hosi ya ka Israeli: Xana nzi na ni mhaka muni na wena? Famba ka vaprofeti va raru wa wena, ni ka vaprofeti va nyine wa wena! A hosi ya ka Israeli yiku kakwe: Ahihi, hakuva Jehova i vitanile a tihosi leti ta tinharu a ku ti nyikela mandleni ya vaMoabi.

¹⁴Elixa i te ngalo: Nzi hlambanya ha Jehova wa tiyimpi a hanyako, loyi nzi mu khozelako, lezaku loku ku wa nga hi kota ya Jehoxafate a hosi ya ka Juda, cima ngha nzi nga ku khataleli ge hambu ku ku cuwuka.

¹⁵Kanilezi makunu nzi neheleni a munhu loyi a zi tivako a kuba a gubhu. Laha a mubi wa gubhu a nga waba, a canja ga Jehova gi lota hehla ka Elixa.

¹⁶Aku ngalo: Jehova i ngalo: Ketani mikele yo tala lomu ka nzhelelo lowu!

¹⁷Hakuva Jehova i ngalo: Cima mu nga ta wona mheho ge hambu ku wona vula, kanilezi a mikele leyo yi ta tala hi mati; nwina mu tanwa zinwe ni mitlhambi ya nwina ni zifuyo zinwani.

¹⁸Kambe xilo xo hehuka mahlweni ka Jehova; i ta nyikela ni vaMoabi mandleni ya nwina.

¹⁹Mu ta hlasela yontlhe a miti ya makhokhola, ni miti yontlhe ya tinhenha, mu tsemelela tontlhe tisinya to saseka, mu seletela tontlhe tihlowo ta mati, mu onha wontihe masimu laʼyo saseka hi maribye.

²⁰Ku te ni mixo, hi xikhati xa ku nyikela a muphahlelo, a mati ma sita hi ndlela ya le Edomi, a tiko gontlhe gi tala hi mati. [6]

²¹Makunu vontlhe vaMoabi, laha va ngazwa lezaku a tihosi leti ti kanzihile a ku talwa navo, va lo tsombana vontlhe va ntanga ya ku hloma matlhari ni lava va kale, va lo ta yima le mbhinganweni.

²²Va lo suka ni mixo laha a gambo na ga ha hatima hehla ka mati, a vaMoabi va lo wona a mati yo pswhuka khwatsi i mati ya nkhata mahlweni kabye.

²³Vona va te ngalo: Lowu i nkhata! A tihosi ti dayene, ti hlaselene ha toce! Makunu nwina vaMoabi, a hi yeni hi ya phanga!

²⁴Laha va nga wa chikele lomu wugovelweni ga va ka Israeli, a va ka Israeli va lo suka valwa ni vaMoabi, a vaMoabi va lo tsutsuma mahlweni kabye. A va ka Israeli va lo enghena lomu tikweni gabye va hlasela a vaMoabi.

²⁵Va lo khungumula a miti; zonake a vavanuna, loyi ni loyi i lo hoxa a ribye gakwe lomu ka masimu wontihe laʼyo saseka, va ma tata hi maribye; va lo seletela tontlhe tihlowo ta mati, Va tsemelela tontlhe tisinya to saseka; va lo siya ntsena a maribye ya Kir-Harsete, kanilezi a vahoxi va maribye va lo wu ranzela va wu hlasela.

²⁶A hosi ya vaMoabi, laha yi nga wona lezaku yi hlulilwe, yi lo teka 700 wa vavanuna lava va hlomileko a kuva va fohla va huma vaya le ka hosi ya le Edomi, kanilezi va lo tsanzeka.

²⁷Zonake yi lo teka a nʼwana wa yona wa matiwula, loyi a nga ta ngha a fuma wutshanwini gakwe, a mu nyikela a maha muphahlelo wa kuhiswa le hehla ka khurisi. Ku lo vutsuka a zanga ya hombe yi vukela Israeli. Va lo tsika a hosi ya vaMoabi, va suka va tlhelela tikweni gabye.